ꑲꅉꀋꃀꆹꉪꏤꃅꄷꃄꅉꑠꈚꉬ,ꀃꑍꉷꃈꇓꈓꐺꑴꇬ,ꉢꎺꇬꄀꇁꃲ.

《ꂘꃅꄯꒉ》ꇬꑠꃅꉉ:ꀊꉘꈩꌒꇕ,ꋍꑍꈬꈚꐂ.ꐯ,ꁰꑌꁰꑌꃅꎺꇆꐝꄧꀕꌠꀊꉘꄮꐰꉠꑓꋪꀂꏽꐛꇁꌟꃅꐛ,ꅊꁘꅈꁙ,ꈀꄸꂿꑌꈀꄸꇧꉌꃹ.

   ꀄꊭꃅꋍꑍ,ꉢꎺꇬ,ꑲꅉꀋꃀꆹꌩꏪꆈꊉꀕꑠꈚ,ꄮꁧꑌꋦ,ꌩꁧꀉꁁꋌꑞꋍꑵꑠꑌꇫꋦ,ꐧꀠꇬꆏꒉꁦꑠꏢꇫꒉ,ꒉꁦꋋꏢꀋꉊꂴꆹꌌꂿꑘꊿꍯꃅꇬꒉꊎꌠꌠ,ꀋꉊꊂꋍꈭꋍꇍꍯꃅꌌꅔꃅꐆꌐꈭꐨꆏꎃꀕꒉꈜꌠꒉꁦꑠꏢꀉꄂꐛꀐ,ꊁꏯꉹꁌꊼꇅꌣꈲꆹꇬꆏꒉꁦꏡꌠꋀꇰꈤꌊꄆꃑꅍꇬꊐꄉꄆꃑꀐ,ꈀꄸꑌꉌꇿꑓꇿ,ꆀꃅꁡꇤꏁꇅꁤꇅꒉ,ꃅꃴꏷꌺꌟꃅꌬ.

  ꀊꉘꄮꐰ,ꀁꇬꎆꁨ,ꃄꅉꑌꀉꑌꃅꐥꄉ,ꀉꂿꀉꄉꑋꆹꑘꃅꃤꑽꇬꂯꀉꍠꀕ,ꑓꏮꎆꉜꇁꀋꆗ,ꑠꐛꅹ,ꎆꆫꌠꆹꎂꀕꇁꉪꀉꑳꈧꌠꀂꏽꎑ,ꉪꌳꃈꆂꌕꑻ,ꉢꀉꒉꂶꌠꐛ,ꊋꃤꀉꒉꃅꁵꐺ.

  ꑋꅐꑋꈌꁏ,ꑋꈌꉙꏦꀕ,ꎔꇂꃨꌠꁬꃨꇓꃨꆎꐂꉠꄩꀖ,ꁬꈬꐛꑿꆎꐂꉠꂴꅞ.ꑌꑿꆿꎝꁭ,ꆿꌌꇉꇬꏮ;ꈌꐎꍀꎝꁭ,ꍀꌌꇉꇬꃹ;ꏿꈌꋠꎝꁭ,ꁦꀑꆲꊭꅥ;ꌩꃀꄔꎝꁭ,ꇉꅶꉐꇓꁠ.ꀎꋏꇐꀳꀋꐯꐤꀋꁨ,ꑋꊂꌕꆪꑲꅉꀋꃀꏭꃴꃅꃴꍚꀕꌠꁬꃨꆰꃨꆹ,ꀋꇊꆏꀁꄂꀊꃴꈬꍔꇁꐦꀞꂷꇢꌠꌟꃅ,ꈁꉜꈁꋽꀕ,ꀉꐔꊰꏁꈒꂷꑌꀋꇊꌡ,ꐩꋊꄮꈉꄚꄉꑍꑟꉂ,ꉌꐡꏭꃅꑌꐛ,ꉌꎭꏭꃅꑌꐛ.ꄚ,ꌞꆹꇐꁳꋋꆹꐝꍠꀕ,ꏿꈌꋠꎝꁭ,ꁦꀑꆲꊭꅥ,ꉪꏤꑠꇬꉹꁌꎆꁨꌠꀉꑌꃅꐥꄉ,ꆎꑌꇂꁮꅸꁨꇁ,ꉡꑌꍶꑿꅸꁨꇁꃅ,ꑲꅉꀋꃀꆹꎆꆫꁍꂷꐛ,ꀉꑳ,ꌟꒉ,ꃀꌠ,ꀊꎺ,ꌠꆗ,ꑮꆜ,ꀋꐊꅍꀋꐥ,ꂸꌒꀕꂿꉨ.ꐯꊨꐮꏈ,ꐮꇴꐯꅷ,ꐯꈢꐮꄻ,ꆏꉉꉢꒉꏽ,ꆏꏈꉢꏈꋓ,ꑵꃚ,ꉩꃚ,ꏈꃚ,ꀋꐊꅍꀋꐥ.ꀊꋨꄮꇬ,ꉡꆹꀄꊭꑴꌦ,ꑠꅹ,ꂾꃚꏇꃚꈬꇬꃛꁙꀁꊰꌞꅲꇢꈤꇁꌟꃅꐛꀊꋨꏢꇁꉠꃛꁙꉬꋭ.

  ꂸꌒꀕꂿꉨ.

  ꃮꆪꒈꈬꑍ,ꆀꃅꀕꈋꈩꌒꀜꌒꇖꌠꄔꆹꄚꄉꊒ.

“ꊒꒀ,ꊒꒀ,ꊒꒀ,ꊒꒀ…….”ꆈꌠꆹꀃꌋꂾꀊꆨꇯꆐꊒꅷꀃꑍꋍꄮꑟꑠꁯ.ꊑꆏꋬꂻ,ꊑꆏꈨꅪ.

  ꑲꅉꀋꃀꑌꆈꌠꌺꇖꋍꏅꈩꄉꊒꄓꏿ,ꃅꉩꒉꀋꉩ,ꌞꃅꄷꒈꅐꃪꂥꌐꇬꋋꆹꇙꋏꄷꀋꄹ,ꇗꄃꂷꑌ,ꍅꇗꁌꅍꀊꄶꀀꎍ.ꄮꏪꆿꃴꆹꉩꑍꀊꉘꒉꁟꅉ,ꊸꑍꀊꉘꈨꁟꅉ,ꄮꁧꀂꏾꆹꉌꊭꉌꇓꑋꅉ,ꄤꇖꀠꇰꈩꅉ.

  ꑲꅉꀋꃀꁧꑭꇬꆹꒈꏢꑍꇁꌋꀋꐥꃅꇬꊎꒉꇬꎷ,ꈀꄸꑌꇬꏭꒈꏾꌺꄷ,ꒈꇤꋋꏢꀁꋍꆏꒈꐂꇁꄿꄷ.ꒈꐂꇁꄿꆹ,ꃅꎸꌕꑍꆏ,ꑍꇁꈨꑭꅐꄚꌸ,ꌊꇁꆪꑭꁉꄚꌸ.ꊸꃅꊸꆣꀕ,ꀋꈩꉈꉩꀕ.ꎹꄓꐯꑎꆏ,ꅉꁮꎆꆫꌠꉬꄿꂿ,ꈭꎼꈛꈜꌠꉬꄿꂿ,ꈀꄸꑌꒉꐚꐝꍚꀕꌠꒈꐂꌺꒈꁠꇆꅝ,ꇭꀧꇖꌋꋌꌌꑾꌙꀕ,ꄷꀋꁧ,ꇂꁮꀉꇙꑠꀂꏾꈎꄉꋍꁠꇆꀋꅝꌠꀋꐥ.ꂸꆪꐯꑎꆏ,ꑲꅉꀋꃀꉘꁌꆳꁏꁦꉘꀕ,ꑌꑿꂾꃚꌒ,ꆫꌠꉌꌒꄀ.ꁯꋒꐯꑎꆏ,ꁮꈤꏦꃴꑟꇁꃲ,ꏦꃴꆈꊉꀕꇁꃲ,ꀊꉘꒈꐂꇁꄿꉛꈹꉛꋠꏿꇰꃲ,ꉛꍫꅪꉗꌑꁴꀕ,ꐰꑌꃅꇴꄓ,ꉎꑌꂴꍀꄓ,ꀊꉘꂱꀯꅪꉗꌑꂿꀕ.ꃀꌠꂾꆏꁨꆧꒈꆭꇴ,ꑓꏮꈧꌺꉜ,ꎆꈤꇀꄮꑟꀋꑟꌠꉜꏭꐛ.

  ꂸꌒꀕꂿꉨ.

ꍵꊂꌕꆪꆏ,ꆿꆪꏮꁧꏂ.ꍵꅐꍴꈌꁌ,ꍴꈌꏂꆘꆚ,ꍴꈌꉙꏦꀕ.ꑲꅉꀋꃀꏭ,ꅔꐎꏂꆘꆚ,ꑓꏮꈁꉜꅉ,ꂿꑘꊿꂷꄶꀮꇗꀕ,ꏾꄶꇪꑐꀕꀋꎴꉈꉩꀕꀐꌠꋚꁧꁍꇬꄉꆏꀥꉢꀥꋓ,ꋚꒇꉊꈯꅏꁏꅐꆗꏿ,ꒉꃴꉜꏂꌟꃅꐛ,ꈁꉜꌞꉌꐡ.

ꀊꉗꀋꐛꇬꆏ,ꍴꅐꍵꊂꆈ,ꍴꅐꍵꊂꏂ.ꅔꐎꏂꊂꏭ,ꎆꆫꊿꎆꅸꍵꊂꃑꇁꌠꆈꒌꉢꇁꏿ,ꈾꏜꀊꉘꈩ,ꆸꈈꃀꌠꑌ,ꈾꏜꍠꌊꇂꁮꄻꄉꌌꐮꁜ,ꉢꎺꇬꋍꑍꌞꆿꃹꊰꀋꋻ,ꉢꑴꆆꐯꀐꌠꃃꃆꑌꐛ.ꆈꌠꉹꁌꆿꍯꇵꋩꀕ,ꏸꁨꅪꇬꊐ,ꈎꈤꇀꆏꏅ,ꆪꈤꇀꆏꊒ,ꀀꉪꑌꉨꏿꄉꇁꉚꌠꈎꂶꌠꑌꑷꊂꁧꎐꅐꇀꇰ.ꋍꈓꋍꃢꋬꂻꈨꅪꋍꃅꄚꈜꁧ,ꊁꇁꄼꈎꈜꀕꃪꎂꀕ.

ꂸꌒꀕꂿꉨ.

ꋅꀑꌕꆪꆏ,ꑲꅉꀋꃀꏭ,ꃰꌗꉈꌗꈻ.ꈜꎴꃅꄷꉆꄉꉜꇬꆏ,ꌞꉌꂵꁌꏭꃄꑌꀋꇊꐛ.ꏦꏃꃭꇁꐮꐊꐙ,ꀊꉘꋋꄮꆏꆺꑳꏂꃴꀉꂿꏢꁮꈩ.ꉪꏦꃅꄷꋋꄮꇬꆏꑘꃅꃤꑽꅍꀊꅰꀋꐥ,ꋍꈓꈪꄙꇬꊼꇅꆗꊬꌠꇬꉬ.

ꃰꐛꆈꁌꀕ,ꏂꆨꉱꏢꀕ.ꁮꈯꁮꆰꐓꀧꀀꌠꐓꀧꀀ,ꃅꐬꀀꌠꃅꐬꀀ,ꃰꊿꌊꆀꇙꀕꋍꃀꌺ,ꈀꄸꑌꑆꁬꄶ,ꊿꂯꈻꀐꃅꄉꑋꁮꉆꁮꑌꈍꃅꀋꈻꂯ.

  ꑲꅉꀋꃀꆹ,ꈍꄮꉬꄿꂿ,ꋌꐛꋍꃅꐙ.

  ꀋꉊꈍꄮꉬꀋꐚ,ꉢꉈꏭꄯꒉꀘꐡꄉꈍꉗꏢꎆꆫꑲꅉꀋꃀꏪꀋꆹꇈ,ꉢꀱꀊꉗꏢꀋꃀꀐꌠꑲꅉꀋꃀꅇꋍꇬꄜꆹꂿꉂꇬꆏ,ꑓꏮꈁꉜꅉꉠꉌꂵꆅ,ꄄꍻꀕ,ꈍꉗꏡꂷꇬꐛꀕꇁꀋꉆ.ꀊꉘꄮꐰꌩꏪꆈꊉꀕꌠꑲꅉꀋꃀꆹꀀꑍꋋꄮꆏꄮꁧꀕꂯꇬꀋꋦꀐ.ꀊꇷꇊꀊꇷ,ꑡꃅꇁꌠꉬ,ꐰꁧꀐꄷꅀ,ꑍꁧꆘꅆꅀ,ꇿꁧꆘꅆꌠꉬꂯ?

  ꉢꀱꀁꇬꇁ,ꀥꇁꀉꂿꏭꅲ,ꑞꒉꄸꉬ.ꀉꂿꆹꑱꀋꐥꐆꃅꄉꉠꏯꀱꇬ,ꋋꆹꉪꏤꊿꃀꇱꇽꌊꏦꌩꃅꄉꏓꌐꀐꌠꉬꅊꇈ.ꑲꅉꀋꃀꉠꉂꇀꅉꌠꀋꎺꇁꀋꉆꌠꄮꏪꑠꂷꑌ,ꃰꊿꃤꃀꆿꃹꄉꋍꃅꄚꈜꁧꅊꇈ.

  ꋋꈭꐨ,ꉢꋍꑍꂯꑲꅉꀋꃀꆹꀋꋻꅷꀋꃅꋍꄮꑟ,ꉢꇫꆹꀋꀬ,ꀊꆨꀈꇗꋙꀕꄁꅉꄉꑓꁴꅐꆹꏦ,ꀊꆨꑧꇇꈹꅉꄉꆺꀕꂃꆹꏦ.

  ꑲꅉꀋꃀꀋ,ꉢꆏꉚꇁꀋꀬ.

  ꉢꉘꇉꌠꆏ,ꃆꏂꊁꄸꉇ,ꅽꌺꅽꇖꆏꏁꌩꏪꆈꊉꀕꂷꐛꌦꅊꇈꂸ.

  ꀊꋨꄮꆏ,ꉢꆀꇂꉷꃅꇿꇬꐤꑌ,ꀱꇁꆎꂿꇁꂿꂸ.