“ꊝꅿꌋꆀꆈꌠꏓꂱꉌꂵꋍꂷꑌ”
——ꊈꏦꀣꊝꅿꏪꐦꍤꆫꇁꌠꃆꂮꁱ

“ꊈꊝꅿꆹꑠꃅꑗꈈꀕꇈꊿꑘꒃ”

“ꊈꊝꅿꇇꆹꉩꇬꊷꃅꊸꇅꀕꃅꎌ，ꋋꉈꑴꉠꇬꅲꅸꀋꑟꅉꀋꐥ，ꑡꆈꌠꃭꇁꀉꐎꋋꈨꋍꈫꌠꁌꆹꈍꑋꁵ？ꈚꇬꆹꊸꊷꄹ？”ꏪꐦꑤꍔꃚꐕꍯꇽꊿꀐꄸꋩꊽꂶꌠꑤꍔꃚꀃꈈꁭꑭꄉꊈꏦꀣꊝꅿꌋꆀꐮꋒꄉꇇꉩꈭꐨꆏ，ꉌꐡꑓꐡꃅꉉꌊꐋꀨꈧꌠꇰꇱꀋꏦꃅꎌ。

“ꉢꆹꐥꅷꋍꒉꇬ，ꇩꏤꊝꅿꑠꂷꌋꆀꐮꂿꄎꎼꀋꈁ？”ꏪꐦꑤꏓꂱꏦꍤꑼꇬꌤꃅꊿꀈꐂꂶꌠꊈꏦꀣꊝꅿꌋꆀꐯꇇꉩꇈ，ꉌꐡꑓꇗꃅꉉꌊꌤꃅꐋꀨꈧꌠꇰꅸꐺꑴꌦ。

“ꉢꆹꈍꄮꑋꀊꋨꄹꉖꈊꃀꑤꇨꍤꄷꉻꇬꄉꊈꊝꅿꌋꆀꐯꏯꌧꈿꄉꇇꉩꌠꀋꎺꇁꀋꉆꀐꌠ！” ꏪꐦꑤꊈꌤꃅꊿꒉꉘꃅꐭꂶꌠꆹ11ꆪ30ꑍꈊꃀꑤꇨꍤꄷꉻꇬꈩꐺꇈ，ꉘꀋꇈꃅꊈꏦꀣꊝꅿꌋꆀꐮꂿꄉꇇꉩꇈꑠꃅꉉꏹꍓꇯ。

“ꊈꊝꅿꆹꑠꃅꑗꈈꀕꇈꊿꑘꒃ，ꋍꍈꂯꏦꒉꀋꋦ！ꉢꋋꎼꉌꐡꌊꀋꎺꃅꑓꁴꉢꄝꇿꀕꈴꇁꌐꀋꐙ！”ꌩꇽꑣꂿꑘꊿꎭꂵꀊꑱꂶꌠꉉꌐꈤꀋꉆ

……

12ꆪ2ꑍꄹꉇꂵꆧ，ꏹꍓꉈꃅꇁꌊꊈꏦꀣꊝꅿꇬꇇꉩꋺꌠꏪꐦꑤꇥꀯꉹꁌꄹꁆꅲꁱꇈ，ꈁꅲꁱꌠꉹꁌꈧꌠꃅꄡꇗꉌꐡꑓꐡꌊꐺꌐꑴꌦ。

11ꆪ30ꑍꈊꃀꄮꈉ10:40ꃏꇅꌠꇬ，ꊈꏦꀣꊝꅿꆹꃀꈿꌐꈭꐨꆏ,ꐕꍯꑌꀋꅲꃅꁖꀏꄉꈜꎼꇈ，ꇁꌊꏪꐦꑤꇨꍤꄷꉻꂶꌠꇬꄉꏪꐦꑤꇥꀯꉹꁌꌋꆀꐮꂿꐯꈨꇇꉩꇱꀋꏦꃅꎌ。

“ꏦꀣꊝꅿꆀꃅꉂꅉꌠꏭꈁꎭꀕꀐ！”

11ꆪ30ꑍꅑ12ꆪ1ꑍ，ꍏꇭꍏꑷꍔꍞꏳꍤꊈ、ꇩꃷꑼꊝꅿꊈꏦꀣꉇꃅꇁꌊꏪꐦꑤꄉꉟꊪꆅꄵꏭꉃꄻꌠꌤꃅꃆꂮꍤꆫꇁ，ꆈꌠꇥꀯꉹꁌꊇꉜꅲꇁ。ꊈꊝꅿꊡꀱꄉꉉꇬ，ꄈꌋꆀꍔꃚꆹꀁꑌꊿꋅꃅꄷꌋꆀꌢꎭꃅꄷꉟꊪꆅꄵꏭꉃꄻꌠꌤꃅꉜꂄꐮꉜꂄ。ꉪꊈꆹꀋꎪꃅꄵꏭꌠꌌꀨꄉ、ꄵꏭꌠꌋꆀꉃꄻꌠꄻꐮꐊ、ꏦꃤꈴꄉꄵꏭꉃꄻ、ꈆꑪꈴꄉꄵꏭꉃꄻꌠꃅꇈ。ꉟꊪꆅꄵꏭꉃꄻꌤꃅꌠꌋꆀꎆꏣꐧꋦꀻꎆꄹꆷꌠꏓꐮꐊꄉꃅ，ꌢꎭꇇꀨꌠ、ꅋꏢꌤꃅꌠꌋꆀꏓꐮꐊꄉꃅ，ꏡꁈꏟꈯꀕꌠꏁꌬꄉ，ꀋꎪꃅꉟꊪꆅꁭꁘꌠꏢꇋꄷ。

“ꊈꊝꅿꎭꏿꀐ！”“ꏦꀣꊝꅿꆀꃅꉂꅉꌠꏭꈁꎭꀕꀐ！”

11ꆪ30ꑍꈊꃀꄮꈉ7:30ꇅꌠꇬ，ꊈꏦꀣꆹꁦꐂꇉꈴꄉꐕꍯꄮꈉꑍꂷꎖꑌꄈ，ꇁꌊꏪꐦꑤꑟꇁ。ꊈꏦꀣꊝꅿꑤꍰꑟꇁꄷꌦꆏ，ꏪꐦꑤꊿꋅꑍꃪꎖꄓꇁꄇꈜꑍꋯꉆꄉꇫꋩꇬꏦꇱꀋꏦꃅꎌ，ꉹꁌꒉꃚꇿꃚꌋꆀꇇꁮꏪꃚꇉꁦꉼꇬꎌ。ꊈꊝꅿꇇꎇꌊꐕꍯꉈꏭꄉꉹꁌꏭꇗꅉꃅꇱꀋꏦꃅꎌ。ꈊꃀꄮꈉ8:30ꇅꌠꇬꆏ，ꊈꏦꀣꊝꅿꆹꐙꄏꌠꀋꑴꃅ,ꇁꌊꏪꐦꑤꃀꈿꈯꄜꑶꂿꇬꄉ，ꉟꊪꆅꄵꏭꉃꄻꌤꃅꑌꇖꃀꈿꌠꊥꇺꄉꈿ，ꄮꈉꑍꂷꎖꂷꌌꂱꑱꁁꏯꉜꐨꅲꄜ。

“ꉢꆹꆈꌠꃺꑌꌋꆀꉌꂵꋍꂷꑌ”

12ꆪ1ꑍꄹꉇꃅꄜ。ꏪꐦꇓꈓꂶꉐꃰꌦꐊꄉꐛꑴꌦ。

“ꊈꀉꁌꃪ！ꊈꀉꁌꆎꇁꌊꎭꏿꀐ！”“ꊈꊝꅿꆏꇁꌊꎭꏿꀐ！”“ꊝꅿꀅꌳꀅꌳꃅꁧ！”“ꊝꅿꇭꀧꎸꄜꃪꅊꇈ！”“ꊝꅿꐥꍂꈎꄜꎴꅊꇈ！”“ꆈꌠꏓꂱꐥꍂꃅꊝꅿꉂ！”“ꏪꐦꊿꋅꏓꂱꊝꅿꆏꀋꎺꄮꀋꐥ！”ꉹꁌꇴꃚꏅꃚꏪꐦꏦꎫꋋꇱꂨꁖꁧꄈꏾꃅꎌ。

ꄮꈉ7ꂷꇅꌠꆏ，ꏪꐦꑤꇥꀯꉹꁌꌶꌺꋍꃪꎖꑻꋅꃹꊂꂶꉐꃰꌦꐊꄉꐛꇈꈛꈼꌠꀋꑴꃅꄓꄉꊈꊝꅿꇬꏃꎭꇁꌐ。

“ꆈꌠꃺꑌꊈꃪꌐ！ꆈꌠꃺꑌꊈꈎꏅꃅꌒ！ꉢꆹꆍꊈꉂ！ꉢꆹꆍꊈꌋꆀꉌꂵꋍꂷꑌ，ꉢꆹꆈꌠꃺꑌꌋꆀꉌꂵꋍꂷꑌ！”ꊈꊝꅿꇳꃚꇉꄩꇪꀮꂾꃚꌟꃅꊽꉌꐡ。

ꄮꈉ7:25ꇅꌠꇬ，ꂶꉐꃰꌦꄅꄉꐛꌠꆏꀐ。ꊈꊝꅿꆹꏪꐦꃥꋩꅉꄉꁖꌊꑤꎭꈴꏳꏡꁮꄇꈜꇬꑟꄷꆏ，ꋋꆹꋌꐊꇁꌠꌤꃅꊿꈧꌠꅇꃅꀋꅲꃅ，ꁖꌊꀏꄉꈜꎼꄉꇇꎇꇇꉈꌊꄇꈜꑍꋯꉆꎍꌠꇥꀯꉹꁌꌶꌺꈧꌠꏭꇗꅉꃅꅷꉻꆏꋍꂷꎖꈴꄉꇁꌊꏪꐦꏦꈜꑟꇠꊙꌠꇬꑟ，ꇁꌊꏦꈜꑞꈚꇬꑟꄿꂿꃅꏪꐦꉹꁌꈨꌟꌋꆀꐮꇇꉩꄉꊸꐨꈻꐪꅲꅸꀋꑟꅉꀋꐥ，ꆈꌠꉹꁌꈍꑋꉌꐡꌊꑓꁴꇗꃅꇤꇯꀋꏦꃅꎌ。

“ꄈꌋꆀꍔꃚꆍꏭꈁꎭꀕꀐ”

ꄮꈉ8:00ꇅꌠꆏ，ꊈꊝꅿꇁꌊꏪꐦꑤꏓꂱꑱꑼꄉꑱꌜꌋꆀꊾꆅꈧꌠꉜꇁ。ꋋꈍꑋꈓꅑꅸꇁꌠꆏ，ꑱꑼꋋꂷꆹꉟꊪꆅꊌꌠꊿꀉꑌꈨꌌꄚꄉꉃꄻ。ꑱꌜꈧꌠꉬꇮꃅꁁꅪꆽꈜꍈꄻꉦꃀꇬꄀꄉꌠꂿꇬꆏ，ꊈꏦꀣꑋꉉꄻꀋꅐꃅꋍꂷꋋꒃꄻꉦꃀꇬꄀꄉꀐ。ꆅꉚꑳꈐꏭꄉ，ꊈꏦꀣꆹꉟꊪꆅꊌꌠꀋꃀꀉꑳꒆꑍꂷꇬꉜꅲꇈꑗꈈꀕꃅꋀꊇꌋꆀꐮꇇꉩꐺ。ꋀꊈꏭꈐꊟꊋꊡꄉꉉꇬ，ꆍꊈꑴꌠꑱꈐꀨꎹꆽꃴꋒꃅꀉꑳꌺꉙꂘꌊꉾꃪꄷ。ꁧꂯꄉꄮꇬꆏ，ꊈꏦꀣꆹꑱꌜꈧꌠꏭꉉꇬ，ꆍꊇꎭꏿꀐ。ꆍꊇꊋꇤꄉꌤꃅꌠꌋꆀꀀꆹꀋꉪꃅꅐꌞꌠꀋꉬꑲꆏ，ꉟꊪꆅꊌꌠꊿꆹꀃꑍꑠꃅꎸꄜꊈꁧꂄꌠꌋꆀꉌꊈꇨꃅꐥꀋꄐꌠ，ꄈꌋꆀꍔꃚꆍꏭꈁꎭꀕꀐ。ꋋꑱꌜꏭꏤꄻꇬꆅꉃꌠꀉꄂꀋꉬꃅ，ꉈꑴꆏꏣꀋꑌꃅꉟꊪꆅꄵꏭꉃꄻꌠꌧꇐꑋꄜꉺꅊꇈꄷ。

“ꉢꆹꆍꊇꉂ”

ꊈꏦꀣꉟꊪꆅꒉꄷꃅꊿꍸꐛꌠꀊꉘꈧꌠꇬꉌꁠꐮꉌꁠ。12ꆪ1ꑍꂵꆧꆏ，ꋋꉇꃅꇁꌊꌩꇽꑣꈯꄜꐭꌶꅉꇬꄉ，ꀉꄉꀉꂿꉟꊪꆅꊌꌦꅀꑷꑳꅝꌦꌠꌺꍸꇖꈤꇦꏦꁥꌠꉜꅲꇁꀐ。ꊝꅿꆹꉂꏣꅶꇻꀕꃅꌶꌺꈧꌠꏭꉉꇬ，ꆍꊇꆹꀉꄉꀉꂿꀋꐥꇬꑴꇬ，ꄚꀃꑍꆏꈀꄸꑌꑱꈐꀉꒉꋍꂷꇬꐥ，ꈀꄸꑌꐮꇰꂛꊨꅫꃀꉬꌐ。ꑗꉘꊝꋺꌠꆍꊈꆹꀉꅰꃅꌳꈄ、ꀉꅰꃅꆽꇨ、ꀉꅰꐥꐨꉂꅉꌠꉬ，ꆍꊈꆹꀋꎪꃅꊫꂫꃰꇌꃪꂷꐥꌠꉬ。ꋋꉈꑴꄯꒉꀉꑌꈧꌞꎭꊾꍸꌶꌺꈧꌠꁵ，ꋀꊇꏮꊋꇤꏡꇤꄉꎔꎗꃅꁱꂷꌶꄸꈐꊟꊋꊡ。ꋍꈭꐨꆏ，ꊈꏦꀣꆹꌶꌺꈧꌠꌋꆀꐮꇇꌭꌊꌶꅉꄷꉻꇬꑟ。ꌶꌺꈧꌠꉌꐡꑓꇗꃅꆈꌠꑵꉙꌟꃅꄹꃥꄷꂶꌠꑵꊝꅿꇰ。ꊈꊝꅿꉌꐡꑓꐡꃅꉉꇬ:“ꉢꆹꀃꑍꋋꑍꀋꎺꇁꀋꉆꌠ，ꉢꆹꆍꊇꉂꄷ。”

“ꀉꅰꃅꐥꌒꄻꌒꇁꅊꇈ”

ꏪꐦꑤꊅꍣꑣꄊꏃꄫꋂꆹꎿꄩꁦꒉꇈꉬꀉꂥꐨ2820ꂰꐥꌠꈬꉘꃅꄷꈚ。ꄚꇬꀀꌠꆈꌠꉹꁌꆹꀉꉘꏢꅑꅸꇁꌠꆏꀻꑳ、ꏜꑳꌋꆀꂷꇪꑳꀀ，ꊿꌋꆀꎇꃀꍅꑓꐮꈾꋦ，ꁧꎴꐨꀉꒉꃅꀋꇎ。ꋋꈍꑋꈓꆏ，ꂱꑱꊐꌠꍔꃚꊋꇤꌠꇂꃴꄉ，ꆈꌠꉹꁌꀉꑌꈨꄓꇁꑳꎔꇤꃨꀀꌐꀐ。ꊈꏦꀣꆏꇁꌊꋂꂱꉊꆽꍀꆉꄰꑳꆹꑳꏀꉜ。ꆈꌠꐥꐨꄻꀱꌊꋍꑍꋍꉙꃅꉾꃪꌠꂿꇬꆏ，ꊈꏦꀣꆹꉌꂵꇿꐯꇿ。ꋋꆹꐥꐨꌬꉂꌬꈽꈨꌞꎭꋂꇬꆈꌠꉹꁌꊈꁵ，ꄸꀋꁧꋀꊈꏭꎆꏣꀻꎆꌊꄉꏜꃅꈠꃅꌢꎭꐛꐨꄻꀱꄉ，ꀋꃋꋋꄮꌧꑳꐥꐨꐥꏦꄕꊪꇈ，ꀉꅰꃅꐥꌒꄻꌒꃅꐥꄷꈐꊟꊋꊡ。

“ꆃꎭꆈꌠꃺꑌꊈ，ꀆꌳꑌꇈ！ꉢꆹꉌꂵꆍꇱꎌ！ꉢꆹꆍꊈꉂ！ꉢꆹꆍꊈꌋꆀꉌꂵꋍꂷꑌ，ꆈꌠꃺꑌꌋꆀꉌꂵꋍꂷꑌ！”ꁊꏂꑣꌧꇤꋂꆹꆀꃅꂿꑘꁡꇤꀉꏀꂷ。ꊈꊝꅿꇁꌊꁊꏂꑣꌧꇤꋂꇬꈴꁧꂯꄮꇬꆏ，ꆈꌠꇥꀯꉹꁌꀉꑌꃅꄇꈜꏡꁮꇬꐺꌐꌠꋋꂿꇈ，ꋋꆹꉈꃅꁖꀏꏯꄉꆈꌠꇥꀯꉹꁌꇬꇇꉩꌧꈿꇁꌦ。ꊝꅿꄹꇬ，ꉢꉘꇈꌠꆹ，ꆍꊈꑴꌠꊋꇤꏡꇤꄉꆀꃅꂿꑘꁡꇤꀉꏀꋈꄻꌊꀉꅰꃅꉾꃪꇁꄉ，ꆈꌠꉹꁌꏓꂱꁳꋍꑍꋍꉙꃅꀉꅰꃅꐥꌒꄻꌒꇁꅊꇈꄷ。