“ꇯꍝꃅꈁꎭꀕꀐ！ꉣꑊꂛꊨꅫꃀꑋꆹꉌꃀꈐꏭꄉꆍꊈꉪꏤꊋꋠꐨꊝꄮꇬ，ꉇꃅꇁꌊꉪꇬꉌꇬꇇꀨꇁꌠꏭꈁꎭꀕꀐ！ꉪꏤꇬꊎꌶꁌꎁꃅꉌꐒꄮꇬꆏ，ꉘꀋꇈꃅꆍꊈꆹꋋꇅꃅꇁꌊꎆꃀꌌꉪꏤꇬꇇꀨꇁ！”8ꆪ19ꑍꄹꉇꂵꆧ，ꎖꌊꏾꉸꒉꌶꅉꈲꒉꋉꑘꌶꑫꇬꎵꌧꎥꃪꌶꌺꊌꌠꂽꌋꈬꏣꂶꌠꆹ，ꏪꐦꑤꊈꎮꊈ、ꄜꉺꀯꀕꍈꑪꏀꏐꇇꇬꄉ，ꑤꊈ、ꑤꍔꃚꉈꃅꌞꎭꌊꇁꌠꌷꂂꈁꁠ6000ꂶꌠꊪꊊꈭꐨꆏꉌꐡꑓꇗꌊꉉꌐꈤꀋꉆ。

7ꆪꄮꐰ，ꊋꐛꇿꅇꌐꀋꉆꃅꇁꌊꏪꐦꑤꂽꌋꄰꅍꑟꇁ。ꂽꌋꈬꏣꂶꌠꏾꉸꒉꌶꅉꈲꒉꋉꑘꌶꑫꇬꎵꌧꎥꃪꌶꌺꎖꊊꌠꅇꊪꄯꒉꎴꊌ。ꀉꑌꑍꀋꐛꃅꊛꄉꅫꃀꂽꌋꀈꂱꑋꑾꌋꈤꊿꋅꒉꌶꅉꎵꌧꎥꃪꌶꌺꎖꊊꌠꅇꊪꄯꒉꎴꊌꌥ。ꄚꄉꋋꂿꉪꇩꏤꑬꊂꂛꊨꅫꃀꑍꂷꋍꈓꋓꃅꎵꌧꎥꃪꌶꌺꎖꊊꀋꋻꑴꌦꌠꐩꋊꋋꇱꎃꊐꇬꎭꀐ，ꂽꌋꄰꆹꇯꍝꃅꇿꉎꇿꄅꇱꀐ。

ꃰꊿꉌꇿꌠꌤꊝꆏꉌꃀꈜꀕꌒ，ꎼꈎ61ꈓꄉꎞꑭꆏꄉꀐꌠꂽꌋꍀꆉꆹꑊꑍꒉꇖꀕꃅꉉꇬ：“ꋍꀋꃀꌺꒉꆹꈍꄮꅉꆐꂘꃀꄻꁊꏂꇣꄧꐥꃲ，ꇖꂵꍈꌠꑌ1ꈓꀐ，ꌺꇢꈬꏣꂶꌠꑌꀏꀋꊰꃅꎖꌊꏾꉸꎥꃪꌶꌺꂷꐛ，ꉪꏤꉌꂵꇿꐯꇿ，ꀑꑊꋋꌌꁤꇅꀕꀐ。ꀉꅰꃅꉪꇬꀋꑟꌠꆏ，ꉠꀋꃋꂶꌠꑋꄡꇗꎖꌊꎥꃪꌶꌺꐛꀐ，ꂛꊨꅫꃀꋍꈓꋓꃅꎖꊊꌠꆹ，ꉪꏤꂽꌋꄰꋋꌌꂓꉻꌗꉻꊌꀐ！”

ꂽꌋꈬꏣꆹꄿꏀꌺꏦꇈꈍꄮꑋꊨꏦꉌꒊꇬꎷꑠꋍꂷ。ꈬꏣꐧꌶꌠꆹꏪꐦꄉꌶꅐ，ꐧꒉꌶꌠꆏꆃꎭꍏꊿꋅꐧꌷꅉꄉꌷꅐ。2005ꈎꆏꎖꌊꌧꍧꒉꌶꅉꒉꄆꑪꑼꇬꊌ，2009ꈎ7ꆪꆏꌶꅐꄉꎖꌊꏦꌠꌜꆆꄫꏃꋉꃆꄻꑘꇪꌦꂷꇬꐥ，ꄚꀊꉘꀋꐚꇬꆏ，ꌺꒆꊨꏦꃅꄷꀋꉂꌠꀋꐥꑵꉬꄉꋋꀱꆃꎭꇁ，ꋍꈭꐨꆏꊛꄉꋌꎼꆃꎭꍏꈲꒉꉜꎖꄐꏤꑼꇬꎖꉚꆹꇈꁱꎖꇬꆏꀨꇬꂶꌠꐛ，ꄚꄽꂫꆏꑞꒉꄷꉬꀋꐚꉘꀋꇈꃅꎖꌊꇬꀋꊌꆘꅝ。ꉘꇈꉘꇢꏿꌠꈬꏣꆹꉌꀋꊰꃅꋍꃢꉪꈽꈭꐨꆏ，ꋋꆹꄮꈉꈎꁂꂷꄺꊨꏦꁵꄉ，ꎥꃪꌶꌺꎖꑣꌠꊭꄎꄉꀄꊭꄮꇬꀄꂼꉪꇐꂶꌠꎹꈹꌥ—ꎖꌊꏾꉸꒉꌶꅉꌧꇐꌶꁧ。ꈎꁂꂷꐛꈭꐨꆏ，ꀄꊭꄮꇬꀄꂼꉪꇐꆹꇯꍝꃅꂻꐛꀐ，ꈬꏣꎖꌊꏾꉸꒉꌶꅉꇬꊌꀐ。

ꈬꏣꉉꏹꍓꇰꇬ，ꋋꆹꈍꄮꑋꏪꐦꐧꌶꅉꄯꒉꌶꄮꋍꅿꁥꏲꂘꃀꅿꏧꂱꂶꌠꋍꇬꈐꊟꊋꊡꌠꀋꎺꇁꀋꉆ。ꌶꅐꁧꄮꇬꁥꏲꂘꃀꅿꏧꂱꂶꌠꆹꋍꅿꅇꊏꄯꒉꇬꄉꑠꃅꁱꄉ“ꊋꑌꏢꀋꊰꑲꆏ，ꏾꉸꀙꄊꒉꌶꅉꅽꏯꇇꃭꇬꎷꌠꉬ。”ꋌꈭꐨꆏ，ꉢꆹꀄꂼꅐꊧꐥꅷꇁꀐ。

ꅫꃀꂽꌋꀈꂱꂶꌠꆹꆈꌠꅫꃀꌱꃀꐛꃅꐛꇈꊼꇅꇯꑊꏦꅑ。ꋋꉉꇬ：“ꂛꊨꑍꂷꌠꆹꌶꊌꐨꀊꇨꇧꐛꅹ，ꉡꆹꂛꊨꑋꂴꆽꄉꇬꌗꅉꍈꀋꌗ，ꀃꑍꉠꊌꐨꋋꍈꆹꃀꅉꆐꌌꉉꀋꇎ，ꉢꆹꄡꇗꑍꃀꑍꊂꌟꃅꈭꎁꇈꈁꒉꌒꐨꀕꇬꎷꌠ。”

ꂽꌋꈬꏣꄰꂛꊨꅫꃀꌕꑻꌠꆹꏪꐦꑤꀘꆳꑣꃪꇗꋂꇬꊾꒆꌺ，ꀉꄉꆹꑣꋂꂘꃀꂷ，ꀉꂿꆹꈭꎁꌠꂿꑘꊿꂶ，ꑱꈐꎆꌬꐨꆹꉬꇮꃅꀉꄉꅿꃄꎆꍈꌠꉘꇉꌐ。ꈬꏣꉉꇬ:“ꎷꐚꋠꇬꂯꆿꃀꇬꊀꄅꆹꌠꌡ。ꀄꊭꄮꇬꉪꊈꂛꊨꅫꃀꌕꑻꌠꆹꇇꏸꄖꇇꃀꃷꄉꀉꄉꌶꆏꀁꇬꇁꌠꃅꑍꃅꉖꌗꇬꎷ，ꑞꃅꄷꆏ，ꀉꄉꀱꀁꇬꇁꄮꆏꋠꅍꂷꇁꃼꌊꉪꊈꍈꇁꇬꎷꄷ。”

ꃄꎆꋍꂷꁧꎁꌌꊿꉬꑻꋠ，ꉈꑴꀉꑳꌕꑻꄯꒉꌶ，ꀊꋨꄮꇬ，ꂽꌋꍀꆉꄰꆹꇯꍝꃅꎭꐯꎭ，ꄚꈍꄮꑋꇿꑭꑌꇬꎷ。ꈬꏣꀉꂿꉉꇬ：“ꀉꑳꌕꑻꌠꄯꒉꌶꄮꇬꆹ，ꉪꏤꅉꀕꃅꈾꃚꑸꑽꋠꇬꎷꄷ”。ꈬꏣꒊꒉꄉꉉꇬ：“ꅉꀕꃅꈾꃚꑸꑽꋠꇬꎷꐛꅹ，ꆏꉜꉐ，ꉪꊈꋍꂷꈀꋒꀕꃅꇭꀧꎸꄜꃪꌐ！”ꅫꃀꀈꂱꉉꇬ，ꈬꏣꋍꑊꒉꌶꅉꌶꄮꇬꌶꁌꆹꌶꅉꇬꌶꌺꇇꀨꎆꉚꄉꏭꄉꌠꉬꄷ，“ꉪꊈꎆꀋꐥꑴꇬ，ꄚꋍꑍꉌꐒꇁꎭꆹꀋꋺ”ꄷ。

ꎥꃪꌶꌺꎖꄮꇬ，ꈬꏣꆹꋍꑍꇀꅉꀕꃅꏜꃅꄓꄉꑱꇩꁱꂷꎺꀘꇬꎷ，ꎷꍫꋠꌐꈭꐨꆏꇁꌊꄯꒉꄉꑳꇬꄉꌶꄻꑟꃅ，ꁯꋒꐯꉐꄮꈉꉬꂷꄮꇬꑳꆀꈻꀂꇬꁧ，ꈊꃀꆏꀂꇬꄉꊛꄉꌶꄻꌦ，ꂵꆧꆹꑬꀋꆏꋚꑋꀋꋠꄷ。ꈬꏣꉉꇬ：“ꎥꃪꌶꌺꎖꃏꊌꐨꁖꇁꀊꉗꀋꐛꃅꏾꉸꒉꌶꅉꎖꀱꅇꊪꎴꊊ，ꎼꈎ3ꆪ18ꑍꄹꉇꌠ，ꎖꀱꂯꃅꑍꌕꑍꀉꄂꋒꄮꇬꆏ，ꉡꆹꇯꍝꃅꀄꂼꂻꈜꇬꈴꆹꀐ，ꀒꎂꄉꀙꏢꇓꈓꑟꌠꄮꇬ39ꂷꌠꇬ，ꌶꀱꄯꒉꉢꌌꇖꃢꃅꁏꈴꄉꉜꈴꌐ。ꎖꊊꅇꇯꄯꒉꊪꊊꀊꋨꄹꉈ，ꉪꏤꋋꑷꃅꉌꐡꑓꇗꌊꑓꁴꅐꌐ。ꆈꌠꌺꂷꃅꄉꇬꉡꑌꉠꏣꃀꏣꑟꋋꇢꀋꏿꑴꅊꇈ。”

8ꆪ24ꑍꄹꉇꃅꄜꄮꈉ8ꂷꇅꌠꇬꆏ，ꂽꌋꈬꏣꆹꈭꈢꈜꈢꁣꀋꐥꃅꇁꌊꏾꉸꒉꌶꅉꎵꌧꎥꃪꌶꌺꀉꏀꂓꄜꅉꇬꑟꄉꂓꄜꄉꀐ……