ꀉꑳꆗꉼꇁꌊꉷꃈꇓꈓꑟꇁꀐꂼ.

ꀉꑳꆗꉼꑠꍈꑌ,ꈝꃀꈜꋍꎳꏢꍬꀕꍬꅷꀃꑍꑟꇁꀐꂼ,ꀉꑳꆗꉼꎭꇂꅦꌺꄻꀋꋻꑴꇬꉌꃀꎭꑭꆹꑋꂷ,ꈍꄮꈋꄮꉬꀋꐚ,ꀍꃈꃅꇫꎭꇀꅧꌠꃆꂮꑵꉙꈐꏭ,ꅺꈨꇀꆏꇬꇉꑓꁴꊰꑠꑵꃚꐝꄧꀕꌠꉠꅻꀧꇬꃹꇁ“ꎭꌺꐤꅉꇬ,ꏃꃅꆈꋧꋪ,ꎭꌺꈺꄂꀕ,ꋧꃅꇥꄧꊿꐥꇫꐥꑞꃅꐯꀋꌡ,ꉠꎭꌺꉂꐪꉌꂵꇬꑌ,ꉂꊿꆎꆹꃅꏸꆥꁨꌠ,ꑓꎇꂿꉆꇇꎇꂿꀋꉆ、、、、、、”,ꀊꆨꈍꄮꇬꑵꃚꋋꈨꈧꆏꉌꐡꑓꇗꇰ,ꇯꍝꃅꇬ,ꃅꇫꑵꌠꎭꌺꎭꐨꀂꏽꃅꄉꑓꁴꑌꅐꋺ.

  ꉢꉪꇬ,ꋧꃅꇥꄧꋋꂷꇬ,ꐧꇂꃬꊿꋌꑵ,ꇿꐪꌒꐨꆹꈜꋍꏢ,ꆏꇿꉢꇿꋓ,ꆏꌒꉢꌒꋑ.ꄚ,ꋍꃅꑴꇬ,ꃰꊿꎭꐨꋌꑵꆹ,ꎭꈜꉐꑋꊏ,ꅽꎭꉠꎭꐯꀋꌡ,ꌞꎭꄅꀕꎭ.

  ꉪꊇꌧꇏꂿꇐꎹꈹ,ꁱꂷꑴꂷꌶꄻꌠꌶꌺꀉꑳꋋꈨꆹ,ꊿꉪꏭꎭꌺꉬꑴꄷꄸꂯ,ꃰꐛꆈꁌꀕꄿꂿ,ꉐꐙꆈꑰꀕꄿꂿ,ꆲꏂꃅꃴꋦꄿꂿꑍꇁꌋꀋꐥꃅꐣꁙꍈꄻꏢꁮꏭꄀꄉꀵꌶꅉꇬꉜꄉꁧꇬꎷꌠꆹꌶꌺꉬ.ꌶꎖꄮꇬꈈꌊꀋꉾꏠꑴꈬꉌꂵꐒꅍꀕꌠꆹꌶꌺꀉꑳꉬꑴꇊ.ꌶꅐꂯꄉꄮꇬꑋꅉꉆꅉꍈꎹꊊꀋꄐꇁꏠꑴꈬꀍꃀꑓꏂꋩꌠꑌꌶꌺꉬꑴꃅꄉ,ꌶꌺꑞꃅꀋꎭꂯꇆ.

  ꀃꑍꋋꄮ,ꌞꆹꆺꑳꏂꃴꀿꇁꃀꐮꐥ,ꈍꃅꈿꌒꑌꀋꐚ,ꏂꆨꀋꀨꀉꃅꅋꌠꊸꏭꐛ,ꃮꆪꈾꃚꀉꂿꃅꌠꐔꏭꐛ,ꆺꑳꀉꄉꉂꐪꆹꂚꈢꉘꁌꌟꃅꇗꄃꀕꏭꐛ.ꀉꑳꆗꉼꑠꂷꆹ,ꏂꆨꉱꏢꀕꇬꑌꀿꇁꃀꐞ,ꃺꇁꑌꐞꇁꀐꂼ,ꇁꌊꉷꃈꇓꈐꑟꇀꌦꀐꂼ.ꌞꆹꇐꀳꇬ“ꀀꏣꆀꃅꐥ,ꀀꌺꆀꃅꈄ,ꀀꏣꉷꃅꐥ,ꀀꌺꉷꃅꈄ”ꄷ,ꀉꑳꆗꉼꆹ,ꉜꇁꋯꀋꐛꌠꉷꃅꇓꈓꆹ,ꏣꇁꑞꌺꇬꀋꀀ,ꃺꇁꑌꌺꇬꀋꋦ,ꊈꇂꌐꌺꑌꇬꀋꄃ,ꆗꉼꑞꎹꑞꈹꇁꌠꉬꂯ?

  ꋋꆹ,ꀎꋏꀉꁌꑠꂷꎺꇆꐝꄧꀕꃅꇫꏯꉉꇬ,ꉷꃅꇓꈐꆹ,ꅺꊈꂘꃅꀋꇮꌋꌠꐥꑴꄷ,ꉷꃅꋦꁋꆹ,ꌧꇏꂿꇐꈁꇮꇱꑠꀋꊉꎵꃅꐥꑴꄷ.ꌧꇏꂿꑌꀂꏽꈝꃀꋋꏢꆹ,ꎭꑭꑌꌠꌟꈄꆗꌺꀋꉬꑲꆏꑭꆹꅩꐞꀕꌠꉬꑴꄷ.ꋍꃅꄉ,ꀉꑳꆗꉼꑭꎜꊖꆈꄔꄉꇁꀐ,ꌧꇐꀂꏽꎭꇂꅦꌺꂷꐛꄉꇁꀐ,ꑠꅹ,ꀉꑳꆗꉼꇁꌊꉷꃈꏦꎫꃹꄉꌧꇐꄇꆹꋩꇁꀐ.

  ꄇꆹꀊꊛꇆ,ꉢꁳꆎꋩꃄꇖꄹꊂꏭꃰꏿꇯꑟ,ꌧꇐꄚꈩꏭꃰꏿꇯꑟꀋ.