提示：如果不能看到彝文，请下载和安装彝文字体。

---

ꍔꃚꌤꃅꅇꄜ

——2009ꈎ3ꆪ5ꑍꊯꊪꈭꇩꏤꑭꊂꏓꂱꁧꎁ꒜ꀉꒉꑍꃢꌠꈿꅉꇬ

ꇩꃷꑼꊝꅿ ꊈꏦꀧ
 

ꁧꎁꊈ:

ꀋꃋ，ꉢꇩꃷꑼꎁꃅ，ꃀꀉꒉꈿꌠꏭꍔꃚꌤꃅꅇꄜꂿ，ꌌꍤꇖꅊꇈ，ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꅊꇈ。

ꋍ、ꀱ2008ꈓꌤꃅꐨꉪꏡ

2008ꈓꆹꐋꀋꌡꐯꐋꀋꌡꈓꉬ。ꉪꇩꏤꎆꏣꐧꋦꃅꐩꋊꇬꈨꇁꂿꀋꋻꃅꀉꒉꐯꀉꒉꃅꊋꋠꌠꌋꆀꄜꎟꌠꊝꀐ。ꍏꇩꇭꍣꄈꏃꂠꌠꇂꃴꄉ，ꇩꏤꑭꊂꊿꋅꈁꐥꌠꏓꂱꃅꊋꋠꊝꀒꁨꂵ，ꊋꇤꏡꇤꄉꉈꈽꇈ，꒔ꑞ꒔ꑵꊋꋠꈜꑲꌠꄩꊋꄉ，ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꊌꐨꀊꏀꌠꀉꒉꀊꂾꃅꐥꀐ。

——ꇩꂱꎆꏣꐪꊛꄉꎍꐽꃅꊼꇅꐳꃅꉀꎆꆹꇬꎷ。ꇩꈐꒃꅐꈁꊌꁌꐨ30ꃪꂡꂷꄩꐂ，ꀒꄹꈎꄩ9%ꉀꎆ；ꎊꈬꁌꏤꈁꉬꑟꐨꉀꎆꌠꋎꍅꄉꀐ；ꏱꎆꊌꐨ6.13ꃪꂡꂷꑟ，19.5%ꉀꎆ；ꋚꂷꉬꈎꊛꄉꁦꎆꃅꊌ，ꈀꅐꃷꁨ52850ꂡꏣꑟ，ꐩꋊꃅꇬꊌꐨꀊꂥꐯꀊꂥꅉꑟꌠꅐꇁꀐ。

——ꄺꀱꁉꃑꌠꃹꅼꃅꄹꎆꇰ。ꏱꎆꇗꏸ、ꎆꒉꎆꇁ、ꁌꏤ、ꏲꑘꏲꂠꑠꀋꂿ꒧ꁁꏯꌋꆀꀋꉬꀋꉆꊨꊭꇬꄺꀱꌠꊌꐨꀊꏀꃅꂵꅐꇁ。ꈏꃹꉇꅐꃼꇇꈁꊌꃷꁨ2.56ꃪꂡꂰꑼꑟ，17.8%ꉀꎆ。ꃶꐚꃅꉇꉻꃼꇇꃅꊿꈛꎂꃅꎆꇱꌠꀙ924ꀚꂡꂰꑼꑟ。

——ꐧꋦꌤꑘꐳꃅꀻꎆ，ꏓꂱꐥꐨꀒꁨꋍꁘꃅꄻꃪ。ꇓꈓꏦꎫꀊꏀꁦꎆꃅꃅꅍꊌꌠꊻꂷꀙ1113ꀚꃪꑻꑟ；ꇓꈓꏦꎫꀀꊿꊾꂷꐽꏡꃅꌬꉆꌠꊌꐨ15781ꂷꑟ，ꂿꑘꁡꇤꀀꊿꊾꂷꐽꏡꃅꀊꌃꊌꐨ4761ꂷꑟ，ꃶꐚꃅꇬ8.4%ꌋꆀ8%ꉀꎆ。

——ꐊꑷꃅꀋꇰꀋꉈꃅꋌꐛꉮꌸꌠꄘꑣꌠꊋꐛꐨꀉꒉꐯꀉꒉꃅꊌꅜ。ꊋꐛꃅꀙꏢꉪꒀꉼ、ꊾꄣꉪꒀꉼꀞꄻ。ꐛꒆꃅꎹꍏꏃꉹꊿꑌꃅꃴꏹꌠꃅꇫꑟ。

ꊌꐨꋋꈨꆹ，ꉪꊇꍏꇩꐛꐨꐧꋦꉪꏦꈝꃀꇬꄉꑭꁘꀊꏀꏟꈯꀕꑠꁘꐕꎼꆹꌠꌐꉻꉬ，ꀉꇨꐯꀉꇨꃅꇩꏤꑭꊂꊿꋅꈁꐥꌠꏓꂱꊋꋠꄩꊋꌠꀬꅑꐨꌋꆀꊋꃤꀉꇨꃅꑌꇁꀐ，ꋌꊂꉪꊇꐩꋊꀊꏀꈝꃀꍬꄉꐪꊛꄉꑅꅐꊋꆜꄉꁨꉜꄉꂵꌠꇬꈓꊟꊋꊡꎂꀕꌠꉬ。

ꋍꈓꅑꅸꇁꌠ，ꉪꊇꆹꌤꀋꉬꀋꉆꌠꄚꊁꋋꈨꃅ：

（ꋍ）ꋋꇅꃅꁰꈘꃅꉻꒉꎆꏣꏱꁈꋊꍬ，ꊋꈀꑌꃅꄉꎆꏣꎍꐽꊼꇅꐳꃅꀻꎆꆹꇬꎷ

ꉪꊇꎃꊒꃅꉻꒉꋊꐽꌠꃅꍜ、ꀋꉬꀋꉆꅉ、ꊋꃤꇱꐨꌋꆀꐳꇖꐨꌭꈬꄉ，ꎆꏣꎍꐽꊼꇅꐳꃅꀻꎆꆹꇬꎷꌠꇬꊥꎆꌠꏱꁈꏡꁈꋍꋬꈭꌠꏁꌬꄉ，ꌼꇪꐈꐳꌠꃅꒊꃅꇁꇂꃴꄉ，ꏣꀋꑌꃅꇩꏹꎆꒉꎆꇁꎒꐡꌠꀉꇨꃅꄜꎟꌠꊝ，ꊋꇤꄉꋊꐽꌠꂴꂿꐨ、ꄐꊒꐨꌋꆀꇿꋌꐥꐨꀥꇱ。ꈎꐧꇬ，ꇩꏹꊋꀦꌋꆀꋚꂷꁌꏤꀊꂥꅉꎍ、ꋧꃅꇣꄧꎆꏣꉀꎆꐨꀉꇖꇁꌠꐛꐨꇂꃴꄉ，ꎿꋮꃅꄷꃼꇇꉇꅐꐨꌋꆀꎆꏣꁦꎆꌠꀊꅰꐳꃅꀁꋌꊰꇁꃅꐙꌠꅐꇁꌠꇬꉜꄉ，ꋋꇅꃅꉻꒉꋊꐽꌠꂿꃆꀨꇬꄉꌠꋊꄻꌊ“ꎆꏣꎍꐽꊼꇅꐳꃅꀻꎆꆹꇬꎷ，ꎊꈬꁌꏤꉀꄓꇨꌠꋎꍅ”ꌠꃅ，ꄷꀋꁧꄐꊒꐨꐥꌠꏱꎆꇗꏸꎆꒉꎆꇁꏡꁈꈨꏂꄉꌬꀐ。9ꆪꊂꆏ，ꇩꏹꎆꏣꃅꒊꃅꇁꋋꇅꃅꀁꋌꊰꇁꌠꆏ，ꉪꇩꏤꏭꈲꅍꀋꐥꌠꁧꏖꐨꄇꇖꀕꃅꀉꒉꀐ，ꉪꊇꉈꑴꁰꈘꃅꉻꒉꋊꐽꌠꊋꇤꅉꆹꏮꌊꎆꏣꁦꎆꐳꐨꀁꋌꊰꐳꇨꌠꀂꏽꇁ，ꏣꀋꑌꌠꏱꎆꏱꁈꌋꆀꄉꄐꃅꄝꏯꌠꎆꃀꏱꁈꌫꄻꄉ，ꉇꅐꇗꏸꀱꁵꐨꌕꃢꃅꉀꐕ，ꉬꃢꃅꎆꒉꎆꇁꏲꉻꎆꊐꎆꉛꅉꃀꍍꐪꀁꋌꋊꐽ，ꇖꃢꃅꎆꊐꊭꄎꎆꍆꐪꀁꋌꋊꐽ，ꋋꇅꇬꎆꊭꎆꊐꇔꊰꊨꏦꊌꐨꇗꏸꏆ，ꁌꁦꊫꌐꃼꇇꃅꃨꍑꇗꏸꀁꋌꋊꐽ，ꀀꑳꃼꇇꇗꏸꁌꎆꀁꋌꊨ，ꀉꒉꃅꐧꐭꎆꏂ꒧ꉌꒊꎆꉛꌠꊋꁈꄏ。ꇇꋏꐳ、ꇇꋏꊋꑌ、ꏡꁈꇫꊒ、ꌤꃅꏟꈯꀕꌠꇖꐨꇬꉜꄉ，ꐳꐯꐳꃅꀒꁨꋍꁘꃅꈏꇓꈉꐨꍔꐯ、ꎆꏣꁦꎆꊥꎆꌠꏡꁈꊰꐘꄻꅐꇁ，ꐳꐯꐳꃅꃄꌬꇫꑟ；ꐯꊛꄉꎆꒉꎆꇁꌌꄉꎆꏣꀻꎆ、ꑾꌙꋩꍹꇮꑘꁣꀋꐥꃅꀻꎆꌠꊥꎆ、ꑳꇤꅐꇐꃷꎏꁣꀋꐥꃅꀻꎆꌠꊥꎆ、ꍄꑐꐮꈴꌬꈧꍔꐯꌠꌋꆀꉇꉻꃼꇇꎍꐽꃅꉀꎆꇬꎷ、ꃅꅍꁵꌠꎍꐽꌠꇬꊋꁈꄏꌠꑠꏱꁈꏡꁈꄻꅐꇁ，ꐳꃅꀨꄉꅐꑘꋊꍬꏀꄓꇁꌠꄐꐨꏤꄻ。ꏡꁈꋋꈨꆹꎆꏣꏭꀱꅉꇬꐮꄙꐨꑓꅐꎑꌠꆣꄯ、ꉌꊋꀉꇨꃅꁦꎆ、ꂴꄐꄉꌠꎍꐽ、ꎆꏣꎍꐽꊼꇅꐳꃅꀻꎆꇬꎷꌠꇬ，ꂿꄐꉎꀋꐥꃅꋊꇤꅐꇁꀐ。

ꋍꍈꑋꄝꀋꏯꃅ“ꌕꂿꑘ”ꌤꃅꌠꊋꀥꇱ。ꋋꈓꇬꍏꑷꏱꎆꌌ“ꌕꂿꑘ”ꇬꇱꌠ5955ꂡꂷꑟ，ꀒꄹꈎꄩ1637ꀚꂡꂷꁦꎆ，37.9%ꉀꎆ，ꄚꈐꏭꋚꂷꌌꈛꎂꃅꎆꁥꇱ、ꂿꑘꌬꇐꏓꇱꎆꁥꇱ、ꍔꂄꎆꁥꇱ、ꂿ꒧ꏸꐕꌬꇐꃻꄻꎆꁥꇱꎆꀨ1030ꂡꂷꑟ，ꀒꄹꈎꄩꋍꁧꉀꎆ。ꌕꃢꃅꋚꂷꁌꏤꋍꐮꊰꀋꉆꃅꎳꃼꌠꊼꇅꀉꒉꃅꉀꐕ，ꁌꐕꐨꀙ20%ꀚꄩꎆ。ꀋꉬꀋꉆꌠꂿ꒧ꅐꇐꋋꇅꎳꊭꌠꏱꁈꌫꄻ。ꋠꃅꀧꌋꃅꌠꌋꆀꂿ꒧ꁍꑗꈲꒉꋈꄻꌠꊋꀥꇱ，ꂿ꒧ꏓꇱꊪꏽꊋꃤꉀꐕ。ꃮ、ꋌꌬꇐ、ꇌꑍꅐꑘꀻꎆꌠꄏꐓ。ꏱꁈꏁꁈꋋꈨꆏꂿ꒧ꊿꏣꀋꑌꐨꀧꌋꃅꌋꆀꄕꊪꌠ、ꂿ꒧ꅐꇐꀋꂿꑘꌠꇲꁵꏦꀧꌠ、ꂿ꒧ꊿꁦꎆꊌꁁꏯꂿꄐꀋꂿ꒧ꃅꐥꀐ，ꎆꏣꐧꋦꀻꎆꎍꐽꌠꃅꇴꄉꉻꎁꃅꊋꑌꃅꇇꀨꀐ。

ꀋꎪꀋꑴꃅꑴꌅꏀꀺꌠꌋꆀꎆꏣꐛꉻꋊꄻꌠꄹꎆ。ꇩꏤꈆꑪꇮꇐꌐꐘꀉꒉꀊꂾꌠ16ꂷꃄꌬ。ꈴꌗ、ꒆꇐ、ꋦꈭꑠꁁꏯꀊꏀꃅꇩꏤꋉꃆꈯꄜ、ꀋꉬꀋꉆꎖꉚꅉꌋꆀꎆꏂ꒧ꇮꇐꈯꄜꈨꋈꄻ。ꊋꐛꃅꈛꐞꇬꐚꌠꃏꏸ、ꊋꀦꀊꏀꐕꍯ、ꐳꈴꌠꎸꈜꑠꇮꇐꀋꉬꀋꉆꌠꌋꆀꄻꉂꄻꈾꀉꒉꀊꂾꈨꎥꃪꀖꁉꀐ。ꍏꑷꏱꎆꌌꈆꑪꇮꇐꇬꎆ1163ꂡꂷꇱ，16.4%ꉀꎆ。ꄆꈴꄆꅇ、ꃅꈯꏹꈜꉹꑘꑠꏓꀱꄺꀱꇬꑭꁘꀉꒉꁘꍔꎼꆹꀐ。ꐪꊛꄉꅏꊋꊁꊰꌠꇤꇧꎭ，ꋍꈓꌠꄔꄆꀄꊭꌠ1669ꃪꐂꊅꈢꆏꇧꎭ，ꊖꌋꇵꅉꀄꊭꌠ1054ꈚꈢꆏꇧꎭ。ꅉꃀꄻꇐꌋꆀꅉꃀꅐꑘꎆꀨꇱꐨꍔꒉ，ꊋꀦ、ꈭꈜ、ꈲꒉꑠꁁꏯꐘꑘꈨꄻꐛꌋꆀꇬꊎꃄꇰ。ꏟꈯꀕꃅꃄꁕꀻꎆꀑꐱꄐꇐꄹꎆ，ꃄꁕꎆꏣꀻꎆꌠꋮꄮꐨꀉꇨꇁꀐ。

ꀋꎪꀋꑴꃅꊋꏏꍍꋊꌠꌋꆀꒆꉻꋦꈭꀧꌋꃅꌠꌭꈬꇬꎷ。ꍏꑷꏱꎆꎆꃀ423ꂡꂷꁆꄻꄉ，ꊋꏏꋉꃆꀉꒉꊰꐘꌋꆀꋦꈭꄻꇐꐘꑘꑠꋈꄻꌠꄏꐓ。ꇩꏤꑭꊂꇓꈓꋍꑍꌠꍍꒉꋊꄻꄐꐨ1149ꃪꄓꀊꏀꃅꁦꎆ，ꊖꌋꑘꐞꏸꊤꅓꐨ9712ꃪꐂꊅꀊꏀꃅꁦꎆ。ꌗꂓꂷꃅꇬꇩꈐꒃꅐꈁꉬꁌꐨꊋꃹꐨꀒꄹꈎꄩ4.59%ꀁꋌꒊꀐ，ꐈꇐꀑꈉꃷꁨ、ꑍꀑꐊꑘꌗꋊꃷꁨꆏꐯꀋꌡꃅ4.42%ꌋꆀ5.95%ꀁꋌꒊ。ꋋꌕꈎꏓꌗꎼꇁꇬ，ꌗꂓꂷꃅꇬꇩꈐꒃꅐꈁꉬꁌꐨꊋꃹꐨ10.08%ꀁꋌꒊ，ꐈꇐꀑꈉꐨ、ꑍꀑꐊꑘꌗꋊꃷꁨꐯꀋꌡꃅ6.61%ꌋꆀ8.95%ꊨꒊ。ꋠꃅꀱꌩꊪꏜꏿꌠꊌꐨꈫꈈꃅꄉ，ꋌꐛꌩꏪ、ꏾꉰꒊꃀꌕꏢꅐꀦꑠꒆꉻꀧꌋꃅꌠꌋꆀꋈꄻꋉꃆꄹꎆ。ꀋꉬꀋꉆꈴꁕ、ꃄꁕꒉꍍꆀꄴꏮꄐꎖꌠꃄꌬ。《ꍏꇩꃄꀑꃅꑊꐛꐈꌠꊝꌠꏱꁈꌋꆀꃅꐨ》ꇷꐎꄯꒉꄜꃑꀐ。

（ꑍ）ꎆꏣꐧꋦꀻꎆꌠꏓꈴꇲꈴ，ꐊꑷꃅꏓꂱꐥꐨꄻꃪꌠꌌꀨꄉꌠꐧꋦꋈꄻꌠꊋꀥꇱ

ꃅꅍꊌꌠꌋꆀꐧꋦꏦꀧꌤꃅꌠꀒꁨꋍꁘꃅꊋꀥꇱ。ꃅꅍꊌꌠꊥꎆ、ꑘꀺꌠꈴꄉꃅꅍꊌꌠꈺꇙꌠꏱꁈꄻꐛꒆ，ꃄꎆꀁꂥꇊꀁꂥꄹꏦꃅꇫꑟ。꒔ꑞ꒔ꐘꐧꋦꄜꏂꀧꌠꉱꑷꐨꊛꄉꍔꀉꐯ，ꇓꈓꏦꎫꌤꃅꊿꅉꀨꃀꌠꀨꎹꄜꏂꀧ、ꅉꀨꆅꉁꆄꄻꄜꏂꀧꊿꆏꐯꀋꌡꃅ1753ꃪꑼꌋꆀ2028ꃪꑼꁦꎆ，ꃅꅍꀋꊌ、ꇮꃅꄉꂷꊂꌸ、ꒆꉘꄜꏂꀧꐊꊿꀋꆏꃅꊛꄉꁦꎆ。ꎆꏂ꒧ꎞꑬꆏꊿꃀꌠꀨꎹꌠꊾꂷꐽꏡꃅꇬꋍꁮꆪꌠꀊꏀꃅꎆꃀ110ꂷꁦꎆ。ꌤꑘꌤꃅꅉꅉꀨꃀꌠꀨꎹꄜꏂꀧꄹꏦꄺꀱꃅꉚꌠꇬꊎꃄꇰ。ꏣꀋꑌꃅꀊꏀꃅꐙꌠꂿꑘꁡꇤꐧꋦꃀꌠꀨꎹꄜꏂꀧꄹꏦꎹꎥꀞꄻ，ꂿ꒧ꊿꇮꃅꌠ、ꃄꅉꎴꃼꇧꎭꌠꂿ꒧ꊿꐧꋦꏦꀧꌤꃅꌠꎍꐽꃅꄹꎆ。ꐊꑷꃅꇓꈓꇓꉈꀀꊿꐥꐨꀁꂥꇊꀁꂥꌠꏦꀧꄹꏦꋈꄻꌠꊋꀥꇱ，ꇇꀨꊌꌠꊿꆏ6619ꃪꑼꑟ。ꋋꇅꃅꊌꐨꊼꇅꀁꑌꊿꁥꌠꌋꆀꄊꑪꌶꌺꏭꐥꐨꁥꇱꌠꁦꎆ。ꀉꒉꃅꀋꉬꀋꉆꃅꅲꇫꇲꄻꊿꈧꌠꈲꏿꎕꏦꐕꀊꂥ。ꏦꀧꃅꐙꌠꀀꑳꋈꄻꌠꌋꆀꑲꆹꇣꆹꅉꇬꄺꀱꐨꊋꇨꇱ，ꉹꁌꊌꐨꀁꂥꌠꀀꑳꊋꋠꌠꃆꂮꊼꇅꆣꄯꄉꀐ。ꂿꑘꁡꇤꊻꂷ4800ꎖꃪꑼꅝꒉꁦꎴꃆꂮꂥꀘ。

ꉙꂘꐤꊰꌠꊥꎆꌠꀻꎆꐨꀊꏀꃅꐥꀐ。ꐊꑷꃅꇓꈓꇓꉈꎆꀋꁵꌠꋭꑘꉙꂘꌠꌫꄻ，ꂿꑘꁡꇤꋭꑘꉙꂘꊬꌠꌶꌺꈁꐥꌠꏭꆏꎆꀋꁵꃅꂘꅍꄯꒉꇲꁵ。ꈯꄔꁮꐚꃅꄷꌶꅉꀀꑳꄺꑣꎕꏦꐕꀊꂥ，ꇩꏤꏱꎆ32.5ꂡꂷꁆꄻꌊꒈꀑꃅꄷꂿꑘꁡꇤꐧꐭꌶꅉꇇꀨꄉꊸꇲꃆꂮꂥꀘ。ꃅꅍꉙꂘꌠꐳꃅꀻꎆ。ꇩꏤꌷꄏꄹꏦꀒꁨꋍꁘꃅꄻꐛꒆ，ꍏꑷꏱꎆ223ꂡꂷꇱ，ꃅꄷꏱꎆꑌꎆꁦꎆꇱꄉ，ꌶꌺꇇꀨꌠ2000ꃪꑼꉇꐂ；ꐧꊐꃅꅍꌶꅉꇬꇓꈓꎆꏣꊋꋠꌠꑱꈐꌋꆀꂿꑘꁡꇤꇬꇁꌠꌶꌺꏭꌷꄏꎆꃀꇲꄻ，ꊾꂷꌠꋍꈓꌠꎆꃀ1500ꂷꁵ，ꌶꅉꇬꌶꌺ90%ꌠꈲꏣꊌ。

ꁬꋌꆰꋌꁦꎴꆄꄻꌠꇬꄺꀱꌠꎍꐽꃅꄹꎆ。ꀊꏀꃅꐙꌠꂿꑘꁡꇤꇷꃅꆅꉚꆄꄻꌠꇬꐊꌠꊻꂷ8.14ꂡꂷ，ꐊꐨ91.5%ꑟ。ꇓꈓꀀꊿꅉꀨꆅꉚꆄꄻꄜꏂꀧꃅꉚꇓꈓꆏꀒꄹꈎ88ꂷꌠꁦꎆꌊ317ꂷꑟ，ꄜꏂꀧꇬꐊꊿꆏ7359ꃪꑼꁦꎆ，ꏓꐯꇯꃅꌗꇬ1.17ꂡꂷꑟ。ꇓꈓꋥꁕꀑꌋꁧꃤꃅꉻꑫꋈꄻꌠꀉꒉꃅꀻꎆꀐ。ꂿꑘꁡꇤꎖꁨꒆꉘꑱꈐꈁꁠꁵꇇꀨꄹꏦꌋꆀꀁꑌꃅꒆꏛꃅꌣꈚꌠꋉꃆꃄꌬꈍꈐꊛꄉꍔꀉꐯ。

ꁱꀕꈯꎟꌤꑘꀻꎆꐳꐯꐳ。ꋍꏅꁱꀕꅉꃀꄻꇐꋈꄻꌠꊋꀥꇱꀐ，ꁱꀕꅐꑘꀻꎆꐳꐯꐳ，ꁱꀕꏦꉻꄺꀱꌠꀋꆏꃅꃹꅼꈴ。ꊋꈁꑌꃅꇤꄉꐋꀋꌡꌠ、ꑟꐨꀊꂥꌠꀙꏢꉪꒀꉼ、ꊾꄣꉪꒀꉼꀞꄻꀐ，ꍏꉸꊿꋅꉐꈎꉪꐨꃅꇫꑟ；ꍏꇩꈯꎟꊿꀉꇨꃅꊋꇤꏡꇤꇈ，ꊌꐨꉾꃪꃅꊌꅜ，ꑠꆹꀉꒉꐯꀉꒉꃅꇩꏤꑭꊂꏓꂱꇩꉂꌠꉌꊋꄖꄑꎼꇁꀐ，ꊿꋅꊋꏓꊋꋧꐨꀊꅰꃅꀉꇨꇁꀐ。

ꋯꁦꏦꃤꄹꏦꋈꄻꌠꐪꊛꄉꊋꀥꇱ。ꅉꂫꊐꌠꋯꁦꄹꏦꀒꁨꋍꁘꃅꄻꐛꒆ。ꏦꃤꈴꄉꌅꈌꌬꌠꃹꅼꃅꄹꎆ。ꇩꃷꑼꄜꌊꇩꏤꑭꊂꏓꄊꎮꊈꉼꁳꐧꋦꄜꏂꀧꏦꃤ、ꃄꇙꄙꉮꌸꊨꌠꏦꃤꑠꏦꃤꇖꑘ8ꐘꍤꇖꀐ，ꏲꑘꏦꃤꄹꏦ30ꐘꏤꄻꅀꄺꀱꀐ。ꐊꑷꃅꍔꃚꈴꌗꄇꄜꋊꃷꋪꌫꄻ。ꐧꋦꋬꂻꐏꁇꋎꍅꉻꑫꋈꄻꌠꊋꀥꇱ，ꁷꐞꌠꏭꁏ、ꇷꌾꌠꏭꁏꃅꉈꈽꌠꍔꂵ，ꇩꏤꋬꂻꌠꌋꆀꐧꋦ꒧ꒃꌠꀧꌋꃅꀐ。ꊿꋅ、ꑇꇐꂘꃅ、ꇩꉈꃺꑌꌤꃆꌤꃅꌠꀒꁨꋍꁘꃅꊋꀥꇱꀐ。

（ꌕ）ꏣꀋꑌꃅꄺꀱꁉꃑꌠꄹꎆ，ꎆꏣꐧꋦꀻꎆꌠꎁꃅꍄꑐꊋꃤꌋꆀꇘꊋꀊꏀꌠꄻꇬꇯ

ꇩꃷꑼꏲꉻꄺꀱꌠꀑꐱꃅꃅꌐ，ꃅꄷꏲꉻꄺꀱꌠꑌꎍꐽꃅꄹꎆ。ꂿꑘꁡꇤꏓꇱꄺꀱꌠꊛꄉꃹꅼꈴ，ꋍꉻꌩꏪꌅꈌꄹꏦꄺꀱꌠꐊꑷꃅꃅꑽ。ꇩꁨꎆꏂ꒧ꄺꀱꌠꀋꆏꃅꃹꅼꈴ。ꍏꇩꂿꑘꑴꉴꌋꆀꇩꏤꀖꁉꑴꉴꇴꍆꄹꏦꄺꀱꌠꁣꀋꐥꃅꁨꆹ。ꀊꏀꌠꎆꏂ꒧ꈁꊌꇗꏸꏦꃤꃄꌬ，ꈐꉈꎆꎆꏂ꒧ꌋꆀꊨꏦꑳꇤꁨꇐꇗꏸꎴꄹꏦꏓꋍꃱꃅꄉ。ꀉꑌꈎꇕꄟꌠꌬꉆꇓꋌꁌꏤꌋꆀꇗꏸꁌꄺꀱꌠꁣꀋꐥꃅꏤꄻꅐꇁ。ꁬꋌꆰꋌꁦꎴꆄꄻꏦꉻꄺꀱꄐꁈꏤꄻꄷꀋꁧꄇꄜꋊꄉꉉꐨꅱꄻ。ꏦꉻꉺꏦꏀꀺꌠꆏꀊꉗꃅꀻꎆꌠꎁꃅꅉꃀꈫꈈꌠꌆꄻꄉꀐ。

ꉇꉻꏭꁉꃑꌠꑟꐨꊛꄉꐕꀊꂥ。ꊋꀉꒉꃅꇤꄉꊇꁧꈴꄉꊋꐛꌋꆀꉇꅐꃷꎏꀉꑌꑵꈴꌠꄐꇐꃄꌬ。ꈆꑪꇮꇐꈴꄉꃼꇇꉀꎆꏀꀺꅉꁍꌋꆀꁧꃤꃅꉇꀧꌠꅉꁍꋈꄻꌠꊋꀥꇱ，ꑴꌅꅐꇐꂓꋦꌠꌋꆀꑴꌅꌧꇐꅐꌅꅐꇐꉇꅐꌠꊋꁈꄏ。ꁥꄻꃼꇇꏱꁈꉻꑫꄻꐛꒆ。ꎍꐽꃅꁧꃤꃅꑘꉇꉻꁉꃑꌠꍔꒉ，ꉇꉻꃼꇇꃅꊿꎆꀨꇱꃅꍜꄐꏁꌠꊋꀥꇱ。ꀊꏀꌠꉇꉻꇮꇐꇶꃅꌐꐘꎆꃀꏓꄻꐛ，ꉇꉻꏭꀧꃅꋉꃆꏲꂠꃷꋪꄜꃑ，ꉇꉻꏭꑘꃅꇶꃅꏲꂠꏦꉻꎵꄻ。ꏣꀋꑌꃅꉇꄅꊋꀦꅐꇐꇁꀦꇶꃅꌠꄹꎆ，ꎆꏂꑘ“ꉇꅐꁧ”ꌠꑭꁘꐳꃅꐕ，ꉇꉻꇇꀨꌠꀒꁨꋍꁘꃅꍔꒉ。ꄿꐨꃼꇇꃄꅉꋈꄻ、ꎆꏣꃼꇇꃅꐋꀨꀋꉬꀋꉆꌠꌋꆀꐯꉇ、ꇩꏤꀻꎆꇰꌠꌋꆀꐯꈲꇶꃅꌠꊌꐨꀊꏀꃅꐥꀐ。

ꁧꎁꊈ！

ꀋꉊꄻꈎ5ꆪ12ꑍ，ꉪꇩꏤꆏꋧꃅꃅꋌꇰꌠꊉꍧꀋꇰꀋꉈꃅꃄꇙꌠꅐꀐ。ꄈꍏꑷ、ꇩꃷꑼꀉꇨꃅꏃꂠꌠꇂꃴꄉ，ꇩꏤꑭꊂꊿꋅꈁꐥꌠꏓꂱꈜꀕꇈꉮꌸꃅꈋꏓꂱꆏꊿꃅꉌꏓꋍꂷꃅ、ꋍꏅꊋꏓꇓꉼꐛ，ꏓꂱꂽꑼꀑꇬꀋꑴ、ꐂꂴꉆꄉ，ꉪꇩꏤꐩꋊꀂꏽꇬꈭꋏꐳꐯꐳꌠ、ꄕꊪꑭꊂꀊꐯꐯꀊꐯꌠ、ꊋꇱꐨꀉꒉꐯꀉꒉꌠꃄꇙꄙꉮꌸꈭꋏꌠꃅꀐ。ꉪꊇꆏꊿꀑꇬꈭꋏꌠꌌꀨꇬꄉꇬꎷ，ꈥꇤꅐꌠꇬꄉꈭꋏꎼꇁꌠꊿ8.4ꃪꑼ。ꐳꐯꐳꃅꅉꃀꄻꇐꄺꂡ，ꁰꈘꃅꄤꏤꎭꒉꋍꎿꃝꀺꄻꇧꎭꇈ，ꊁꅑꉮꐪꀉꆈꌠꅐꌠꋒꇧꎭꀐ；ꊋꈁꑌꃅꇤꄉꇵꆅꄴꏮꌠꌤꃅ，ꉮꀉꒉꃅꅐꊂꇵꆅꀉꒉꌠꀋꐥꌠꃅꇫꑟꀐ。ꍏꑷꏱꎆꆏꉮꌸꈭꋏꎆ384ꂡꂷꌋꆀꋈꀱꄺꀱꎆꃀ740ꂡꂷꁆꄻ，ꐳꐯꐳꃅꉮꌸꃅꄷꇇꀨꌠꏱꁈꏁꁈꋍꋬꈥꌠꏤꄻꅐꇁ。ꏣꀋꑌꃅꐮꊒꄉꇇꀨꇇꄻ。ꐧꋦ꒔ꑞꋌꁁꏯꂅꈿꄉꎆꅐꋚꅐ，ꑣꇤꃺꑌ、ꉪꂱꃺꑌ、ꄠꃪꃺꑌꌋꆀꉇꄅꀀꉸꊿꉌꊨꉂꇱ，ꇩꏹꐧꋦꇇꀨꇇꄻꄉ，ꉮꌸꄙꑣꌠꊋꃤꅉꁮꑖꀋꉬꌠꐛꀐ。ꎭꏿꅦꈠꃅꃄꇙꄙꉮꌸꈭꋏꌠꃅꉈꈽꅉꇬ，ꀋꃷꎵꌠꊽꉌꐡꑓꐡ、ꉌꑟꈻꇗꀕꌠꌳꈄꃅꐨꅐꇁꀐ，ꋒꐯꋒꃅꍏꇩꏓꂱꈌꀋꊰ、ꑴꇨꊋꑌꌠꊿꋅꇰꀋ꒜ꌠꉌꊈꄜꅐꇁꀐ，ꁧꉼꇉꉺꌠꎔꇁꃨꌠꐩꋊꏂꀨꁰꄻꎻꇁꀐ。

ꋌꃀꋍꈓꊌꐨꆹꈝꐮꌠꀋꉬ。ꋋꆹꐋꀨꃛꏢꄧꌌꊝꎻꏹꃅꄉꌠꄈꍏꑷꃅꇴꄉꉻꀉꒉꌠꏓꏲ、ꎃꊒꃅꏃꂠꌠꄽꂫꊌꐨꉬ，ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꉌꂵꋍꂷꉌꊋꋍꏢ、ꋯꑌꄉꉈꈽꌠꄽꂫꊌꐨꉬ。ꄚꇬꆏ，ꉢꇩꃷꑼꎁꃅ，ꇩꏤꑭꊂꊿꋅꈁꐥꌠꏓꂱꏭ，ꋯꁦꄈꀾꈁꐥꌠ、ꏓꂱꏓꉻꈁꐥꌠꌋꆀ꒔ꑞꋌꁁꏯꊿꂓꋦꌠꏭ，ꃶꐚꀕꃅꈀꎭꀕꀐ！ꑣꇤꏲꑘꇣꋲꏱꅉꐎꃺꑌ、ꉪꂱꏲꑘꇣꋲꏱꅉꐎꃺꑌ、ꄠꃪꃺꑌꌋꆀꉇꄅꀀꉸꊿꏭ，ꃶꐚꀕꃅꈀꎭꀕꀐ！ꍏꇩꐛꏀꈴꋈꄻꌠꏭꉈꇬꌋꆀꊋꁈꄏꌠꇩꏤꈁꐥꌠꍔꃚ、ꇩꏹꎀꍹꌋꆀꇩꏤꈁꐥꌠꐋꀨꏭ，ꃶꐚꀕꃅꈀꎭꀕꀐ！

ꊌꐨꐥꌠꏚꍆꈭꐨ，ꉈꑴꏸꐚꉜꐚꌶꌠꆏ，ꉪꊇꂾꆽꆹꋋꃀꐥꀋꋻꌠꊋꋠꐨꌋꆀꋓꎭꅍꐥꌦ。ꋍꆏꇩꏹꎆꒉꎆꇁꎒꐡꌠꇬꊎꁮꁘꇰꌦ、ꄽꂫꅉꇬꀋꑟꌦ。ꋧꃅꃷꎏꈉꇖꐨꊛꄉꀁꋌꒊꇰ，ꋧꃅꇣꄧꃅꈳꎆꃛꍕꆹꐨꄇꇖꀕ，ꃼꇇꀧꌋꃅꉪꏦꇫꄓꇁꌦ，ꉇꉻꎆꏣꋦꈭꀊꅰꃛꊸ，ꊨꀋꄅꌠꐊꊈꄇꇖꀕꃅꁦꎆ。ꑍꆏꋧꃅꎆꒉꎆꇁꎒꐡꌠꇱꁧꏖꄉ，ꎆꏣꁦꎆꐳꐨꊛꄉꀁꋌꊰꌠꆏ,ꃅꇴꄉꉻꁧꏖꌠꐮꄙꐨꀋꉬꀋꉆꌠꐛꀐ。ꉹꑘꋍꈨꅐꐨꁦꎆꋒ，ꎆꏂ꒧ꋍꈨꀰꏢꊋꋠ，ꃅꅍꊌꌠꃆꂮꃛꐯꃛ，ꏱꎆꊌꐨꊨꌬꐨꁦꎆꌠꐊꊈꀉꑌ，ꂿ꒧ꎍꐽꃅꀻꎆ、ꂿꑘꊿꊛꄉꁦꎆꊌꇬꊋꋠꅍꀉꒉ。ꌕꆏꀊꉗꃅꉪꇩꏤꎆꏣꑴꀋꅑꃅꀻꎆꌠꏦꉻꐨ、ꐛꉻꐨꐥꌠꐮꄙꌠꄡꇗꇫꐥꑴꌦ，ꋍꈨꆹꄡꇗꑓꅐꎑꌦ。ꌬꈧꈉꐨꀋꇎ，ꅐꑘꌕꉹꀕꌠꀻꎆꌠꊁꊰ，ꑴꌅꏀꀺꄐꊋꀊꀋꇨ，ꊋꀦꅐꀦꃸꄻꐨꀉꑌꇨ，ꋦꈭꍍꆀꇨ，ꇓꈓꇓꉈ、ꏱꁕꀻꎆꐮꍣꐨꄡꇗꇬꊎꍔꐯꑴꌦ。ꇖꆏꏓꂱꉹꁌꂱꑱꈲꏣꇬꑌꑲꎍꌠꌤꃆꑠꈨꊇꅉꃅꆣꄯꎼꀋꇁꌦ，ꐧꋦꏦꀧ、ꂘꑘ、ꆅꉁꆄꄻ、ꊌꐨꁷꄻ、ꐧꋦꋬꂻꑠꁁꏯꇬꄡꇗꌌꂥꀘꄻꅐꌠꌤꃆꀉꑌꃅꐥ。ꉬꆏꃷꎏꐥꀹꋊꍬꃅꀋꐛ，ꃷꎏꍞꏲꌠꌋꆀꏦꌬꑞꅉꀋꑟ，ꐧꋦꉌꒊꉻꑫꄻꐛꀋꒆ。ꋠꇐꉮꀋꐥꌤꐘꌋꆀꋬꂻꒃꅐꌤꆿꀉꒉꀊꂾꃅꇬꊎꅐꇬꎷꄉ，ꏓꂱꉹꁌꀑꇬꁨꇐꄉꎆꋌꎼꀉꒉꀊꂾꃅꁮꑋꄉ，ꑗꉘꆏꃹꅼꐯꃹꅼꀐ。

ꉪꊇꀋꎪꃅꃹꅼꃅꇩꏹꇩꈐꎆꏣꃅꒊꃅꇁꊋꋠꐨꌋꆀꌼꇪꐨꌧꋒꄉ，ꎒꐡꉪꐨꌋꆀꐒꊀꉪꐨꀉꇨꃅꐥꇁ，ꋒꐯꋒꃅꈲꏣꐥꌠꇎꏦꌫꄻꄉ，ꏣꀋꑌꃅ꒔ꑞ꒔ꑵꊋꋠꌠꇬꊝ，ꊋꇤꄉ꒔ꑞ꒔ꐘꌤꃅꋒ，ꈍꃅꑌꏓꂱꉪꏭꉘꇉꌠꌋꆀꊋꁠꌠꇬꏪꀋꁙꌶ。
ꑍ、2009ꈎꌤꃅꀑꐱꄐꐨ

ꎼꈎꆹ“ꊯꊪꉬ”ꄐꎖꃄꌬꌠꀋꉬꀋꉆꑠꈓꉬ，ꉈꑴꃅꋊꀊꏀꊬꌠꃹꆹꊂꅑꅸꇁꌠꉪꇩꏤꎆꏣꀻꎆꌠꇬꊋꋠꐯꊋꋠꑠꈓꑌꉬꄉ，ꄺꀱꀻꎆꎍꐽꌠꂿꃆꆏꀉꇖꐯꀉꇖꌠꉬ。

ꇩꏹꇩꈐꃅꒊꃅꇁꏓꇱꄉꉜꄻ，ꉪꇩꏤꆏꄡꇗꄐꇐꏤꁈꊜꋽꄮꀋꂿꑘꑠꊭꇬꎍꑴꌦ。ꋓꎭꌠꌋꆀꊜꋽꌠꐯꇯꐥ，ꊋꋠꌠꌋꆀꉘꇉꌠꐯꇯꐥ。ꉪꇩꏤꎆꏣꐧꋦꀻꎆꌠꀑꐱꐛꐨꌋꆀꀊꉗꃅꉾꌠꁁꏯꉜꄉꆹꌠꆏꄺꀱꅍꀋꐥꌠꉬ。ꉪꊇꆹꇯꍝꃅꉌꊋꑌ、ꇎꏦꐥ、ꄐꊋꐥꄉꊋꋠꅍꆼꑣꇧꎭꄉ，ꋓꎭꌠꄩꊋꐛꄎꌠꉬ。ꉪꊇꉌꊋꌋꆀꊋꃤꆹ，ꍏꑷꇬꃅꒊꃅꇁꇬꈆꑪꃅꏤꇽꌠꌋꆀꎃꊒꌠꌭꈬꄉꇬꅐꇁꌠꉬ；ꏤꄻꄷꀋꁧꌌꃄꌬꄉꋓꎭꌠꇬꊝ、ꑓꏮꀊꉗꀊꎴꌠꇬꉜꄉꏱꁈꋍꋬꈭꃅꐙꌠꏁꁈꌠꇬꄉꅐꇁꌠ；ꇮꑘꈴ、ꇓꈓꈴꐳꃅꄹꎆꅉꇬꅉꃀꉁꈾꋈꄻ、ꅐꑘꐛꉻꌋꆀꌬꈧꐛꉻꊐꐕ、ꋦꈭꀧꌋꃅ、ꒆꉻꋈꄻꌠꌋꆀꐧꋦꌤꑘꀻꎆꑠꁁꏯꈉꐨꀉꒉꀊꂾꌠꇬꄉꅐꇁꌠ；ꎆꃀꆿꂷꇎꃅꐥ、ꑘꃅꊋꃤꅐꀦꌐꀋꉆꌠꐊꊈꑠꄏꐓꅉꇬꄉꅐꇁꌠ；ꏭꌬꎍꐽꌠꎆꒉꎆꇁꉻꑫ、ꍄꑐꊋꃤꀉꇨꌠ꒔ꑞ꒔ꉹꎆꏂ꒧ꌋꆀꍕꎇꉆꌠꉻꒉꋊꐽꏱꁈꇬꄉꅐꇁꌠ；ꄺꀱꁉꃑ30ꈎꐛꌠꐥꇐ、ꈆꑪꇮꇐꅉꃀꌋꆀꏦꉻꇎꏦꇬꄉꅐꇁꌠ；ꊋꏓꊋꋧꄉꌤꀉꒉꌠꀞꌠꍔꍞꌋꆀꄹꏦꂱꎆꅑꐨ、ꐮꄮꋬꂻꌠꐧꋦꋦꈭꌋꆀꇩꏤꑭꊂꐰꉎꃅꈆꑪꃅꀻꎆꊥꎆꌠꏣꀋꑌꐨ、ꀹꄻꐨꇬꄉꅐꇁꌠ；ꍏꉸꊿꋅꀉꇨꉀꍠꀋꄐ、ꊋꑇꊋꆜꃅꉈꈽꀬꌠꉌꊈꊋꃤꇰꀋ꒜ꌠꇬꄉꅐꇁꌠ。ꉪꊇꆏꑖꑟꃅꄈꏲꂠꌠꌋꆀꇩꏤꑭꊂꊿꋅꈁꐥꌠꏓꂱꉘꇉꑲꆏ，ꊋꋠꅍꆼꑣꇧꎭꀋꄐꌠꀋꐥꌠ，ꈍꃅꑌꇩꏹꎆꒉꎆꇁꎒꐡꌠꈲꏣꀋꉾꁧꏖꌠꊨꒊꅷꑟꐨꀁꂥꐯꀁꂥꅉꇬꑟꄎ，ꈍꃅꑌꎆꏣꐧꋦꉽꑌꉾꐲꑌꐳꃅꀻꎆꌠꄹꇙꇬꎷꄎꌠꉬ。

ꎼꈎꍔꃚꌤꃅꋒꇬ，ꍏꇩꐛꐨꐧꋦꉪꏦꁈꁧꇰꀋ꒜ꌠꀊꂥꃅꐕꄉ，ꄓꑦꀻꌧꇗꌋꆀ“ꌕꑵꁧꎁ”ꉪꇐꀋꂿꑘꌠꌌꄐꇺꅍꃅꄉ，ꃹꅼꃅꈆꑪꃅꀻꎆꌠꉜꐨꃄꌬꇫꑟ，ꎆꏣꎍꐽꊼꇅꐳꃅꀻꎆꌠꌌꎆꏣꌤꃅꌠꂿꃆꀨꐘꌠꃅꄉ，ꉻꒉꋏꆸꌠꊋꀥꇱꌋꆀꄻꃪ，ꊋꇤꄉꇩꈐꈉꐨꀊꅰꃅꌬꈧꈉꐨꍔꒉ，ꊋꒉꃅꀻꎆꃄꄟꆹꏮ、ꐳꃅꎆꏣꐛꉻꄐꇐꏤꁈꐨꐥꃅꋊꍬ，ꊋꒉꃅꃹꅼꃅꄺꀱ、ꉇꉻꁉꃑꐨꉀꐕ，ꊋꒉꃅꃰꊿꐥꐨꐧꋦꐮꄮꄻꃪꌠꊥꎆ，ꐊꑷꃅꐧꋦꉪꏦꎆꏣꋈꄻ、ꍔꍞꋈꄻ、ꁱꀕꋈꄻ、ꐧꋦꋈꄻꌠꌋꆀꒆꉻꌧꑳꋈꄻꌠꄹꎆ。

ꎼꈎꇩꂱꎆꏣꌋꆀꐧꋦꀻꎆꂴꄐꏤꄉꌠꑞꅉꁻꌐꀋꉬꀋꉆꌠꆏ：ꇩꈐꒃꅐꈁꊌꁌꐨ8％ꀑꂪꉀꎆ，ꎆꏣꐛꉻꀒꁨꋍꁘꃅꃪꈴ；ꇓꈓꏦꎫꄉꃅꅍꎹꁵꀊꏀꃅꁦꎆꌠ900ꃪꑻꈋꉐꑟ，ꇓꈓꏦꎫꁱꄀꄉꌠꃅꅍꀋꊌꐨ4.6％ꈍꈐꇬꄉ；ꇓꈓꇓꉈꀀꊿꊌꐨꎍꐽꃅꉀꎆ；ꇓꈓꀀꊿꌬꈧꁌꏤꈁꉬꑟꐨꉀꎆꐨꀙ4％ꀚꀑꂪꑟ；ꇩꏹꊌꌬꐛꐨꐪꊛꄉꄻꃪ。ꄚꇬꆏꀨꄉꉉꀽꌶꌠꆏ，8％ꀑꂪꑟꌠꇩꈐꒃꅐꈁꊌꁌꐨꉀꎆꑞꅉꁻꌐꄜꎼꇁꌠꆏ，ꀻꎆꌠꈉꐨꌋꆀꇫꅐꇁꏭꐛꌠꌌꏓꇱꄉꉪꏡꀐꌠꉬ。ꉪꊇꊻꂷ13ꂡꑹꐥꌠꀻꎆꇰꌠꇩꏤꑠꂷꇬ，ꇓꈓꇓꉈꃅꅍꎹꁵꌠꍔꒉ，ꇓꈓꀀꊿꊌꐨꁦꎆ，ꐧꋦ꒧ꒃꀧꌋꃅꇬ，ꀋꎪꃅꎆꏣꉀꎆꐳꐨꈨꐥꇬꎷꌶ。ꏱꁈꄐꊒ，ꏡꁈꄐꋭ，ꃄꌬꊋꑌꑲꆏ，ꑞꅉꁻꌐꋌꐘꃅꇫꑟꄎꉆꌠꉬ。

ꎼꈎꍔꃚꌤꃅꋒꇬ，ꀋꎪꃅꄚꊁꏥꏦꋋꈨꌭꈬꋒꌶ：ꋍꆏꈏꇓꈉꐨꍔꐯ、ꉀꎆꐨꀧ。ꎆꏣꉀꎆꐳꐨꀁꋌꊰꇁꐨꆹꏮꌠꌌꉻꒉꋊꐽꀋꂿꑘꐯꀋꂿ꒧ꌠꑞꅉꁻꌐꃅꄉꌠꌭꈬ，ꇩꈐꈉꐨꍔꐯꌠꌌꎆꏣꉀꎆꊥꎆꌠꀊꉗꀊꎴꌠꄐꇐꏤꁈꌐꏦꌋꆀꊇꅉꊋꇤꅉꄉꃅ，ꇿꋌꐥꃅꈉꐨꁦꎆ，ꊋꁧꊨꊭꌠꇬꊋꀥꇱ，ꋒꐯꋒꃅꈏꇓꈉꐨꀊꅰꃅꌬꈧꈉꐨꌌꎆꏣꉀꎆꈺꇙꌠꀨꄉꄐꏁꌠꂿꄐꋊꇤꅐꇁ。ꑍꆏꐛꉻꋊꐽ、ꑟꐨꇬꑟ。ꏟꈯꃅꎆꏣꐛꉻꋊꐽꄹꎆꌠꌋꆀꑴꌅꏀꀺꌠꌌꀻꎆꃄꄟꆹꏮꌠꀨꄉꈢꇓꀖꌠꃅꍜꃅꄉ，ꍅꊋꐛꐈꌊꇘꊋꐛꎻ，ꀋꎪꀋꑴꃅꂴꅑꌠꒃꅐꊋꃤꀧꌋꃅꌋꆀꀻꎆ，ꊁꊰꌠꅐꊋꇤꇧꎭ，ꒃꅐꐊꊈꏓꄻꐯꇯ，ꀻꎆꈥꈉꍔꐯ，ꉀꎆꀧꌠꌋꆀꐛꉻꋊꄻ、ꈲꁧꉀꎆꌠꌌꋍꃱꃅꐙꌠꃅꇫꑟ，ꇩꂱꎆꏣꉻꄜꊇꁧꌋꆀꀻꎆꊋꂫꀉꇨꎻꌠꌭꈬꇬꎷ。ꌕꆏꄺꀱꌠꒃꉇ、ꍄꑐꊋꃤꁦꎆ。ꏟꈯꃅꃹꅼꃅꄺꀱꁉꃑꌠꌌꈆꑪꃅꀻꎆꊥꎆꌠꊇꅉꇘꊋꃅꄉ，ꀒꁨꋍꁘꃅꉪꇐꁌꄝ，ꀉꒉꃅꀋꉬꀋꉆꁁꏯꌋꆀꀋꉬꀋꉆꌠꊨꊭꄺꀱꌠꇬꊋꀥꇱ，ꏦꉻꉺꏦꄙꑲꅍꋊꑣꇧꎭ，ꀹꄻꍄꊋꄖꄑ。ꇖꆏꃰꊿꐥꐨꉜꁨ、ꐮꄮꌠꊥꎆ。ꀊꅰꃅꊋꋠꄮꇬꆏ，ꀊꅰꃅꃰꊿꐥꐨꉜꁨ，ꀊꅰꃅꐧꋦꐮꄮ꒧ꒃꌠꊥꎆꌶ。ꏟꈯꃅꃰꊿꐥꐨꏦꀧꌋꆀꄻꃪꌠꌌꎆꏣꌤꃅꌠꄓꈌꌋꆀꑞꈌꃅꄉꌠꌭꈬꇬꎷ，ꀊꅰꃅꏣꀋꑌꌠꃅꅍꊌꏱꁈꃄꌬ，ꉀꎆꊥꎆꌠꌋꆀꃅꅍꊌꌠꍔꐯ、ꃰꊿꐥꐨꄻꃪꌠꑖꑟꃅꐮꐊꐙꇁꎻꄉ，ꏓꂱꉹꁌꁳꐯꇯꄺꀱꀻꎆꌠꊌꐨꊌꅜꎻ。

ꌕ、2009ꈎꂿꃆꀋꉬꀋꉆꌠ

ꎼꈎꍔꃚꌤꃅꌠꆏ，ꇩꏹꎆꒉꎆꇁꎒꐡꌠꇬꊝ、ꎆꏣꎍꐽꊼꇅꐳꃅꀻꎆꌠꊥꎆꌠꌌꀨꑟꃅꄉ，ꏓꈴꇲꈴ，ꀋꉬꀋꉆꌠꌌꀨꇬꄉ，ꐊꑷꃅꎆꏣꎍꐽꊼꇅꐳꃅꀻꎆꊥꎆꌠꏓꐯꇯꃅꎖꄎꄉꌠꃄꌬ。ꍔꃚꎆꇱꌠꄉꈁꀉꒉꃅꁦꎆ，ꈁꉬꃷꁨ4ꃪꂡꂷꑟꌠꑍꈓꇬꎆꇱꎖꄎꌠꃄꌬ，ꄚꈐꏭꍏꑷꍔꃚꄐꏤꄉꇬꀊꏀꃅ1.18ꃪꂡꂷꁦꎆ，ꐛꉻꃅꐙꌠꇗꏸꊨꒊ，ꇩꈐꈉꐨꍔꐯꌠꃄꌬ；ꀊꐯꈭꃅꅐꑘꉀꄓꄐꎖꋊꐽꌠꃄꌬ，ꇩꂱꎆꏣꉻꄜꋓꅔꊋꃤꐕꀊꂥ；ꊋꀉꒉꃅꇤꄉꑴꌅꏀꀺꌠꊥꎆ，ꈆꑪꇮꇐꌌꄙꄎꌠꊋꀥꇱ，ꀻꎆꊋꂫꀉꇨꇁꎻ；ꀉꒉꃅꐧꋦꏦꀧꑟꐨꐕꀊꂥ，ꇓꈓꇓꉈꃅꅍꊌꌠꍔꒉ，ꐧꋦꌤꑘꀻꎆꌠꊥꎆ。ꄐꎖꈧꌠꌌꀋꉬꀋꉆꃅꄉꃄꌬ，ꎼꈎꆏꀋꉬꀋꉆꃅꄚꊂꏃꁁꏯꈴꄉꌤꃅ：

（ꋍ）ꉻꒉꋊꐽꌠꊋꀥꇱꌋꆀꄺꀱꂠꀱ，ꎆꏣꎍꐽꃅꊼꇅꐳꃅꀻꎆꇬꎷ

ꃅꌒꉪꋬꌠꋊꐽꌐꏦꌭꈬꇬꎷ，ꉻꒉꋊꐽꐛꐈꐨꊝꌠꄐꊋꌋꆀꃶꐚꊌꐨꐕꀊꂥ，ꐳꃅꎆꏣꁦꎆꐨꀁꋌꊰꐨꆽꈎꎼꇁ，ꎆꏣꎍꐽꐳꃅꀻꎆꌠꄉꀧ。

ꏣꀋꑌꌠꏱꎆꏱꁈꃄꌬ。ꋍꆏꀉꒉꃅꍔꃚꌬꐨꁦꎆ，ꋋꆹꈏꇓꈉꐨꍔꒉꇬꑴꇙꐯꑴꇙ、ꈛꎂꐯꈛꎂ、ꇿꋌꐥꐯꐥꌠꏁꁈꉬ。ꎼꈎꏱꎆꊌꌬꊋꋠꌠꐮꆽꄙꐨꀉꇨꃅꑓꅐꎑ。ꋍꁁꏯꆏ，ꎆꏣꁦꎆꐳꐨꉈꑴꄯ、ꎆꏂ꒧ꌋꆀꇓꈓꀀꊿꇗꏸꀵꃤꊨꒊꌠꆹꈍꃅꑌꏱꎆꊌꐨꁦꎆꐳꐨꁳꀁꋌꊰꎻꌠꉬ；ꀉꁁꋍꁁꏯꆏ，ꎆꏣꉀꎆꐨꄹꆷ、ꏓꂱꐥꐨꄻꉾꌋꆀꃹꅼꃅꄺꀱꂯꇬ，ꉈꑴꀉꒉꃅꎆꀨꇱꐨꌋꆀꍔꃚꌫꅐꐨꁦꎆꄻꅐꑴꌦ。ꏱꎆꎴꐨꊨꌬꐨꁦꎆꄉꏓꐛꌠꀋꇎꅉꅋꑣꐛꅹꃅ，ꄐꄉꇬꍏꑷꏱꎆꌬꁏꇔꌠꎆꃀ7500ꂡꂷꁆꄻ，ꀒꄹꈎꄩ5700ꂡꂷꁦꎆ，ꋍꈭꐨꇩꃷꑼꆏꃅꄷꏭꈌꁧꄉꎝꊫꌐ2000ꂡꂷꃑꄻ，ꎆꏲꀯꁳꎃꃅꄉꃑꄻ，ꄸꌜꊐꌠꄐꌗꇬꇱꄉꏱꄻ。ꇩꏤꑭꊂꏱꎆꌬꁏꇔꌠꏓꇱꄉꇬ9500ꂡꂷ，ꇩꈐꒃꅐꈁꊌꁌꐨꍆꁧꆏ3%ꈐꇬꎍ，ꋋꄹꈎꌬꁏꇔꌠꀉꑌꃅꁦꎆꑴꇬ，ꄚꋋꃀꈍꑍꈓꊛꄉꌬꁏꇔꌠꊨꒊꐛꅹꃅ，ꎝꃑꐥꉻꊼꇅꀉꒉ,ꏓꌗꇬꇩꎝꋒꌠꆏꇩꈐꒃꅐꈁꊌꁌꐨꇬ20%ꅶꍯꍆ，ꋋꆹꉪꇩꏤꏓꇱꇩꊋꊪꄽꄐꌠ，ꀑꐱꃅꇬꋬꂻꌠꑌꉬ。ꑍꆏꐛꉻꐨꐥꃅꇗꏸꊨꒊꌠꌫꄻꌋꆀꇗꏸꎆꄺꀱꌠꄹꎆ。ꇗꏸꊨ、ꇗꏸꈪꅀꇗꏸꄂꇔꑠꇶꏦꀉꑌꑵꌬꄉꎆꏂ꒧ꌋꆀꇓꈓꀀꊿꇗꏸꀵꃤꊨꑾꌙꄉ，ꎆꏂ꒧ꎆꀨꇱꌠꌋꆀꇓꈓꀀꊿꌬꈧꌠꊥꎆ，ꉻꐭꎆꏣꍄꑐꌠꊋꀥꇱ。ꀑꐱꃅꎖꌗꇬ，ꎼꈎꐊꑷꃅꁌꎆꇗꏸꇶꏦꆹꏮꌠꌫꄻ，ꏤꄻꅐꇁꀐꌠꐧꐭꎆꏂ꒧、ꑳꇤꁨꇐꌋꆀꁌꁦꊫꌐꃼꇇꃅꃆꂮꐥꌠꇗꏸꎴꈲꊌꌠꌋꆀꉇꅐꇗꏸꈪꁵꑠꁁꏯꏱꁈꃄꌬꇫꑟ，ꉈꑴꏲꑘꌤꑘꃅꐙꌠꎆꎴꌠ100ꐘꇤꇧꎭꌋꆀꆏꄉꌠꐯꇯꑲꆏ，ꎆꏂ꒧ꌋꆀꇓꈓꀀꊿꀵꃤ5000ꂡꂷꊨꑾꌙꉆ。ꌕꆏꏱꎆꌬꐨꐛꉻꉾꃪꈴ。ꐪꊛꄉꀋꉬꀋꉆꁆꏯꎆꀨꇱꌠꍔꒉ，ꏦꇨꃅꎃꐚꃅꐙꌠꌬꐨꋎꍅ，ꊋꇤꄉꏲꑘꀨꊰꊨꒊ。

ꊼꇅꄝꏯꌠꎆꃀꏱꁈꌫꄻ。ꎆꃀꏱꁈꆹꎆꏣꁦꎆꁁꏯꂿꄐꀊꅰꏣꀋꑌꌠꇤꅐꇁ。ꋍꆏꎆꒉꎆꇁꋊꐽꌠꄻꉾ。ꎆꃀꉌꒊꎆꊐꎆꉛꈁꉬꃷꁨꎆꏣꀻꎆꈉꐨꇬꇎꈴꌠꄉꀧ，ꀊꐯꈭꃅꎆꃀꃑꁵꐨ17%ꅶꍯꁦꎆ，ꀊꏀꃅꉌꒊꎆꉛ5ꃪꂡꈋꉐꁦꎆ。ꑍꆏꉌꒊꎆꉛꐛꉻꉾꃪꈴ。ꉌꒊꎆꉛꎆꇱꅉꍞꊟꍤꎖꌋꆀꄐꇺꌠꊋꀥꇱ，“ꌕꂿꑘ”、ꐧꐭꎆꏂ꒧ꑠꊋꁧꊨꊭꇬꎆꒉꎆꇁꄏꐓꌠꍔꒉ，ꃶꐚꃅꎆꏂ꒧ꋍꈨꎆꏓꊋꋠꃆꂮꂥꀘ。ꏦꇨꃅꃹꐨꀊꂥ、ꍍꆀꀉꒉꌠꌋꆀꅐꐨꁦꎆꋒꌠꉹꑘꎆꏂ꒧ꏭꎆꊐꎆꉛꌠꋎꍅ。ꌕꆏꀒꁨꋍꁘꃅꎆꃀꏱꁈꄜꉺꄐꇺꉺꏦꄻꎵꄻ，ꎆꃀꌫꈜꀋꄯꌠꏦꀧ。ꋒꐯꋒꃅ꒔ꑞ꒔ꑵꎆꒉꎆꇁꏲꉻꂴꎆꅑꐨꌋꆀꐛꄟꇣꅐꇁ，ꎆꒉꎆꇁꁧꃤꃅꌠꏀꀺꌋꆀꄻꎆ,ꎆꃀꈉꐨꋭꋽꌠꇎꈴꄉ，ꎆꒉꎆꇁꆏꎆꏣꀻꎆꇬꊥꎆꏓꊋꐛ。ꇖꆏꎆꒉꎆꇁꍞꊟꏱꄻꌠꊋꀥꇱꌋꆀꄻꉾ。꒔ꑞ꒔ꑵꎆꒉꎆꇁꎆꏂ꒧ꐯꇯꀉꇨꃅꃨꆰꐨꏲꂠꌠꊋꀥꇱ，ꃨꆰꏭꊝꌠꊋꃤꀉꇨꎻ。ꉾꃪꃅꎆꒉꎆꇁꏀꀺ、ꎆꒉꎆꇁꁉꃑꌋꆀꎆꒉꎆꇁꍞꊟꏱꄻꌠꃆꂮꀞꄻꋒ。ꊋꀥꇱꄉꎆꃀꇩꉈꐂꄉꏮꈴꌠꍞꎖꌋꆀꏱꄻ，ꎆꒉꎆꇁꎍꐽꌋꆀꋬꂻꌠꐏꁇ。

ꅐꑘ、ꃼꇇ、ꃄꅉ、ꎆꇱ、ꃅꅍꊌꏱꁈꌋꆀꏱꎆ、ꎆꃀꏱꁈꐮꐊꐨꌋꆀꋮꄮꐨꊋꀥꇱꄉ，ꋊꐽꏓꊋꐛꌶ。

（ꑍ）ꏣꀋꑌꃅꇩꈐꈉꐨꈜꀕꇈꌬꈧꈉꐨꍔꒉ，ꈏꇓꈉꐨꎆꏣꉀꎆꌠꇬꈺꇙꂿꄐꊋꀥꇱ

ꋍꆏꌬꈧꌠꈜꀕꇈꇓꈓꀀꊿꌬꈧꌠꍔꒉ。ꐪꊛꄉꊌꐨꁷꑣꐛꐪꋊꐽ，ꑘꃅꊌꎆꆏꇩꂱꊌꐨꇬꍆꁧꉀꐕ，ꍔꃚꌌꉹꁌꐥꐨꄻꃪ、ꌬꈧꍆꁧꍔꒉꌠꇬꌬꐨꁦꎆꇱ，ꌌꇓꈓꏦꎫꉹꁌꊌꐨꀁꂥꌠꌋꆀꂿꑘꊿꎆꁥꇱꌠꁦꎆ。ꌬꈧꊷꈌꉘꉚ，ꌬꈧꐥꉻꍔꀺ。ꐕꍯꌬꈧꏱꁈꄻꐛꒆ，ꐳꃅꐕꍯꌌꌬꋺꌠꃷꎏꌋꆀꐕꍯꊤꄻꃷꎏꀻꎆ，ꐕꍯꋭꋽꃅꌬꈧꌠꄐꇺꌋꆀꊥꎆ。ꊋꇤꄉꐧꋦꋥꁕꃼꇇꑘ、ꐥꇐꑘ、ꑱꈐꁧꃤꃅꑠꉹꁌꌬꈧꌒꌠꀻꎆ，ꐳꃅꈩꆫꆷꈩꌬꈧꌠꀻꎆ，ꁱꀕꈩꀜ、ꈯꎟꈯꀧꑠꁧꃤꃅꌬꈧꌠꍔꒉ，ꏣꀋꑌꃅꈄꏍꑇꁱꑠꀊꏀꉹꌬꈧꌠꀻꎆ。ꌬꈧꏱꁈꄻꐛꒆ，ꌬꈧꋦꈭꉾꃪꈴ。ꐳꃅ“ꃪꋂꄙꑣ”ꃷꎏꋉꃆꋈꄻ，ꐯꅑꄉꀰꏢꌠꂿꑘꁡꇤꏭꉜꄉꄹꎆ。ꊋꀥꇱꄉꇓꈓꇓꉈꌬꈧꉁꈾꌋꆀꁧꃤꃅꉻꑫꋈꄻ，ꃷꎏꐥꀹꋊꍬ，ꌬꈧꊿꏦꊒꌅꈌꈲꁧꐏꁇ。ꏟꈯꃅꌬꈧꌠꈓꊟꊋꊡꌠꏱꁈꏁꁈꎥꃪꄜꃑꌠꒃꉇ，ꏣꀋꑌꃅꌬꈧꉌꒊꎆꉛꌠꀻꎆ。“ꑱꈐꌬꌠꄆꐕꌌꁡꇤꃷꁧ”、“ꂿ꒧ꏸꐕꌌꁡꇤꃷꁧ”、“ꐕꍯ、ꂿꄬꍯꌌꁡꇤꃷꁧ”ꑠꌤꃅꌊꉾꃪ，ꍏꑷꏱꎆꎆꁥꇱꌠ400ꂡꂷꌌꉾꃅꌬꇮꃅꌬꄉ，ꎆꏂ꒧ꃷꐨꁦꎆ、ꂿꑘꊿꈲꏣꊌꎻ。

ꑍꆏꎆꇱꐳꃅꉀꎆꌠꌋꆀꎆꇱꐛꉻꉾꃪꈴꌠꌭꈬ。ꎼꈎꍏꑷꍔꃚꎆꇱꈁꉬꃷꁨ9080ꂡꂷ，ꀋꉬꀋꉆꌠꌌꏦꀧꐨꐥꌠꀀꑳ、ꂘꑘ、ꁦꎴꆄꄻ、ꁱꀕꑠꉹꁌꐥꐨꋉꃆꋈꄻ，ꊋꀦꏏꋦꈭꀧꌋꃅꌋꆀꒆꉻꋈꄻ，ꇮꇐꄺꀱꌋꆀꈆꑪꇮꇐꏀꀺ，ꍯꃅꈲꒉ、ꎸꈜ、ꐳꈴꄇꈜꑠꀨꎍꌠꅉꃀꉁꈾꋈꄻꌋꆀꃄꇙꉮꌸꈭꐨꋈꀱꄺꀱ。ꍔꃚꎆꇱꌠꀋꎪꃅꌌꃨꆰꐨꐥꌠꀋꉬꀋꉆꅉꊨꊭꇬꌬꑲꆀꍑ，ꌌꎆꏣꐧꋦꀻꎆꌠꊋꁧꊨꊭꇬꌬ，ꌌꎃꐚꃅꐙꌠꄻꇱꂡꇱꇮꑘꇬꌬꀋꉆ。ꏟꈯꃅꐧꋦꎆꇱꌠꈓꊟꊋꊡꏃꈻꌠꒇꁵꏱꁈꎥꃪꄉꄜꃑꌠꒃꉇ。ꈴꌗꄜꃑ、ꀉꇨꃅꏃꈻꌠꇬꈴꄉ，ꐧꋦꎆꀨꎆꇱꌠꌌꇩꏤꅐꑘꏱꁈꇬꄐꊒꌠꏭꉜꄉꇱꌠꊋꁈꄏ，ꎆꏂ꒧ꁦꎆꃅꎥꃪꁧꀿꌠꌋꆀꇮꇐꄺꀱꌠꇬꎆꇱꌠꈓꊟꊋꊡ。ꉪꊇꎆꃀꋍꉐꋑꀋꋒꏓꂱꄷꇁꌠ，ꀋꎪꃅꏓꂱꁧꎁꃅꉪꌶ。ꋉꃆꋈꄻꈁꐥꌠꃅꉐꈎꌤꃆꏂ、ꊇꁧꀨꇬꎍꌠꌭꈬꄉ，ꁨꇐꁌꒉꄣꅼꌠꍸꊂꋊꌺꇖꁵꇈ。

ꌕꆏꑳꇤꃷꎏꎍꐽꁣꀋꐥꃅꀻꎆꌠꊥꎆ。ꀊꅰꃅꏣꀋꑌꃅꇿꋌꐥꌠꏱꁈꏂꁈꏁꌬꄉ，ꃷꎏꉌꒊꌋꆀꉘꇉꐨ꒧ꒃ，ꑳꇤꎆꇱꌠ꒧ꒃ，ꑳꇤꅐꑘꎍꐽꊱꁨꃅꀻꎆꌠꄹꇙ。ꐳꃅꏦꀧꐨꐥꌠꀀꑳꊥꎆꌠꏱꁈꏁꁈꃅꇫꑟꌋꆀꄻꐛꒆ，ꅔꈿꄉꃅꈎꌕꈎꌌ，750ꃪꁯꇓꈓꇬꊌꐨꀁꂥꀀꑳꊋꋠꌠꑱꈐꌋꆀ240ꃪꁯꌩꏪ、ꃄꇽꅉ、ꊖꌋꅣꅉꑠꑲꆹꇣꆹꐛꅉꀀꊿꑳꀀꌤꃆꂥꀘ。ꎼꈎꍏꑷꏱꎆꆹꏦꀧꐨꀀꑳꋉꃆꎆꀨ493ꂡꂷꌬꂿꄷꄐꏤꄉ，ꁌꆦꊤꀀꑳꋈꄻꌠꌋꆀꑲꆹꇣꆹꐛꅉꄺꀱꌠꇬꎆꇱꊋꁈꄏꊋꃤꀉꇨꃅꏂꌠꉬ，ꋭꋽꃅꈯꄔꁮꐚꃅꄷꎆꁥꇱꎕꏦꉀꐕ，ꂿꑘꁡꇤꃨꆰꑳꄺꀱꉚꅉꍔꒉ，ꀁꑌꊿꋅꃅꄷꏭꆦꎆꆫꊿꍆꀀꋉꃆꃄꌬ。ꇎꏦꐤꅉꈨꌋꌊꎖꉚꅉꃅꄉ，ꀀꑳꉻꎆꀋꌬꃅꇫꎍꄹꁆꌌꁌꏤꈝꐮꋌꌸꌠꀀꑳꋈꄻꅉꇬꁥꇱ。ꏣꀋꑌꃅꋍꏅꊤꁵꀀꑳꀻꎆ。ꇓꈓꀀꊿꊨꏦꀀꑳꌋꆀꄻꃪꐨꀀꑳꃼꇬꉌꒊꎆꉛ、ꇗꏸꎴꌠꌋꆀꀉꁁꏱꁈꑠꊋꁈꄏꌠꃅꇫꑟ。ꇎꏦꇬꑟꌠꎃꐚꊨꏦꀀꑳꑍꂷꂶꌠꃼꊿꆏ，ꌌꂴꃢꌠꎆꉛꄉꎃꐚꊨꏦꀀꑳꃼꌠꌡꃅꒇꁵꏱꁈꃄꌬ；ꀀꑳꏮꏆꊨꊭꇬꃼꃷꇗꏸꆏ，ꃅꈎꏤꄟꇬꉜꄉꐯꀋꌡꃅꇗꏸꊨꏆꏱꁈꌬ。ꎃꐚꃷꇐꀀꑳꌬꈧꌋꆀꇲꁵꌠꊥꎆ，ꀉꇨꃅꐧꀠꀄꊭꉹꌠ、ꁌꏤꐧꀠꀁꂥꌠꎃꐚꃷꇐꑳꋈꄻꌠꉌꒊꎆꉛꌠꊋꁈꄏ。ꇤꐳꃅꀀꋺꑳꃷꎏꌋꆀꀀꑳꊤꁵꃷꎏꀻꎆ。꒔ꑞ꒔ꈚꂱꑱꃅꄷꉜꄉꑳꇤꃷꎏꎍꐽꌋꆀꀻꎆꌠꈓꊟꊋꊡꄐꏁ，ꊋꀥꇱꄉꀀꑳꃷꎏꁷꐞꃅꏱꄻ。ꐪꊛꄉꑳꇤꃷꎏꐥꀹꋊꐽ，ꃼꇇꃅꌠꋊꍬ。ꇓꈓꇁꌠꂿꑘꊿꇮꃅꌠꀀꑳꊋꋠꐨꂥꀘ。ꃹꅼꃅꇓꈓꀀꑳꄹꏦꄺꀱ，ꇓꈓꀀꊿꀉꑌꏠꊐꌠꀀꑳꈉꐨꇎꈴ，ꊋꇤꄉꀀꌠꀀꑳꐥꌠꑞꅉꁻꌐꃅꇫꑟ。

ꇖꆏꐳꃅꃄꇙꉮꌸꅉꋈꀱꄺꀱꌠꄹꎆ。ꏟꈯꃅꐊꑷꃅꉮꌸꈭꐨꋈꀱꄺꀱꌠꉻꄜꄐꎖꌠꒃꉇ，ꍏꑷꏱꎆꎼꈎꉈꑴꉮꌸꈭꐨꋈꀱꄺꀱꎆꀨ1300ꂡꂷꁆꄻ。ꐳꃅꉮꌸꅉꇓꈓꇓꉈꀀꊿꀀꑳꋈꀱꄺꀱ，ꄺꑣꈫꈈꌠꌋꆀꀊꏀꋈꄻꌠꐯꇯꄉꃅ。ꀑꐱꃅꉮꌸꄉꎒꐡꌋꆀꀉꇨꃅꆿꐛꌠꂿꑘꑳꋈꀱꄺꀱꂿꃆꃅꌐ，ꉮꌸꉹꁌꎼꈎꈎꂫꂿꃅꑳꀊꏀꀀꎻꌠꄉꀧ。ꐳꃅꃄꇙꉮꌸꌶꅉꋈꀱꄺꀱ，ꎼꈎꈎꂫꇬꌶꌺꀙ95%ꀚꈋꉐꐯꇯꐥꍂꃅꐙꌠꌶꑳꇬꄉꁱꂷꌷꌠꄉꀧ。ꐪꊛꄉꈭꈜ、ꅇꈴ、ꊋꀦ、ꈲꒉꑠꅉꃀꉁꈾꋈꀱꄺꀱꌠꄹꎆ。ꃄꊈꉮꄻꄴꏮ、ꒆꉻꄺꑣ、ꋦꈭꋊꐽꌋꆀꋠꃅꆿꐛꌠꂾꀱꑠꉾꃅꃅ。ꀨꎍꅐꑘꀋꉬꀋꉆꌠꋊꐽꄖꄑꄐꎖꌠꃄꌬꌠꏓꇱꄉ，ꐳꃅꉮꌸꅉꅐꑘꋈꀱꄺꀱꌋꆀꀻꎆ。ꐪꊛꄉꐮꊒꄉꇇꀨꌋꆀꌐꐘꇇꀨꌠꃅꋒ，ꉮꌸꈭꐨꋈꀱꄺꀱꎆꃀꌋꆀꎊꇐꏲꋒꌬꋒꌶ。ꉮꌸꈭꐨꋈꀱꄺꀱꌠꊋꃤꀉꒉꃅꇱ，ꃅꐨꇤꐳ，ꅔꈿꄉꑍꈓꈋꈐꃅꂴꌕꈎꄐꄉꌠꑞꅉꁻꌐꀑꐱꃅꃅꌐ，ꉮꌸꅉꏓꂱꁳꏛꃅꀊꅰꃅꐥꌒꄻꌒꌠꐥꐨꊌꎻ。

（ꌕ）ꂿꑘꅉꃀꉆꈉꄻꈫꈈꌋꆀꊋꀥꇱ，ꂿꑘꎍꐽꃅꀻꎆꌠꌋꆀꂿꑘꊿꀋꆏꃅꁦꎆꊌꌠꊥꎆ

ꎼꈎꀋꉬꀋꉆꌠꌤꉬꐘꒃꉇ：ꋍꆏꎍꐽꃅꋚꂷꒃꅐꌠꀻꎆ。ꃶꐚꃅꊪꏽꃅꊂꎍꐽ，ꊋꇤꄉꌗꂓꋍꑵꒃꅐꌠꉀꐕ，ꐥꑫꐛꉻꉾꃪꈴ，ꇩꏤꑭꊂꀊꏀꃅꁦꎆꌠꋚꂷꄙꂡꏣꒃꅐꊋꃤꋈꄻꌠꄹꎆ。ꑍꆏꃷꎏꈉꐨꌌꄐꏁꃅꌠꂿꑘꐛꉻꋊꍬ。ꂿꑘꅐꇐꒃꅐꀋꂿꑘꌠꀋꇎꌠꊋꁈꄏ，ꂿ꒧ꅐꇐꊇꁧ、ꈲꁧꌋꆀꋓꅔꊋꃤꉀꐕ。ꐳꃅꀊꏀꈭꌠꂿꑘꅐꇐꊋꀯꏱꁕꄐꉻꄐꎖ，ꅐꇐꂱꎆꅑꋌꌬꇐꀻꎆꑠꎆꏣꊪꁧꊋꁈꄏ，ꎍꐽꃅꃮꉘ，ꇌꑍꅐꑘꏀꄓꄐꎖꄉꌠꃄꌬ，ꆫꃆꒉꅐꇐꄉꈁꈴꎕꏦꈴꃅꉾꃪꃅꉘꉚꌠꄹꎆ。ꀉꒉꀊꂾꌠꇙꀕꋦꁧꇵꆅꄴꏮꋎꍅꌠꊋꀥꇱ。ꌕꆏꂿꑘꅉꃀꉁꈾꌋꆀꂿꑘꁡꇤꉹꁌꐥꐨꋉꃆꋈꄻꌠꊋꀥꇱ。ꄉꈁꀉꒉꃅꃄꅉꏱꄻ，ꍯꃅ、ꒉ、ꈜ、ꌩꏓꇱꏱꄻꌠꃅ，ꍯꃅꐧꀠꀁꂥꅐꌠꄺꀱꌠꄹꎆ，ꁍꑗꎕꏦꀊꂥꌠꋈꄻ。ꐳꃅꒉꐧꀠꉹꌠꌋꆀꀨꄉꀄꊭꉹꌠꆐꅑꃨꆰꒉꇉꉮꋊꄻꈬ，ꊋꀥꇱꄉꒉꊐꅉꄺꀱꌋꆀꐭꉹꌠꁍꑗꈲꒉꋈꄻ。ꑎꄹꈎꈎꂫꇬꑟꇬꆏ，ꀑꐱꃅꇩꏤꑭꊂꑣꍔꌋꆀꁭꅐꈯꄔꃅꄷꇎꏦꐥꌠꐛꒆꋂꈧꌠꈝꃀꄻꇫꑟ，ꁮꐚꃅꄷꇎꏦꐥꌠꐛꒆꋂꈧꌠꄇꈜꄻꈴ。ꉈꑴꊻꂷ6000ꃪꑻꒉꅝꁦꎴꌠꌤꃆꂥꀘ，ꑭꉘꐞꌗꌬꌠꑱꁯ500ꃪꁭꁦꎆ，ꐪꊛꄉꂿꑘꁡꇤꄆꏍꈄ、ꒀꍔꅇꈴꌋꆀꐧꋦꌤꑘꑠꅉꃀꋈꄻꌠꊋꀥꇱ。ꇖꆏꈭꈜꀉꑌꃅꈴꄉꂿꑘꊿꊌꐨꁦꎆꌠꊥꎆ。ꊋꒉꃅꐋꀋꌡꌠꐛꏀꂿꑘꀻꎆ，ꂿ꒧ꅐꇐꌃꉾꄻꌠꌋꆀꃷꌠꄏꐓ，ꂿꑘꁡꇤꅐꑘꑍꌕꉹꌠꀻꎆ，ꐳꃅꇓꈓꏦꎫꀄꊭꌠꋈꄻ，ꑤꏱꁕꎆꏣꎼꀉꇨ。ꉬꆏꀉꒉꃅꎭꄏꀖꁉꊋꃤꊋꀥꇱ。ꎼꈎꎭꄏꎕꏦꀊꏀꌠꃄꌬ，ꂿꑘꁡꇤꊌꐨꀂꂥꌠꊻꂷꏭꐊꑷꃅꎭꄏꌠꏱꁈꃄꌬ。ꎕꏦꀊꏀꌠꊾꂷꐽꏡꃅꊌꌠꉀꐕꌊ1196ꂷꑟ，ꎭꄏꌠꉱꑷꐨ4007ꃪꑻꐥ，ꋋꆹꉪꇩꏤꎭꄏꀖꁉꌠꀊꏀꊬꌠꇬꃹꆹꀐꌠꌐꁧꐛꀐ。ꇩꏤꎭꄏꄐꇐꏤꁈꌋꆀꏱꁈꄻꐛꒆ，ꀉꒉꃅꎭꄏꎆꀨꇱ，ꏟꈯꃅꀖꁉꃅꐙꌠꎭꄏꌠꌭꈬꇬꎷ，ꀨꇬꄉꋂꋋꂷꃅꄹꎆ、ꑘꃅꊋꃤꏭꀱꁰꍋ、ꅐꑘꈴꃅꎭꄏꌋꆀꀀꇙꎭꄏꌠꒃꉇꋒꄉ，ꎍꐽꃅꎭꄏꌠꋠꂊꈚꊸꃆꂮꂥꀘꇈꊋꇤꄉꎭꇔꈚꐛꌠꃅꇫꑟꌶ。

ꐊꑷꃅ“ꌕꂿꑘ”ꌤꃅꊋꀥꇱꌠꏡꁈꆏꄚꊁꋋꈨꏂꇫꌶ：ꋍꆏꀊꐯꃅꂿꑘꂿꑘꁡꇤꎆꁦꎆꃅꇱꌶ。ꎼꈎꍏꑷꏱꎆꄐꁆꌊ“ꌕꂿꑘ”ꇬꇱꌠ7161ꂡꂷꄐꄉ，ꀒꄹꈎꄩ1206ꂡꂷꁦꎆ。ꀉꒉꃅꈯꄔꁮꐚꃅꄷꂿꑘꁡꇤꉻꈲꐨꐥꌠꐘꑘꋈꄻꌠꎆꁦꎆꃅꇱ，ꑤꌋꆀꑤꈍꐰꄚꃆꂮꐥꌠꎆꃀꋍꋬꈭꃅꁆꄻꌠꈉꐨꇤꇧꎭ。ꋚꂷꒃꅐꏱꁈꏡꁈꆏꋚꅐꅉꀋꉬꀋꉆꌠꏭꉜꄉꎎꌠꊋꁈꄏ，ꀉꒉꃅꋙꅐꅉꑤꀉꒉꌠꀑꐱꐨꐥꃅꆹꏮꁵꌬ、ꎆꐪꈁꁠꁵꌋꆀꋚꂷꅐꑘꋈꄻꐘꑘꄏꐓꌠꊋꃤꇱ。ꑍꆏꊼꇅꀉꒉꃅꋚꂷꀁꂥꐯꀁꂥꃅꎳꃼꌠꁌꏤꉀꐕ，ꂿꑘꅐꇐꁌꏤꄉꄐꐨꄝꏦꀋꊰꇬꎷ，ꂿꑘꊿꋙꊪꏣꀋꑌꐨꉀꐕꌶ。ꎼꈎꎭ、ꍮꌦꀁꂥꐯꀁꂥꃅꎳꃼꁌꏤꐽꏡꃅꂴꅉꈴꄉ0.11ꂷꌋꆀ0.13ꂷꉀꐕ。ꊜꋽꄮꉜꄉꀋꂿꑘꌠꂿꑘꅐꇐꋋꇅꇬꎴꊐꏱꁈꌬ，ꋚꂷ、ꌑꇌ、ꋠꇐꋦꋌꌋꆀꃮꎸꊭꊎꌠꁦꎆ，ꊋꀥꇱꄉꂿꑘꅐꇐꃷꎏꋎꍅꌶ。ꌕꆏꀒꁨꋍꁘꃅꂿꑘꁥꇱꌠꁦꎆ。ꍏꑷꏱꎆꄐꄉꁆꄻꌊꁥꇱꎆꀨ1230ꂡꂷꃅꄉ，ꀒꄹꈎꄩ200ꂡꂷꁦꎆ。ꐪꊛꄉꋚꂷꈛꎂꁥꇱꌠꁦꎆ。ꀉꒉꃅꍔꂄꁥꇱꌠꊋꃤꇱ，ꁥꇱꎕꏦꉀꐕꄉ，ꍯ、ꎭ、ꀀꃌ、ꌑꇌꉬꇮꃅꁊꑷꌐꌠꃅꇫꑟ，ꊮꊫꌋꆀꆖꂷꇗꂄꎆꁥꇱꈍꈐꍔꐯ，ꋌꑌꆿꁧꇗꂄꎆꁥꇱꌠꌫꄻ。ꂿ꒧ꏸꐕꃻꄻꎆꁥꇱꌠꇩꏤꑭꊂꆫꑘꑤ（ꅉ）ꈁꐥꌠꇬꑟ，ꍏꑷꏱꎆꎆꃀ130ꂡꂷꄐꁆꄉ，ꀒꄹꈎꄩ90ꂡꂷꁦꎆ。ꂿ꒧ꌬꇐꁌꏤꉀꐕꌋꆀꂿꑘꋦꁧꊪꏽꃅꊂꈴꄉ，ꐳꃅꂿꑘꌬꇐꏓꇱꎆꁥꇱꌠꁦꎆ。ꇖꆏꐳꃅꀊꏀꉹꌠꂿ꒧ꐧꋦꁧꃤꃅꉻꑫꋈꄻꌶ。ꂿ꒧ꈆꑪꇮꇐꇬꎆꀉꒉꃅꇱ，ꂿ꒧ꈆꑪꇮꇐꏀꀺꊌꐨꄹꁊꌬꌠꌋꆀꁧꃤꃅꄐꊋꋈꄻꌠꊋꀥꇱ。ꅉꂫꊐꌠꂿꑘꇮꇐꄹꁊꌬ、ꇙꀕꋦꁧꇵꆅꄴꏮ、ꂿꑘꅐꇐꊇꁧꍞꏲꌠꋍꉻꁧꃤꃅꏲꉻꑠꄻꐛꒆ，ꇲꃷꇷꃅꎹ、ꂿ꒧ꊿꌐꑘꇶꃅꎹ、ꂱꎆꅑꎆꏂ꒧ꑠꊋꁈꄏꄉꃄꄟꀉꑌꑵꃅꐙꌠꒃꅐꀰꏢꁧꃤꃅꌠꊋꁈꄏ。ꉬꆏꂿ꒧ꁡꇤꅉꀨꀰꏢꄹꏦꎍꐽꐛꒆꌶ。ꀋꃋꐥꌠꃄꅉꀧꃅꃆꂮꆏꎍꐽꇬꎷꄷꀋꁧꀊꉗꃅꐛꀋꐈ，ꂿ꒧ꊿꃅꈋꐞꂿ꒧ꇮꃅꊿꄚꐊꌠꁳꀊꅰꃅꏦꀧꐥꌠꃄꅉꀧꃅꀰꏢꌅꈌꐥꌶ。ꃄꅉꀧꃅꀰꏢꌅꈌꏮꆦꇬꀋꎪꃅꏦꃤꈴꄉꉌꇗꃅꁌꁵꌠꏥꏦꌭꈬꇬꎷ。ꏦꇨꐯꏦꇨꃅꋠꃅꀧꌋꃅꄹꏦꌋꆀꏦꇨꐯꏦꇨꃅꃄꅉꏎꌬꄹꏦꃄꌬꇫꑟ，ꅱꈯꃅꋠꃅ18ꂡꂿꇂꃴꑟꀋꉆꌠꐏꈬ。ꋍꏅꌩꁧꌅꈌꄹꏦꄺꀱꌠꄹꎆ。ꃹꅼꃅꂿ꒧ꁡꇤꏓꇱꄺꀱ。ꐳꃅꑣꍔꏲꉻꄺꀱ。ꏣꀋꑌꋭꋽꃅꑣꋂꎝꃆꂥꀘ。

（ꇖ）ꐳꃅꀻꎆꃄꄟꆹꏮ，ꊋꀉꒉꃅꎆꏣꐛꉻꄐꇐꃅꐙꌠꋊꄻꄹꎆ

ꎼꈎꆏꉀꎆꌠꀧ、ꊐꐕꌠꊥꎆꌠꆼꒆꄉ，ꀋꉬꀋꉆꌠꆏꅐꑘꐛꉻꋊꄻꌠꒃꉇꋒꌶ。ꋍꆏꎔꎗꃅꐕꍯ、ꎸꅍ、ꆳꂾꄻ、ꇓꋌꐈꇐ、ꌙꇮꑘ、ꋩꍹ、ꉙꑊꐥꎸꑫ、ꉁꈾꄻ、ꄆꌅꈴꌗ、ꐛꏀꎊꈴꑠꀋꉬꀋꉆꌠꅐꑘꋊꄻꌋꆀꉀꄓꄐꎖꌠꃄꌬ。ꊋꋧꄉꉹꑘꀻꎆꋋꈨꇬꐥꌠꐮꄙꌠꌋꆀꌤꃆꂥꀘꄉ，ꐛꉻꋊꄻꌠꌋꆀꃪꈴꊐꐕꌠꄹꎆ。ꑍꆏꊋꀉꒉꃅꎆꏂ꒧ꎀꍹꐛꉻꋊꄻꌠꌋꆀꏓꇱꄺꀱꌠꄹꎆ，ꎆꏂ꒧ꊋꁈꄏꄉꂱꎆꅑꌠꆏꎆꏂ꒧ꊁꊰꌠꌋꆀꎆꏂ꒧ꊋꋠꌠꏓꇱꃻꄻꌠꊋꁈꄏ，ꇨꀕꐮꉻꏑꌠꌋꆀꐰꉎꋍꃱꃅꀰꏢꌠꊋꊡ，ꅐꑘꏓꋧꐨꌋꆀꅐꀦꁆꄻꈲꊌꐨꉀꐕ。ꌕꆏꀊꅰꃅꊋꑌꌠꏁꁈꌬꄉꎆꏂ꒧ꐧꐭꉹꌠꀻꎆꌠꊋꁈꄏ。ꐳꃅꎆꒉꎆꇁꊋꁈꄏꏱꁈꃄꌬꇫꑟ，ꎆꏓꎆꊙꄉꀧꉻꑫꄻꐛꒆ，ꎆꉛꈴꎁꊨꄻꈝꐮ，ꎆꉛꄉꈁꐨꁦꎆ。ꍏꑷꏱꎆꎆꏂ꒧ꐧꐭꉹꌠꀻꎆꎆꃀ39ꂡꂷꇬꄉꁦꎆꌊ96ꂡꂷꑟ。ꐪꊛꄉꎆꏂ꒧ꐧꐭꉹꌠꊋꊡꄉꈆꑪꇮꇐꏀꀺ、ꇮꇐꄺꀱ、ꃅꅍꊌꁦꎆꌠꇗꏸꎴꈲꁵꏱꁈꃄꌬ。ꎆꏂ꒧ꐧꐭꉹꌠꐧꋦꈴꁧꃤꃅꉻꑫꄻꐛꒆ。ꇖꆏꏣꀋꑌꃅꎆꏂ꒧ꊋꁈꄏꄉꐳꃅꇮꇐꄺꀱ，ꏀꀺꃅꐙꌠꎆꏂ꒧ꋈꄻ。ꍏꑷꏱꎆꆏꌐꐘꎆꃀ200ꂡꂷꄐꏤꄉ，ꀋꉬꀋꉆꌠꆏꇔꊰꁥꇱꄟꌊꎆꏂ꒧ꊋꁈꄏꄉꇮꇐꄺꀱ。ꎆꏂ꒧ꊋꊡꄉꇮꇐꀊꏀ、ꋽꇐꀊꏀ、ꉁꈾꀊꏀ、ꌬꇐꀊꏀꌠꌬꄉ，ꃷꎏꐛꐈꌠꄉꄐ，ꃷꌒꈜꊒꌠꅐꇐꀖꁉ，ꅐꇐꏀꀺꌠꄹꎆꄉ，ꅐꇐꊇꁧꌋꆀꒃꅐꀰꏢꑟꐨꉀꐕ。ꉬꆏꐳꃅꐛꏀꁧꃤꃅꑘꌌꀻꎆ。ꎆꒉꎆꇁꄜꏂꀧ、ꐛꏀꎊꈴ、ꈴꌗꅲꇫ、ꆓꎊꌋꆀꏀꀺꅐꑘꀻꎆꌠꊥꎆ，ꁧꃤꃅꀊꏀꁆꏯꍔꀺ。ꋊꃅꁧꃤꃅꑘꐕꀊꂥ。

ꊋꀉꒉꃅꈆꑪꇮꇐꏀꀺꌠꄹꎆ。ꈆꑪꇮꇐꏀꀺꌠꌋꆀꈏꇓꈉꐨꍔꐯ、ꉀꎆꌠꊥꎆ，ꐛꉻꋊꄻ、ꑟꐨꑟꌠꏟꈯꃅꏓꐯꇯꎼꇁꌶ。ꎼꈎꍏꑷꏱꎆꆏꎆꃀ1461ꂡꂷꇱ，25.6％ꉀꎆ。ꋍꆏꐳꃅꇩꏤꀊꉗꀊꎳꊬꌠꈆꑪꇮꇐꀻꎆꄐꎖꐱꀨꌫꄻ，ꀊꅰꃅꈆꑪꇮꇐꀉꒉꀊꂾꌐꐘꌫꄻꌶ。ꈻꇙꊋꃤꀉꒉ、ꁧꏖꐨꀉꒉ、ꇿꋌꐳꃅꐥꌠꐘꑘꈨꌋꌊꐳꃅꍔꆙꄉꃅ，ꄾꌦꋩꃅꈯꄜꇮꇐꌋꆀꊨꊭꐮꐊꐙꌠꇮꇐꈨꐳꃅꅔꅐ，ꅐꑘꆹꏮꌠꌋꆀꇮꇐꊐꐕꌠꈻꇙꄉ，ꅐꑘꄖꄑꍄꑐꌠꌋꆀꎆꏣꀊꉗꀊꎴꃅꀻꎆꄏꐓ。ꑍꆏꃹꅼꈴꃅꈆꑪꇮꇐꏦꉻꄺꀱ，ꎆꏂ꒧ꇮꇐꏀꀺꌠꇬꀨꄜꂿꄐꋊꇤꌶ。ꈆꑪꇮꇐꊿꀊꅰꀉꑌꃅꄕꊪꌊꎆꏣꋈꄻꅉꃅꈽꒉ，ꇮꇐꄹꁊꌬ、ꅐꇐꎥꃪ、ꈆꑪꇮꇐꃅꐙꌠꎆꏂ꒧ꀞꄻ。ꒃꅐꌶꄻꎥꃪꏓꐯꇯꌠꄹꎆ，ꐳꃅꈆꑪꇮꇐꊌꐨꌌꀋꃋꐛꐨꒃꅐꊋꃤꉜꄉꆹꏮ。ꌕꆏꉁꈾꄺꂡꑘꄻꀉꇨꀉꒉꌶ。ꑴꌅꄉꉁꈾꀉꒉꇩꈐꁠꃅꋉꃆꌋꆀꍔꃚꃻꄻꄹꏦꎥꃪꀖꁉꄉꃅꇫꑟ，ꊋꋧꄉꉁꈾꐊꐙꀉꒉꌠ、ꇮꇐꀊꂥꉁꈾꌋꆀꇮꇐꀊꂥꅐꑘꈁꈉꌠꉁꈾꌌꀻꎆ，ꉁꈾꄻꑘꏓꐛꏀꀺꌠꌋꆀꇩꏤꅐꇐꈴꑟꐨꉀꐕ。ꇖꆏꊋꀦꀊꏀ、ꒆꇐ、ꆅꉃꁬꋌ、ꌕꋏꋎꌠꎞꇙꈴꅇ、ꌕꈄꏓꇱ、ꊋꏏꋦꈬꌋꃅꑠꇮꇐꎥꃪꀖꁉꌋꆀꅐꑘꈴꌠꊋꁈꄏꌋꆀꄹꎆ，ꇮꇐꀊꂥꀊꏀꅐꑘꉺꌠꌌꀻꎆ，ꐧꋦꈉꇖꐨꀊꏀꌠꀹꄻ。ꉬꆏꐪꊛꄉꈆꑪꂘꑘꌌꇩꏤꄖꄑꌠꄐꇐꏤꁈ、ꌧꊿꌌꇩꏤꀉꇨꇁꌠꄐꇐꏤꁈꌋꆀꌧꇐꅐꇐꌅꈌꄐꇐꏤꁈꌫꄻ。ꐪꊛꄉꇩꏤꏀꀺꉻꑫꋈꄻꌠꄹꎆ，ꅉ꒜ꈆꑪꌋꆀꂴꅑꇮꇐꎥꃪꌠꊋꀥꇱ，ꐳꃅꀉꒉꀊꂾꌠꈆꑪꇮꇐꅉ꒜ꉁꈾꌋꆀꉻꌬꅉꋈꄻ。ꏣꀋꑌꃅꎿꉈꀊꂥꊐꌠꌧꊿꌋꆀꀑꁮꊋꃤꊙꈏꃹꄉ，꒔ꑞ꒔ꉹꊿꁥꂘꄻꌠꊋꀥꇱ。ꌧꇐꅐꇐꌅꈌꀹꄻ、ꌌꌬ、ꀧꌋꃅꌠꌋꆀꏱꄻꑟꐨꉀꐕ。

ꄝꀋꏯꃅꊋꀥꇱꄉꊋꏏꍍꋊꌠꌋꆀꒆꉻꋦꈭꌋꃅꌠꌤꃅ。ꋍꆏꑓꅐꎑꃅꇮꑘ、ꈭꈜ、ꋈꄻꀉꒉꌕꁁꏯꌠꊋꏏꌠꒃꉇꋒ，ꐪꊛꄉꊋꏏꋉꃆꀉꒉꀋꉬꀋꉆꊰꐘꌠꋈꄻꌠꄹꎆ，ꄆꏸ、ꉾꐯ、ꐕꍯ、ꃅꌗꋊꈻꏸ、ꁨꑭꑠꁆꏯꌠꊋꏏꏁꁈꃅꇫꑟ。ꑍꆏꊋꇤꄉꈭꏮꎆꏣꌋꆀꁦꎴꅐꀦꌌꀻꎆ。ꊋꏏꒉꏏꃄꅉꏏꌠꌭꈬꇬꎷ。ꏣꀋꑌꃅꉿꄆ、ꒉꄆ、ꆳꄆ、ꉘꁮꊋꃑꄆꑠꁦꎴꅐꀦꌌꀻꎆ。ꇤꌃꊖꌋꇮꇐꅐꑘꈴꄹꎆ。ꏦꇨꃅꊋꃹꌠꌋꆀꋦꈭꌋꃅꌠꇩꏤꎕꏦꃄꌬ，ꊋꀉꒉꃅꌌꊋꏏꇮꇐꌋꆀꅐꇐꄹꁊꌬꌠꇬꇱ，ꊋꀥꇱꄉꅐꀦꏓꇱꌠꌬ。ꌕꆏꊋꏏꋦꈭꌋꃅꌠ꒔ꑞ꒔ꐘꌠꏱꁈꄻꐛꒆ，ꊋꏏꍍꋊꌐꁧꉻꑫ、ꎖꉚꉻꑫ、ꍞꎖꉻꑫꈴꄉ，ꏟꈯꀕꃅꃅꇫꑟ。ꇖꆏꉹꁌꃅꊋꏏꍍꋊꌠꃅ，ꇩꏤꌤꃅꅉ、ꋍꏅꎆꏂ꒧ꌤꑘꌤꃅꅉꆏꂴꅑꂿꄐꋊꇤꌶ。ꉬꆏꐪꊛꄉꀉꇨꃅꀋꉬꀋꉆꌠꈳꁕ、ꋥꁕꍍꒉꄴꏮꏱꄻ，ꊋꀥꇱꄉꂤꏂꇓꃀꐛꈴ、ꃅꈣꐛꈴꌠꄺꂡ，ꀨꄉꀕꐏꁇꌩꏪ、ꋌꐛꌩꏪꀧꌋꃅꌠꌋꆀꀙꏢꄟꏢꆲꏂꅐꀦꄺꂡꑠꒆꉻꋈꄻꋉꃆꌫꄻ，ꒉ、ꌩꏪ、ꅔꏂ、ꃄꅉꅫꅉꑠꒆꉻꋦꈭꀧꌋꃅ。ꂿ꒧ꁡꇤꋦꈭꏓꇱꄺꑣꌠꄹꎆ。ꇑꅐꇐꅐꀦꀖꁉꐥꀹꋊꍬꏦꈴ。ꋭꋽꃅꎿꇬꅐꀦꀖꁉꌬ。ꃘꆏꃅꌗꐛꐈꌠꇬꊝꌠꇩꏤꄐꉻꌫꄻ，ꃅꌗꐛꐈꌠꇬꄉꄐꌠꄐꊋꉀꐕ。ꃄꀑꃅꑊ、ꃄꇙ、ꉮꄵꉮꊨ、ꍤꎖꅉ꒜ꎥꃪꌋꆀꄐꊋꋈꄻꌠꊋꀥꇱ。

ꐊꑷꃅꅐꇐꊇꁧꌋꆀꋬꂻꒃꅐꑟꐨꉀꐕ。ꎼꈎꇩꏤꑭꊂꃅꃷꎏꐥꀺꌐꐘꃅꈧꌋꆀ“ꊇꁧꌋꆀꋬꂻꈓ”ꃅꈧꌠꋊꍬꏦꈴꌠꃅ，ꉹꑘ꒔ꑞ꒔ꉹꌠꇬꊾꈁꐥꌠ、ꈀꈴꎁ、ꈁꐥꁆꏯꃅꊇꁧꌋꆀꋬꂻꏲꂠꌠꊋꀥꇱ。ꀒꁨꋍꁘꃅꉹꑘꀋꉬꀋꉆꌠꋬꂻꒃꅐꍞꏲꇬꊋꇨꇱ，ꏟꈯꀕꃅꀉꒉꀊꂾꃅꋬꂻꌤꅐꇁꌠꋎꍅ。ꃹꅼꃅꋠꇐꁬꋌꉮꀋꐥꌠꌐꐘꋊꄻꌠꃅ，ꅐꇐꊇꁧꋬꂻꎕꏦꄻꐛꒆꄷꀋꁧꌌꏦꇨꃅꌬ。ꏦꇨꌠꃷꎏꃹꉆꄹꏦꌋꆀꅐꇐꊇꁧꊂꈹꄹꏦ、ꎹꀱꄹꏦꃄꌬ。ꏓꂱꉹꁌꁳꃼꇬꉌꒊ、ꋠꇬꉈꀋꇬ、ꌬꇬꌬꌒꎻ。

ꐪꊛꄉꁮꐚꁁꏯꀉꒉꃅꀖꁉ、ꑌꌋꈤꃅꄷꑠꇮꑘꀉꆹꅉꄖꄑꍄꑐ、ꈯꄔꃅꄷꄓꋦ、ꁭꅐꃅꄷꂴꅑꄉꀻꎆꌠꃄꁕꀻꎆꉻꄜꄐꇐꏤꁈꌫꄻ，ꃄꁕꋮꄮꃅꀻꎆꌠꊥꎆ。ꃅꄷꈧꌠꊋꊡꄉꃶꐚꌠꇬꈴꄉ，ꋒꃅꊨꏦꑴꅉꂱꎆꅑꐨꋊꇤ，ꉇꉻꏭꊝꌠꇬꄉꀻꎆꈜꏀꄻꅐ。ꁭꅐꃅꄷꊋꀉꒉꃅꇩꏹꃷꎏꄹꀖ，ꎍꐽꃅꉇꅐ，ꊋꋧꄉꂱꎆꅑꌠꄻꑘ、ꐛꏀꁧꃤꃅꑘꌋꆀꀊꂥꀊꏀꇮꇐꅐꑘꌌꀻꎆ，ꐳꃅꅐꑘꊐꐕꌋꆀꏦꉻꏀꀺ，ꀊꏀꌠꎆꏣꉀꎆꅉꉗꄻ，ꇩꏹꇷꃅꋓꅔꈽꌠꂱꎆꅑꐨꀊꏀꌠꐛ，ꑟꐨꀊꅰꀊꂥꌠꐪꊛꄉꀻꎆꉆꌠꄐꊋꀊꅰꃅꀉꇨꇁ。ꎆꏣꇣꋲꐎ、ꎮꉰꁌꄏꑟꐎ、ꄟꏢꀘꉰꑟꐎꆏꐪꊛꄉꄺꀱꁉꃑꂱꅑꌠꃅꋒ。ꀒꁨꋍꁘꃅꈯꄔꁮꐚꁁꏯꌋꆀꑌꌋꈤꃅꄷꊨꊭꊋꁧꅉꊋꀥꇱꌠꁈꄏ，ꆹꃙꏢꑲꇤꇧꎭꌠꌌꀨꃅꄉ，ꊋꀉꒉꃅꌌꅉ꒜ꌬꇐ、ꒆꉻꋈꄻꌠꌋꆀꋦꈭꀧꌋꃅꌠꇬꎆꇱ，ꀊꏀꃅꈭꈜ、ꈲꒉꀋꉬꀋꉆꌠꋉꃆꈨꃅ，ꇤꐳꃅꋚꂷ、ꊋꀦꌬꇐ、ꌫꉂꌫꈾꄺꑣꑠꄞꅐꌠꅐꑘꒃꅐꅉꌋꆀꐛꐨꐥꌠꅐꑘꒃꅐꅉꈨꋈꄻ，ꇤꐳꃅꀨꄉꃅꄷꌌꂴꄉꀖꁉꄉ，ꇑꇓꅐꀦꌬꈤꌠꇓꈓꎆꏣꐛꏦꄺꀱꌠꊥꎆ。ꈯꄔꁮꐚꁁꏯꃅꄷꅐꑘꏭꆦꌠꊪꀞꌠꐘꄜꏱꁈꎥꋯꏤꄻꌠꐳꃅꒃꉇ。ꇩꏤꑭꊂꃅꀨꄜꄐꐨꄐꎖꌠꏤꄻꌋꆀꃄꌬ。ꊋꀉꒉꃅꇤꄉꇝꂱꀉꆹꃅꄷ、ꊿꋅꃅꄷ、ꃅꋮꃅꄷꌋꆀꌢꎭꃅꄷꀻꎆꌠꇇꀨ。

（ꉬ）ꐪꊛꄉꃹꅼꃅꄺꀱꁉꃑ，ꀒꁨꋍꁘꃅꈆꑪꃅꀻꎆꌠꇬꈲꁧꐥꌠꏦꉻꉺꏦꄻꐛꒆ

ꄺꀱꁉꃑꌠꆹꎆꏣꐧꋦꀻꎆꌠꌬꀋꈤꇙꊋꉬ。ꉪꊇꆏꐪꊛꄉꀋꎪꃅꄺꀱꁉꃑꌠꀋꇙꀋꑐꌠꌭꈬꇬꎷ，ꃹꅼꃅꄺꀱꌠꇬꈴꄉꀻꎆꌤꃆꊋꋠꌠꌌꂥꀘ，ꍔꐯꃅꁉꃑꌠꇬꄉꀻꎆꊜꋽꄮꊌ。

ꅐꀦꃅꐙꌠꅐꇐꁌꏤꄺꀱꌠꄹꎆ。ꐪꊛꄉꃹꅼꃅꄆꁌꏤꄺꀱ，꒔ꁘ꒔ꁘꃅꈄꏍꃹꌠꄆꁌꏤ、ꌞꎭꄆꁌꏤꌋꆀꃷꄻꄆꁌꏤꏓꐛꌠꉺꏦꄻꐛꒆ，ꄮꈉꄉꄐꄮꆏꊖꌋꄆꁌꏤꃆꂮꋊꍬ。ꏣꀋꑌꃅꀆꐒꁌꏤꄺꀱꌠꄹꎆ，꒔ꁘ꒔ꁘꃅꈲꒉꋉꃆꂿꑘꌬꌠꀋꉬꌠꀆꐒꇲꁵꁌꏤꉀꐕ，ꀆꐒꅐꀦꁌꎳꄻꌠꏲꂠꏦꉻꄻꐛꒆ。ꇤꐳꃅꇑꇓꅐꀦꁵꄉꌬꌠꄹꏦꌋꆀꒆꉻꇬꊒꌠꉺꏦꋈꄻꐛꒆꄉ，ꏣꀋꑌꃅꍍꋊꌅꈌꃷꄻꃅꉚꌠꃅ。

ꏱꎆꇗꏸꏦꉻꄺꀱꌠꄹꎆ。ꐊꑷꃅꁌꎆꇗꏸꏭꆦꄺꀱꌠꃄꌬ。ꈏꉈꎆꀨꎆꏂ꒧ꌋꆀꊨꏦꇓꈓꋉꇗꏸ、ꂘꇐꁥꇱꎆꑠꄹꏦꏓꋍꃱꃅ。ꅐꀦꇗꏸꄹꏦꄺꀱꐛꒆ。ꑲꋉꇣꄉꑘꇗꏸꄹꏦꄺꀱꌠꎥꋯꄹꎆ。ꐪꊛꄉꏲꑘꌤꑘꐨꐥꃅꁌꎴꌠꌋꆀꍔꃚꐨꐥꌠꎆꀨꋊꎵꇧꎭꄉ，ꐛꏦꈴꃅꏲꂠꌠꊋꀥꇱ。ꃹꅼꃅꂴꄐꌗꄹꏦꄺꀱ，ꍔꃚꋍꉻꄐꌗ、ꇩꁨꎆꀨꀰꏢꄐꌗ、ꍔꃚꐨꐥꌠꎆꀨꄐꌗꌠꌋꆀꐧꋦꏦꀧꄐꌗꌠꊱꁨꐥꃅꊛꄻꌠꃅꇫꑟ，ꏣꀋꑌꃅꄐꌗꄇꄜꋊꌠꄹꎆ。ꏱꎆꆹꏮꄉꎆꁵꌬꌠꄹꏦꄻꐛꒆ。ꌜꈛꎂꃅꏲꑤꏱꎆꏱꄻꃄꄟꄺꀱꌠꄹꎆ。

ꎆꒉꎆꇁꏦꉻꄺꀱꌠꄹꎆ。ꃹꅼꃅꇩꁨꎆꒉꎆꇁꏲꉻꄺꀱ。ꁨꏦꀉꑌꑵꃅꐙꌠꐧꐭꎆꒉꎆꇁꎆꏂ꒧ꌋꆀꀊꏀꉹꌠꂿ꒧ꁡꇤꎆꒉꎆꇁꏲꉻꎍꐽꃅꀻꎆ。ꏣꀋꑌꃅꉹꁌꎆꏓꎆꈴꌠꁣꀋꐥꃅꀻꎆꌠꄐꏁ。ꎆꀨꃷꎏꄺꀱꌠꄹꎆꄉ，ꇴꀾꃷꎏꎍꐽꌠꀧꌋꃅ。ꎝꊫꌐꃷꎏꋊꍬꀻꎆ。ꄡꈉꎊꈬꃷꎏꌌꎍꐽꃅꀻꎆ。ꃹꅼꃅꄜꏂꀧꑘꄺꀱꄉ，ꏣꀋꑌꃅꄜꏂꀧꏦꀧꌠꌋꆀꎆꏓꎆꈴꄐꐨꋊꇤ。ꇔꊰꍆꁧꃷꎏꈴꄺꀱꌠꄹꎆ。ꏓꂱꀙꎆꃀꉇꎆꐮꀠꁌꐨꄻꐛꉺꏦꄻꐛꒆꄉ，ꏓꂱꀙꎆꃀꉇꎆꐮꀠꁌꐨꄉꄐꐽꏡꑟꐨꀂꏽꅿꅐꀨꎍꐽꌠꄉꀧ。ꎆꒉꎆꇁꍞꏲꋊꄻꉺꏦꄻꐛꒆ。

ꇩꁨꎆꏂ꒧ꄺꀱꌠꄹꎆꌋꆀꉻꁨꏦꀋꉬꌠꎆꏣꀻꎆꌠꊋꁈꄏ。ꃹꅼꃅꇩꁨꎆꏂ꒧ꀉꒉꉹꌠꇬꌦꄹꏦ、ꍆꇴꄹꏦꄺꀱꄉ，ꀋꃋꎆꏂ꒧ꄹꏦꄻꐛꒆ。ꇤꐳꃅꎸꈜ、ꄆꊋ、ꋂꑘꑠꉹꑘꄺꀱ。ꉹꁌꃏꏸꈜ、ꄆꑠꏱꄻꏦꉻꄻꐛꒆꄉ，ꄆꑠꏦꉻꄺꀱꋬꈭꁆꇱꌠꍞꏲꏱꁈꏤꄻꅐ。ꉻꁨꏦꀋꉬꌠꎆꏣꀻꎆꌠꊋꊡ、ꊋꁈꄏꌋꆀꄐꏁ。ꏯꐯꃅꃷꎏꃹꉆꌠ꒔ꑞ꒔ꐘꏱꁈꃄꌬꑞꅉꑟ，ꏣꀋꑌꃅꉹꁌꎆꀨꇩꁨꎆꏂ꒧ꄺꀱꅉꇬꐊꆹꌠꊋꁈꄏꄉ，ꅉ꒜ꉁꈾ、ꉻꌬꌤꑘ、ꎆꒉꎆꇁꁧꃤꃅꌋꆀꐧꋦꌤꑘꑠꇬꐊꆹꎻ。

ꐳꃅꃅꄷꍔꃚꏲꉻꄺꀱꄉ。ꌤꑘꌤꃅꅉꄺꀱꌠꄹꎆ。

ꊋꇤꄉꉇꉻꃼꇇꎍꐽꉀꎆꆹꇬꎷ。ꉪꊇꆏꈏꇓꈉꐨꍔꒉꌠꊡꀱ，ꉇꅐꌠꄝꏯꀋꉆ。ꉇꉻꈉꐨꐳꃅꀁꋌꒊ、ꃼꇇꀧꌋꃅꉪꏦꀑꐕꌠꃅꒊꃅꇁꊋꋠꇨꌠꉜꆏ，ꉇꉻꃼꇇꏱꁈꎵꄻꌋꆀꋊꍬꄉ，ꈏꃹꉇꅐꌤꃅꌠꏭꊋꁈꄏꌠꊋꁦꎆꌠꇱꄉꃹꅼꃅꃅꌶ。ꀋꎪꃅꉇꅐꃷꎏꀉꑌꑵꃅꐙꌠꌋꆀꊇꁧꌊꊋꐛꌠꊌꌠꄐꇐꏤꁈꍬ，ꋊꃅꉇꅐꌠꃷꎏꄻꈫꈈꄉ，ꊋꀉꒉꃅꇤꄉꃷꎏꀊꏀꉹꌠꀹꄻ。ꋍꆏꋒꐯꋒꃅꇩꏹꌬꈴꌠꏱꎆꇗꏸꏱꁈꌬꄉꉇꅐꊋꁈꄏ；ꄉꄐꃅꉇꉻꃼꇇꀻꎆꀕꀨꄉꈁꍔꒉ，ꐧꐭꎆꏂ꒧ꇩꏹꃷꎏꀹꄻꌠꌋꆀꉇꅐꅐꇐꂓꅑꌠꄺꂡꌠꌌꀨꇬꄉꊋꁈꄏ。ꑍꆏꈏꃹꉇꅐꌠꎆꒉꎆꇁꁧꃤꃅꌠꄻꃪ。ꉇꅐꉌꒊꄜꏂꀧꉱꑷꐨꍔꒉ；ꎆꒉꎆꇁꏱꉻꊋꊡꑠꉇꅐꉌꒊꎆꉛꌠꃅꌊꀻꎆ；ꉇꅐꎆꏂ꒧ꎆꏓꎆꈴꄉꀧꃄꄟꏀꀺ。ꌕꆏꎍꐽꃅꄺꇱꂡꇱꃼꇇꆹꏮꊐꐕꌠꄹꎆ。ꄻꇱꂡꇱꃼꇇꀻꎆꋦꈭꄻꃪ，ꄻꇱꂡꇱꃼꇇꏢꑲꉹꌋꆀꏢꇈꉹꎹꀨꍬ；ꉇꅐꄻꇱꂡꇱꑘꈯꄔꁮꐚꃅꄷꉚꄉꆹꏮꌠꊋꊡ。ꇖꆏꃼꇇꁧꃤꃅꌠꊋꁈꄏꌠꏱꁈꏁꁈꐳꃅꃅꐛꒆ；ꊋꀉꒉꃅꇤꄉꇩꏹꁧꃤꃅꀨꁵꌠꌌꀻꎆ。ꉬꆏꊋꇤꄉꈏꃹꌠꍔꐯ。ꀋꉬꀋꉆꌠꆏꂱꎆꅑꌠꇮꇐꌬꉂꌬꈾꈻꈏꃹꄉ，ꏀꀮꏀꂷꀋꉬꀋꉆꌠ、ꊋꀦꅐꀦꌋꆀꇫꇬꌬꇐꈏꃹꌠꌌꁦꎆ。ꃘꆏꃺꇇꃅꈝꐮꐨꉀꐕ。ꈴꀸ、ꊇꁧꍤꄻ、ꉇꎆꑠꁁꏯꍞꏲꌋꆀꁧꃤꃅꌠꌌꃪꈴ；ꊋꀥꇱꄉꃅꋮꆹꏮꈏꃹꉇꅐꅉꋈꄻ。ꏃꆏꇩꏹꎆꏣꃼꇇꋦꈭꉾꃪꌠꁦꄻ。ꏣꀋꑌꃅꄏꉳꃢꌠꐯꉇꌠꄹꇙ；ꇤꐳꃅꄿꐨꃅꃼꇇꃅꅉꄐꇐꏤꁈꃄꌬ；ꋭꋽꃅꃼꇇꃄꄮꐮꃝꐮꌎꌠꊝ。

ꉇꉻꎆꀨꌬꌠꌋꆀꉇꉻꏭꎆꇱꌠꋮꄮꃅꀻꎆꌠꄹꇙ。ꉇꉻꎆꀨꌬꈧꌠꄉꈁꎍꐽ，ꉇꉻꎆꀨꄐꏁꌊꇮꇐꀊꂥꇊꀊꏀꌠꅐꑘ、ꂱꎆꅑꌠꁦꄻ、ꊋꏏꋦꈭꌋꃅꅐꑘꌋꆀꀋꃋꁧꃤꃅꑘꇬꌬ。ꀒꁨꋍꁘꃅꉇꄅꃼꇇꃅꊿꎆꊐꌠꇬꎑꁠꌠꏲꑘꎆꎴꌠꌋꆀꍤꆗꌤꐘꎵꄻꌋꆀꐛꏦꈴꎻ。ꈯꄔꁮꐚꁁꏯꇩꏤꊐꌠꀖꁉꃅꄷꀻꎆꐨꌋꆀꃅꋮꆹꏮꁉꃑꐨꉀꐕ。ꐪꊛꄉ“ꉇꅐꁧ”ꌠꄐꇐꏤꁈꌫꄻ。ꇎꏦꐥꌠꎆꏂ꒧꒔ꑞ꒔ꉹꉇꉻꏭꎆꊐꌠꌋꆀꇩꐂꄉꏓꃼꌠꊋꁈꄏ，ꋒꐯꋒꃅꎆꏂ꒧ꀉꒉꉹꌠ“ꉇꅐꁧ”ꌠꇬꊋꀨꂿꄐꋊꇤ。ꏣꀋꑌꃅꇩꋮꉈꃼꇇꇷꃅꅉꋈꄻꌠꄹꎆ。ꇩꋮꉇꅐꀦꇷꃅꀖꁉ、ꋉꃆꀧꃅꌠꌋꆀꊾꊋꇷꃅꌠꌌꀻꎆ。ꊋꀥꇱꄉꎆꏂ꒧ꉇꉻꏭꎆꇱꇷꃅꌠꎆꒉꎆꇁꊋꁈꄏ，ꉇꉻꎆꇱꈜꍔꐯ。ꇩꋮꉈꎆꇱꅺꇰꎺꁱꄹꏦꈍꈐꍔꒉ。ꊋꀥꇱꄉꎆꏂ꒧ꉇꉻꎆꇱꐔꈔꉆꌠꋎꍅꌋꆀꍞꏲ。

（ꃘ）ꊋꀉꒉꃅꇤꄉꐧꋦꌤꑘꀻꎆ，ꊋꇤꄉꉹꁌꐥꐨꃆꂮꏦꀧꌋꆀꄻꃪ

ꎼꈎꆏꊋꃤꏓꋧꄉꎆꏣꐧꋦꀻꎆꌠꇬꃛꊸꃅꈉꌠ、ꏓꂱꉹꁌꊨꏦꑴꅉꈲꁧꃆꂮꐥꌠꌤꀉꒉꇯꍝꈨꀞꄻꄉ，ꏓꂱꉹꁌꁳꈲꐪꀉꑌꃅꊌꎻ。

ꈍꃅꑌꁈꏂꁈꇭꄉꃅꅍꊌꌠꊥꎆ。ꋒꐯꋒꃅꁧꃤꃅꑘ、ꑘꃅꌤꈲꐨꐥꌠꅐꑘ、ꐧꐭꎆꏂ꒧、ꉻꁨꏦꀋꉬꌠꎆꏣꃅꑘꁵꌠꇬꂿꄐꋊꇤ。ꀊꅰꃅꏣꀋꑌꌠꃅꅍꊌꏱꁈꌫꄻ，ꍏꑷꏱꎆꆏꎆꀨ420ꂡꂷꌌꋋꈨꃆꂮꇬꌬꂿꉂ。ꋍꆏꒉꌶꅉꇬꌷꅐꌠꌶꌺꃅꅍꊌꌠꊥꎆꌠꌌꀨꇬꄉ。ꒉꌶꅉꇬꌷꅐꌠꌶꌺꇓꈓꇓꉈꅉꂫꊐꌠꐧꋦꏲꂠꌠꌋꆀꋍꉻꁧꃤꃅꌠꃅꈉꇬꄉꃅꅍꊌꌠꆏ，ꐧꋦꄜꏂꀧꌠꌋꆀꃅꈉꁥꇱꎆꄸꇬꁳ；ꂿ꒧ꁡꇤꅉꂫꊐꌠꁧꃤꃅꒉꌠꌋꆀꂽꄻꁧꌠꆏ，ꌷꁌꀂꏽꁥꇱꎆꄸꇬꁳꌠꌋꆀꋍꎁꃅꎆꉚꌷꁌꁵꌠꊒ。ꀨꄉꌠꈆꑪꎥꋯꐘꑘꆹꄜꌠꒉꌶꅉ、ꈆꑪꎥꋯꑼꌙꌋꆀꎆꏂ꒧ꃅꑘꁵꌠꇎꏦꑟꌠꌷꅐꌶꌺꈆꑪꎥꋯꌤꃅꌠꊋꊡ。ꎆꏂ꒧ꃅꑘꁵꌠꇎꏦꑟꌠꒉꌶꅉꇬꌷꅐꌠꌶꌺꃅꅍꊌꌠꆏ，ꏤꄻꌠꇬꈴꄉꄚꃆꂮꐥꌠꃅꅍꊌꌠꄏꐓꏱꁈꊌꉆ。ꇤꐳꃅꎆꊐꀁꑌ、ꊌꐨꐳꌠꒉꌶꌺꃅꑘꁧꀿꁍꀋꉬꀐꇬꏿꃹꅉꁧꀿꈨꋈꄻ。ꑍꆏꂿ꒧ꇮꃅꊿꃅꅍꊌꈜꍔꐯꌠꌋꆀꀋꃋꐥꌠꃅꅍꊌꃅꈉꎍꐽꌠꉬ。ꍔꃚꎆꊐꌠꌋꆀꀉꒉꀊꂾꐘꑘꋈꄻꌠꂿ꒧ꇮꃅꊿꋌꈺꇙꌊꃅꅍꊌꌠꂿꄐꋊꇤꅐꌶ。ꊋꋠꌠꎆꏂ꒧ꌋꆀꎆꏂ꒧ꇮꃅꊿꐮꇕꄟꄉꃄꎆꁵꌠꊋꊡꌋꆀꊋꁈꄏ，ꋭꋽꃅꇮꃅꊿꌬ、ꇮꃅꄮꈉꄉꄐ、ꇮꇐꄐꊋꁰꍋꑠꏡꁈꌬꄉ，ꄾꌦꋩꇮꃅꊿꊨꇬꄡꎭ。ꎀꍹꐥꃅꊾꊋꌞꌠꊋꀥꇱꄉ，ꂿ꒧ꇮꃅꊿꄐꏁꌌꊱꁨꐨꐥꃅꒈꇁ。ꀱꀁꇬꁧꌠꂿ꒧ꇮꃅꊿꊥꇬꌊꂿ꒧ꁡꇤꋍꉻꌬꇐꋈꄻꅉꇬꐊꆹ。ꌕꆏꇓꈓꃅꅍꊌꊋꌠꊿ、ꃅꅍꋍꂷꑋꀋꊌꌠꑱꁯꌋꆀꉮꌸꃅꄷꑘꃅꊋꃤꃅꅍꊌꌠꇇꀨꌠꉬ。ꀒꁨꋍꁘꃅꉻꈲꐨꐥꌠꃅꅍꊌꃅꈉꀹꄻ。ꇖꆏꊋꀉꒉꃅꇤꄉꑴꌅꃅꀹꄻ、ꊨꏦꃅꑘꏂꇫꌠꊋꁈꄏ，ꃅꑘꀹꄻꌠꌊꃅꅍꊌꌠꈺꇙꌠꊥꎆꌠ。ꃷꎏꃹꉆ、ꎆꐪꇗꏸꎆꒉꎆꇁ、ꀰꏢꄉꃄꅉꌬꌠꑠꁁꏯꈝꐮꌠꌋꆀꈲꏿꌠ，ꑘꃅꊿꀊꅰꃅꀉꑌꌠꊋꊡꌊꀹꄻꊿꐛ。ꑴꌅꃅꀹꄻ、ꂿ꒧ꇮꃅꊿꀱꑳꋑꄉꀹꄻꌠꏭꆏꇖꂟꐨꌌꀁꂥꃅꄉ，ꀊꅰꃅꀉꒉꃅꇫꊋꁈꄏ。ꉬꆏꀒꁨꋍꁘꃅꃅꑘꎹꋍꉻꁧꃤꃅꌠꄻꃪꌠꉬ。ꃅꅍꊌꌠꈴꌗꄜꃑꌠ、ꃅꑘꉉꇰꌠꌋꆀꃅꅍꊌꄐꇺꌠꌤꃅꌠꊋꀥꇱ。ꊋꒉꃅꃅꑘꁱꂘꌠꍔꆙ。ꊋꀥꇱꄉꃅꅍꊌꇬꊋꋠꌠꊿꌋꆀꂿ꒧ꊿꇓꈓꄉꑘꃅꌠꃅꑘꇮꇐꁱꂘꌠꏭꏱꁈꊋꁈꄏꌠꃅ。

ꐳꃅꐧꋦꏦꀧꉻꑫꄻꃪ。ꋍꆏꄹꏦꋈꄻꌠꄹꎆ。ꅉꀨꃀꌠꀨꎹꄜꏂꀧꄹꏦꄻꃪ，ꐪꊛꄉꊨꏦꎆꊐꑱꁱꃄꉛꅉꃅꋒꌠꍔꆙ，ꐊꑷꃅꌜꊐꌠꏓꄻꇱꄻꌠꄹꎆ。ꂿ꒧ꊿꇮꃅꌠꃀꌠꀨꎹꄜꏂꀧꏡꁈꃄꌬꌠꏤꄻ。ꀊꏀꉹꌠꂿ꒧ꁡꇤꐧꋦꃀꌠꀨꎹꄜꏂꀧꃅꉚꅉꆏꇩꏤꑭꊂꑤ（ꏃ）10％ꅶꍯꇬꑟꌶ。ꃀꌠꀨꎹꄜꏂꀧꃆꂮꆹꏮꊪꊛꏡꁈꃅꅐꇁ。ꃅꅍꀋꊌꌠ、ꑘꃅꄉꂷꊂꌸꌠ、ꒆꉘꄜꏂꀧꄹꏦꄻꃪ。ꇓꈓꇓꉈꐧꋦꈭꋏꇇꀨꄹꏦꄻꐛꒆ。ꑍꆏꐧꋦꏦꉻꁊꈴꈍꈐꍔꐯ。ꀋꉬꀋꉆꌠꆏꉻꁨꏦꎆꏣꀋꉬꌠꇬꄉꑘꃅꊿ、ꂿ꒧ꊿꇮꃅꌠ、ꃄꅉꊿꇱꎴꌊꁧꌠꂿ꒧ꊿ、ꋭꋽꃅꃅꅍꊌꌠꊿꌋꆀꄿꐨꃅꃅꑘꃅꊿꄜꏂꀧꇬꐊꈽꌠꌤꃅꋒ。ꂿ꒧ꁡꇤꀁꂥꇊꀁꂥꌠꐥꐨꏦꀧꌠꆏꏦꀧꄡꑟꌠꆏꄾꌦꋩꃅꏦꀧꌶ。ꈜꀉꑌꃅꈴꄉꇩꏤꑭꊂꐧꋦꏦꀧꎆꁦꎆ。ꃶꐚꃅꐧꋦꏦꀧꎆꀨꍞꏲꌠꊋꀥꇱ，ꎆꀨꉮꀋꐥꌠꄉꀧ。ꌕꆏꐧꋦꏦꀧꈲꁵꌠꉀꐕ。ꎼꈎꑎꄹꈎꆏꐪꊛꄉꎆꏂ꒧ꎞꆏꊿꅉꀨꃀꌠꀨꎹꎆꉀꐕꄉ，ꋍꈓꌠꐽꏡꃅꄉꇬꊾꂷꌠ10％ꅶꍯꉀꎆ。ꐪꊛꄉꃅꅍꀋꊌꄜꏂꀧꎆꌋꆀꑘꃅꄉꂷꊂꌸꌠꄜꏂꀧꎆꎕꏦꉀꐕ。ꀒꁨꋍꁘꃅꇓꈓꇓꉈꀁꂥꇊꀁꂥꌠꐥꐨꏦꀧꌠ、ꂿ꒧ꁡꇤꉬꑵꏦꀧꌠꑠꏦꀧꑟꐨꉀꐕ，ꃪꃅꀨꎹꌶꌠꁥꇱꎆꌋꆀꐥꐨꁥꇱꎆꎕꏦꉀꐕ。ꊋꒉꃅꐧꋦꈲꁵꌤꑘꌋꆀꂄꃅꎔꏿꌤꑘꀻꎆ。ꍏꑷꏱꎆꆏ2930ꂡꂷꄻꐧꋦꏦꀧꎆꀨꇬꇱꄷꄐꄉ，ꀒꄹꈎꄐꌗꃷꁨꇬ439ꂡꂷꁦꎆ，17.6％ꉀꎆ。ꃅꄷꏱꎆꑌꀉꒉꃅꎆꇱꌶ。

ꂴꄉꂘꑘꌤꑘꀻꎆꌠꌭꈬꇬꎷ。ꎼꈎꆏꇩꏤꐧꀠꀊꉗꃅꂘꑘꄺꀱꌠꌋꆀꀻꎆꄐꎖꌠꐱꀨꎥꃪꏦꄻꄉ，2020ꈎꈋꈐꃅꉪꇩꏤꂘꑘꄺꀱꀻꎆꌠꐊꑷꃅꄐꇺꌶ。ꃅꈎꋋꈓꈋꈐꃅꀋꉬꀋꉆꌠꉬꁆꏯꒃꉇꋒꌶ。ꋍꆏꂘꑘꐽꊯꌠꊥꎆ。ꇓꈓꇓꉈꁌꀋꈁꋭꑘꂘꑘꏱꁈꃅꇫꑟꋒ。ꂿ꒧ꁡꇤꋭꑘꂘꑘꉻꌬꌫꎆꎕꏦꉀꐕ，ꐭꌷꊐꌠ、ꐧꌷꊐꌠꌶꌺꐽꏡꃅꇬꉻꌬꌫꎆꂱꑱꅉꃅꐕꌊ300ꂷꌋꆀ500ꂷꇬꑟ。ꋍꁘꋍꁘꃅꂿ꒧ꊿꇮꃅꌠꌳꃈꅪꎭꃹꅉꄉꁌꀋꁵꃅꋭꑘꊌꌷꌠꌤꃆꂥꀘ。ꂿ꒧ꁡꇤꋭꑘꂘꑘꊭꌠꑱꈐꎆꏣꊋꋠꌠꌶꅉꇬꀀꄉꌷꌠꌶꌺꐥꐨꁥꇱꎆꏓꁦꎆꅔꈽꄉ。ꌕꈎꈐꃅꂿ꒧ꁡꇤ“ꈬꈎꌷꈴ”ꌠꎝꃆꌤꃆꀑꐱꃅꂥꀘ。ꇩꏤꌶꌺꇇꀨꄹꏦꄻꃪ，ꐧꊐꌠꃅꑘꌶꅉꌋꆀꀊꂥꊐꌠꌶꅉꇬꑱꈐꎆꏣꊋꋠꌠꌶꌺꏭꎆꃀꇇꀨꌠꊋꀥꇱ，ꊿꈁꐥꌠꁳꐥꊯꃅꉙꂘꊌꌠꊜꋽꄮꐥꄎꌠꏦꀧ，ꀉꑳꋍꂷꑌꑱꈐꎆꏣꊋꋠꌠꐛꅹꃅꁱꂷꌶꀋꄐꃅꀋꃅ。ꑍꆏꂘꑘꐛꉻꄻꃪꈴ。ꊋꒉꃅꃅꑘꂘꑘꀻꎆ，ꈜꀕꇈꀋꉬꀋꉆꌠꂿ꒧ꁡꇤꐧꊐꌠꃅꑘꂘꑘꊋꁈꄏ。ꋍꁘꋍꁘꃅꐧꊐꌠꃅꑘꂘꑍꁌꀋꈁꌠꃄꌬ，ꎼꈎꆏꂴꂿ꒧ꁡꇤꑱꈐꎆꏣꊋꋠꌠꌶꌺꌋꆀꂿ꒧ꐨꐥꌠꌐꑘꇬꄉꃅꅷꁧ。ꐪꊛꄉꀊꂥꊐꌠꂘꑘꊇꁧꉀꐕ，ꑟꐨꀊꂥꌠꒉꌶꅉꌋꆀꀨꎍꌠꌷꑫꋈꄻꌠꄹꎆ，ꀊꂥꊐꌠꌶꅉꄐꏁꌊꌐꑘꐽꋊꌋꆀꌷꃆꄐꄻ，ꃷꎏꌋꆀꎆꏣꐧꋦꀻꎆꈉꐨꇬꄉꄐꎻ。ꌕꆏꂘꃀꁥꌠꂘꄻꌠꊋꀥꇱ。ꋭꑘꉙꂘꊬꌠꇬꂘꃀꏭꆏꃅꐛꃄꎆꄹꏦꃄꌬ，ꐧꐭꌶꅉꂘꃀ1200ꃪꑼꌠꈲꁵꌠꉀꐕ，ꍏꑷꏱꎆꆏꋋꈨꐛꅹꃅꎆ120ꂡꂷꇱꄻꌠꄐꄉ，ꃅꄷꏱꎆꑌꇱꄻꌠꌌꁦꎆꌶ。ꐊꑷꃅꂘꃀꈜꀕꇈꂿ꒧ꁡꇤꂘꃀꁱꂘꌠꊋꀥꇱ，ꄊꑪꌶꌺ、ꂘꃀꌶꅉꌶꅐꌠꌶꌺꊋꊡꌊꅉꂫꊐꌠ、ꂿ꒧ꁡꇤꄉꂘꃀꄻꁧꎻ。ꇖꆏꊇꁧꂘꑘꄹꎆ。ꋍꊐꋑꀋꋒꋍꁥꋑꀋꋒꌠꂘꑘꐯꇯꊿꐊꑷꃅꀻꎆꌠꊥꎆꌠꇬꉜꄉ，ꐳꃅꌷꃆ、ꌷꅍꄯꒉ、ꉙꂘꏡꁈꌋꆀꎖꉚꉉꍣꄹꏦꄺꀱ，ꐧꐭꌶꌺꌌꃣꇖꌠꌷꑘꆹꄜꌠꇬꄉꁌꄝꎼꇁ，ꌶꌺꁳꉪꏡ、ꃄꄻ、ꀹꄻꌠꄮꈉꀊꅰꀉꑌꃅꐥꎻ。ꉬꆏꇩꏤꑭꊂꐧꐭꌶꅉꀀꅉꋬꂻꋉꃆꃄꌬ，ꂿ꒧ꁡꇤꐧꐭꌶꅉꎕꏦꈴꋈꄻꌠꄹꎆ。ꌶꅉꋈꄻꌊꋬꂻ、ꌶꌺꀿꃀꉌꒊꐯꉌꒊꈚꐛꀐ。

ꆅꉃꁬꋌꁦꎴꆄꄻꌤꑘꄺꀱꀻꎆꌠꄹꎆ。ꄉꉻꆅꉃꁦꎴꆄꄻꉻꈲꊇꅉꌭꈬꇬꎷ，ꋒꐯꋒꃅꀊꐯꈭꃅꆅꉃꌤꃅꊿꏣꀋꑌꐨꄕꊪꌶ。ꊋꇤꄉꇩꏤꑭꊂꁊꈴꌠꅉꀨꆅꉃꁦꎴꆄꄻꄹꏦꋉꐛ，ꀑꐱꃅꊿꈁꐥꌠꃅꅉꀨꆅꉃꁦꎴꆄꄻꁧꃤꃅꈲꊌꌠꃅꇫꑟ。ꎼꈎꄑ，ꀋꉬꀋꉆꌠꆏꄚꐰꌤꋋꉬꐘꒃꉇꋒ。ꋍꆏꅉꀨꆅꉃꏦꀧꄹꏦꋈꄻꌠꄹꎆ。ꇩꏤꑭꊂꇓꈓꇓꉈꀀꊿꂱꑱꅉꃅꌌꇓꈓꌤꃅꊿꅉꀨꆅꉃꄜꏂꀧ、ꇓꈓꀀꊿꅉꀨꆅꉃꄜꏂꀧꌋꆀꀊꏀꉹꌠꂿ꒧ꁡꇤꇷꃅꆅꉃꄹꏦꁊꈴꈍꈐꇬꃹꇁ，ꌕꈎꃅꄜꏂꀧꈽꐨꐽꏡꃅꐕꌊ90％ꈋꉐꇬꑟ。ꍏꑷꏱꎆꆏꊋꋠꃅꄷꈢꇧꎭꌠꑱꐢꌠꇩꁨꎆꏂ꒧ꇬꄉꎞꆏꊿꄜꏂꀧꇬꐊꈽꌠꏭꋭꋽꃅꇫꁥꇱꇇꀨꌠꃅ。ꐪꊛꄉꇓꈓꀀꊿꆅꉃꄜꏂꀧꌠꌋꆀꂿ꒧ꁡꇤꀊꏀꉹꌠꇷꃅꆅꉃꎆꏓꎕꏦꌋꆀꏱꎆꁥꇱꎕꏦꉀꐕ，ꋭꋽꃅꎆꁵꉆꌠꍔꐯ，ꊒꁵꍆꐨꉀꐕ。ꇓꈓꇓꉈꆅꉃꈭꋏꄹꏦꄻꃪ，ꈭꋏꇇꀨꑟꐨꉀꐕ。ꑍꆏꇩꏤꅉꀨꁬꋌꄹꏦꄻ。ꎼꈎꆏꇩꏤꅉꀨꁬꋌꎹꀨꋍꃱꃅꏤꄻꌋꆀꄜꃑ，ꅉꀨꁬꋌꒃꅐ、ꏮꈴ、ꁌꏤꊨꄅ、ꌌꌬꌋꆀꆅꉃꁦꎴꄜꏂꀧꎆꁵꉆꌠꏱꁈꏤꄻꅐꇁ，ꉹꁌꆅꉚꆅꉃꅉꀨꁬꋌꌬꌠꌫꁌꆹꄜꌠꊨꒊꌶ。ꌕꆏꅉꂫꊐꌠꆅꉃꁦꎴꆄꄻꁧꃤꃅꉻꑫꄻꐛꒆ。ꎼꈎꆏꐊꑷꃅꄐꎖꊋꁈꄏꌠꑣꍔꁦꎴꆄꄻꅉ2.9ꃪꈚꋈꄻꌠꂿꃆꄻꌐꌶ。ꋋꊂꌕꈎꈐꃅꍏꑷꏱꎆꉈꑴꈯꄜꑣꍔꁦꎴꆄꄻꅉ5000ꈚ、ꑤꊐꌠꑱꑼ2000ꈚꌋꆀꇓꈓꐥꋥꁕꁦꎴꆄꄻꁧꃤꃅꈯꄜ2400ꈚꋈꄻ。ꃅꋮꆹꏮꈜꎴꃅꄷꋂꁦꎴꆄꄻꅉꋈꄻꌠꊋꁈꄏꄉ，ꇩꏤꑭꊂꈁꐥꌠꏲꑘꋍꂷꋑꀋꋒꐯꇯꁦꎴꆄꄻꅉꃅꇬꑟ。ꇖꆏꅉꀨꄉꉻꁦꎴꆄꄻꁧꃤꃅꌠꋍꁘꋍꁘꃅꐽꏡꈴꌠꊥꎆ。ꁌꀋꈁꄉꉻꁦꎴꆄꄻꁧꃤꃅꈍꈐꍔꒉ，ꇓꈓꀀꊿꊾꂷꌠꐽꏡꃅꇬꄉꉻꁦꎴꆄꄻꁧꃤꃅꌫꁌ15ꂷꐮꀋꊰ，ꋌꊂꋍꁘꋍꁘꃅꉀꐕ。ꀉꒉꀊꂾꃅꇵꆅꌠ、ꆅꃆꎴꌠꌋꆀꃅꑘꆅꌠ、ꃅꄷꐨꃅꆅꌠꄴꏮꌠꌐꐘꎆꇱꌠꁦꎆ。ꉬꆏꄉꉻꑱꑼꄺꀱꃅꉚꅉꄹꎆ。ꀋꉬꀋꉆꌠꆏꏱꄻꏦꉻ、ꏮꈴꉺꏦꌋꆀꍞꏲꉺꏦꄺꀱ。ꃅꄷꋌꈚꋑꀋꋒꊋꊡꄉ
ꌅꏲꌤꃅꁷꐞꌠ、ꏱꄻꀞꄻꁷꐞꌠ、ꆅꉃꁬꋌꁷꐞꌠ、ꈲꏣꐥꃅꀰꏢꌋꆀꌋꆀꈲꏣꀋꐥꃅꀰꏢꌠꁷꐞꌠꇿꋌꐥꌠꇶꏦꎹꎥ。ꋍꁘꋍꁘꃅꁬꋌꌌꆅꉃꌠꉺꏦꇤꇧꎭꄉ，ꄉꉻꑱꑼꁵꊒꉺꏦꄺꀱꌠꄹꎆ。ꃅꄷꋍꈚꋑꀋꋒꊋꊡꄉꆅꉃꁧꃤꃅꌠꆏꄚꃆꂮꈲꏣꐥꌠꁁꏯꁳꃅꈽꋮꒉꌠꁌꏤꉺꏦꄻꐛꌠꎹꎥ，ꄚꃆꂮꐥꌠꏲꉻ、ꉹꁌꁧꎁꌋꆀꌧꃀꇫꃅꈽꌠꊇꁧꍞꏲꌋꆀꉉꍣꄹꏦꄻꐛ。ꍏꑱꁬꋌꌋꆀꊿꋅꁬꋌꆏꆅꄴꏮꆅꉃꄻꅉꇬꀋꂿ꒧ꌠꂿꄐꋒꐯꋒꃅꋊꇤꎼꇁꌶ。ꋌꊂꌕꈎꇬꆏꍔꃚꋍꊐꋑꀋꋒꎆ8500ꂡꂷꄻꇫꇯꄷꄐꏤꄉ，ꄚꈐꏭꍏꑷꏱꎆꎆꇱꌠꆏ3318ꂡꂷ，ꆅꉃꁦꎴꁬꋌꏦꉻꄺꀱꌠꁣꀋꐥꃅꄹꎆꌠꄉꀧꎻ。ꆅꉃꁦꎴꁬꋌꏦꉻꄺꀱꌠꆏꏓꂱꉹꁌꋬꂻꌅꈌꈲꁧꇬꑌꑲꎍꌠ，ꉪꊇꆏꊋꀥꇱꄉꏲꂠ、ꑭꋧꃅꄐꎖ、ꎔꎗꃅꊥꇬꄉ，ꏣꀋꑌꋭꋽꃅꄹꎆ，ꃶꐚꃅꆅꉚꁌꇨ、ꆅꉚꊋꋠꌠꌤꃆꂥꀘ，ꏓꂱꉹꁌꎁꃅꋬꂻ、ꇿꋌꐥ、ꌤꀞꌒ、ꁌꈝꐮꌠꆅꉃꁦꎴꆄꄻꁧꃤꃅꌠꇲꁵꌶ。

ꊻꂷꌋꆀꎖꁨꒆꉘꌤꃅꋒ，ꒆꉘꑟꐨꀁꂥꌠꌌꎍꐽ。ꎼꈎꄑꄉ，ꇩꏤꑭꊂꂿ꒧ꁡꇤꇬꑱꑼꀀꄉꀉꑳꒆꌠꎆꁥꇱꌠꏱꁈꃄꌬ，ꄡꈉꄡꄉꃴꑌꊿꏭꀉꑳꒆꂾꍤꄻꌋꆀꀉꑳꒆꊂꅲꉜꌠꃅ，3ꈎꈍꐯꀉꑳꀿꏂꌠꏭꉀꒆꐨꒅꄟꍤꄻꌠꃅ。ꒆꅐꆐꅑꄴꏮꌤꃅꌠꊋꀥꇱ。ꂿ꒧ꁡꇤꎖꁨꒆꉘꑱꈐꄹꁆꀮꄑꈁꁠꁵꎕꏦꌌꊿꂷꐽꏡꃅꇬ600ꂷꇬꄉꐕꌊ720ꂷꇬꑟ。ꏮꐺꊻꂷꁧꃤꃅꌠꌋꆀꏱꄻꌠꊋꀥꇱ。ꌋꅪꌋꆀꒆꑞꅉꀋꑟꌦꌠꊿꌅꈌꈲꁧꀧꌋꃅ。ꂿ꒧ꁡꇤꌋꅪꇬꌋꅪꆅꃆꆅꂮꄡꈉꄡꄉꍤꄻꌠꃅ。ꄣꅐꊿꌤꑘꐳꃅꀻꎆꌠꊋꁈꄏ。ꐪꊛꄉꃀꌠꌤꃅꌠꊋꀥꇱ。

ꊋꀉꒉꃅꇤꄉꁱꀕꈯꎟꌤꑘꌌꀻꎆ。ꁱꀕꀻꎆꌋꆀꌄꆣꌠꊥꎆꇬ，ꏓꂱꉌꊈꁱꀕꐥꐨꀉꑌꑵꃅꐥꌠꇬꑌꈲꁧꐥ，ꉈꑴꌬꈧꁁꏯꀹꄻꍔꐯꑌꉆ。ꏣꀋꑌꃅꉻꈲꃅꐙꌠꁱꀕꌤꑘꀻꎆ，ꐳꃅꄉꉻꁱꀕꁧꃤꃅꉻꑫꄻꃪ，ꀋꉬꀋꉆꌠꁱꀕꉁꈾ、ꇓꈓꇓꉈꅉꂫꊐꌠꁱꀕꉁꈾꈜꀕꇈꃅꃴꅇꁊꄆꁱ“ꋂꋂꈴ”ꌠꌋꆀꑣꍔꏓꇱꁱꀕꍉ、ꂿ꒧ꊿꄯꒉꄉꑳꋈꄻꌠꄻꃪ，ꊋꇤꄉꁱꀕꉹꁌꈲꁧꐥꌠꋉꃆꄹꎆ。ꁱꀕꅐꑘꐳꃅꀻꎆꌠꊋꁈꄏ，ꇇꀨꏱꁈꄻꐛꒆ，ꈯꌬꁱꀕꎆꏂ꒧ꁱꂘ。ꍔꑪꐧꋦꈆꑪꃅꌄꆣ，ꏣꀋꑌꃅꁱꇐꋽꇐ、ꅇꁊꄆꒌꄆꁱ、ꈨꏀꄯꒉꅐꌠꌤꑘꃅꌊꀻꎆ。ꈄꏍꁱꀕꋈꄻꌋꆀꏲꂠꌠꊋꀥꇱ。ꁱꀕꏂꀨꌋꆀꐥꇐꀋꉬꌠꁱꀕꍸꇐꌋꃅꌠꃅꋒ。ꉻꈲꃅꐙꌠꁱꀕꌤꑘꌤꃅꅉꏲꂠꏦꉻ、ꏭꌬꉺꏦꄺꀱꌠꌋꆀꀰꏢꃅꐙꌠꁱꀕꌤꃅꅉꆹꏮꎆꏂ꒧ꐛꌠꄹꏦꄺꀱꌠꄹꎆ。ꊋꀥꇱꄉꅉꂫꊐꌠꋍꉻꈯꎟꉁꈾꋈꄻꌠꃅ，ꊋꀉꒉꃅꉹꁌꃅꈯꎟꃅꈧꌠꃅ，ꈯꎟꇮꇐꋓꉚꐨꉀꐕ，ꈯꎟꅐꑘꀻꎆ。

ꋯꁦꏦꄹꋈꄻꌠꊋꀥꇱ。ꏣꀋꑌꎍꐽꃅꍔꍞꏦꉻꄺꀱꌠꄹꎆ，ꐧꋦꉪꏦꋯꁦꍔꍞꀻꎆ。ꋯꁦꄹꏦꄻꐛꒆ，ꋯꁦꇶꏦꌌꀉꑌ，ꋯꁦꈭꈜꄻꀊꐯ，ꏦꃤꈴꄉꋯꁦꌊꄻ、ꋯꁦꏤꇽ、ꋯꁦꏲꂠ、ꋯꁦꍞꊟꌠꃄꌬꌶ。ꅉꂫꊐꌠꉹꁌꊨꏦꏲꉺꏦꄻꐛꒆ，ꅉꂫꊐꌠꉹꁌꊨꏦꏲꈍꈐꍔꒉ，ꅉꂫꊐꌠꋯꁦꏲꂠꄹꏦꄻꐛꒆ，ꏓꂱꉹꁌꏦꃤꈴꄉꈛꎂꃅꋯꁦꌅꈌꌫꄻ、ꅉꂫꊐꌠꋍꉻꌤꃆꌋꆀꋍꉻꌤꑘꏲꂠꌠꏦꀧꌶ。ꃹꅼꃅꏦꄹꄜꉺꉙꂘꌠꃅ，ꉻꊿꉪꐨꉙꂘꌠꊋꀥꇱ，ꐧꋦꉪꏦꋯꁦꏦꏲ、ꄿꐨꐥꊯ、ꀋꈐꀋꉈꑗꉬꌠꉪꐨꑌ。ꇓꈓꇓꉈꋥꁕꋈꄻꌠꏓꇱꄹꎆ，ꐧꋦꎀꍹꁣꀋꐥꃅꀻꎆꌠꊥꎆ。ꍔꃚꏦꄹꌤꃅꌠꊋꀥꇱ，ꍔꃚꏦꄻꂿꈴꐨꌋꆀꉹꁌꋍꏅꃅꈽꐨꉀꐕ，ꐛꏦꈴ、ꀋꈐꀋꉈ、ꌧꑳꃅꏦꌬꌠꃅꇫꑟ。

ꐧꋦꏲꂠꌠꊋꀥꇱ，ꐧꋦꐮꄮꑘꒃꌠꌋꃅ。ꈜꀕꇈꉹꁌꏦꊒꌅꈌꈲꁧꌋꃅꌠꉜꁨ，ꎃꊒꃅꏓꂱꈏꇓꐮꄙꌠꀞꄻ，ꋋꇅꃅꋭꋽꃅꉹꁌꉉꄜꌠꌤꃆꂥꀘ，ꏟꈯꀕꃅꋍꑞꋍꑵꉹꁌꈲꐪꇬꉮꌠꃅꐨꄺꀱꌶ。ꐧꋦꐮꄙꌠꏟꃆꏈꑘꍤꄻꂥꀘꎵꃪꉺꏦꄻꐛꒆ，ꉹꁌꄐꏁꄉꉪꍆꏦꊒꌠꃄꄟꌊꈲꐪꇖꌠꉉꀽ。ꀋꎪꃅꏲꌋꇥꀯꀊꅰꃅꀋꉬꀋꉆꌠꏲꌋꇥꀯꉹꁌꄯꒉꁱꌊꉎꉉꉎꅲꇁꌠꌋꆀꉹꁌꉎꅲꇁꌠꋨꏦꌠꄹꏦꌭꈬꇬꎷ，ꉹꁌꏭꁧꃤꃅ，ꐮꄙꌠꋊꄻ。ꐧꋦꎍꐽꂴꌊꉺꏦꄻꐛꒆ，ꏣꀋꑌꃅꋍꑞꋍꉹꉹꁌꋍꁥꃅꌤꆿꅐꌠꄴꏮꌋꆀꋭꋽꃅꀞꄻ。ꃹꅼꃅꐥꅍꀋꐥꁧꀿꋈꄻꃅꈧꌠ，ꐧꋦꋬꂻꏓꇱꏱꄻꌠꊋꀥꇱ。ꈫꈈꃅꄴꏮ、ꏦꃤꈴꄉꏦꇨꃅꋍꑞꋍꉹꏦꐆꑽꃤꐆꃅꈧꌠꇇꇩꍈ，ꇩꏤꋬꂻꌠꌋꆀꐧꋦꎍꐽꌠꀧꌋꃅ。

（ꏃ）ꍔꃚꑴꅉꋈꄻꌠꄹꎆ，ꎆꏣꐧꋦꀻꎆꌠꃅꇴꄉꉻꄩꏲꄎꌠꊋꃤꉀꐕ

ꋌꃀꋋꈓꇬ，ꍔꃚꑴꅉꄺꀱꌠꌋꆀꋈꄻꌠꃅꐛꐨꀊꏀꌠꐥꀐ，ꄚꏓꂱꉘꇉꌠꌋꆀꍣꐨꄡꇗꀉꒉꃅꐥ。ꍔꃚꌅꊋꆹꏮꌠꑞꅉꀋꑟꌦ，ꏲꑘꑘꅐꐨꉀꐕꌶꑴꌦ，ꇶꏦꉪꏦ、ꇛꌺꉪꏦꊼꇅꑓꅐꎑ，ꍹꈔꐛꄟꃅꄷ、ꌤꃅꅉꌋꆀꀉꁁꀕꏯꈨꇬꊼꇅꀉꆈꃅꐙ。ꌤꃆꋋꈨꀋꎪꃅꊋꀉꒉꃅꅐꄉꂥꀘꌶ。ꑖꑟꃅꉀꎆꌠꀧ、ꉹꁌꐥꐨꀧ、ꎍꐽꌠꀧꌠꃅꇴꄉꉻꀉꒉꌠꆼꒆꄉ，ꍔꃚꑴꅉꋈꄻꌠꊋꀥꇱꌶ。

ꀋꎪꃅꏦꃤꈴꄉꏲꑘꃅꇬꎷ。ꏲꑘꃄꄟꐛꏦꈴ，ꏦꊒꃅꏲꑘꃅ、ꋭꋽꃅꏲꑘꃅ、ꈭꎁꎃꊒ、ꑘꅐꀞꌒ、ꀋꎪꀋꑴ、ꌅꈌꌋꆀꆽꎍꃅꏓꋍꃱꃅꌠꃅꇫꑟ。ꃹꅼꃅꏲꑘꃅꏦꃤꃄꌬ，ꐪꊛꄉꏲꑘꍤꈌꁧꄹꏦꄺꀱꌠꄹꎆ，ꏲꑘꃅꉆꎻꌠꌋꆀꍤꈌꁧꌠꌤꐘꀁꑌ，ꀊꅰꃅꎆꇱꍤꄻꈌꁧ、ꐘꑘꍤꄻꈌꁧꌠꊨꀁꑌ，ꎆꏂ꒧ꎆꇱꀨꄜꉆꈉꃄꌬꑞꅉꑟꌶ。
ꀋꈐꀋꉈꃅꋓꅔꌠꊥꎆ，ꃅꄷꋍꎤꄉꌠꇤꇧꎭ，ꉹꑘꇂꇎꌠꅥꆿꁈ，ꋍꑞꋍꑵꐧꋦꅐꀦꊥꇬꄕꊪ，ꎆꏣꉀꎆꌠꊥꎆ。ꐊꑷꃅꎃꊒꌠꃅꍔꃚꌅꊋꍬꌬꌠꇬꈴꄉ，ꉾꃪꌠꀻꎆꋦꈭꀹꄻ，ꎆꏂ꒧ꎆꇱꉌꊋꀉꇨꇁꎻ，ꐧꋦꌬꈧꌠꉌꊋꀉꇨꇁꎻ，ꏓꂱꉹꁌꇩꏤꀻꎆꌠꏭꉌꊋꀉꇨꇁꎻ。

ꈆꑪꃅꋯꁦꏤꇽꌠꃄꌬ。ꋍꑞꋍꐘꏤꇽꌠꐯꇯꈭꎁꏦꃤꈴꐛꏦꈴ、ꈴꎁꋯꁦꄇꄜꋊ、ꄽꂫꊌꐨꈆꑪꎃꊒꌠꃅꇫꑟꌶ。ꍔꃚꀉꒉꀊꂾꃅꏤꇽꏓꐛꌠꌋꆀꃄꌬꌠꐯꇯꊋꀥꇱꄉꍤꄻꎥꃪ，ꉹꁌꃆꂮꉜ、ꉹꁌꉪꐨꅲ、ꉹꁌꀑꁮꐨꏓꌠꃅꇫꑟ，ꉇꉻꈳꏦꁌꒉ，ꏤꇽꌠꂴꂿꐨ、ꈆꑪꃅꐙꌠꌋꆀꇿꋌꐥꌠꉀꐕꌶ。ꍔꃆꄇꄚꋊꌠꄹꎆ，ꂿꈴꐨꁦꎆ，ꏓꂱꉹꁌꃆꂮꅉꐚꌅꈌ、ꃅꈽꌅꈌ、ꉉꄻꌅꈌ、ꍞꊟꌅꈌꏦꀧ，ꏓꂱꉹꁌꁳꍔꃚꑞꉪꌠ、ꑞꃅꌠꅉꐚꎻ，ꏓꂱꉹꁌꁳꋒꐯꋒꃅꇬꉪꐛ、ꀊꐯꈭꃅꊋꁈꄏꌋꆀꇫꃅꈽꇁꎻꌶ。ꎼꈎꍔꃚꎆꇱꐨꀉꒉ、ꀊꏀꃅꃅꌠꐘꑘꀉꑌ，ꀋꎪꃅꄉꀧꄉꍞꏲꑞꅉꑟ，ꈍꃅꑌꊾꎭꎆꃹꌠ“ꑊꉻꋉꃆ”ꌋꆀꃶꐚꌠꇬꐞꌠ“ꏲꐛꋉꃆ”ꃅꀋꉆ，ꈍꃅꑌꋍꉻꎆꇱꍔꒉꌠꌌꌬꄉꌤꃅꌋꆀꑴꅉꎁꃅꑴꈲꌠꏂꎻꀋꉆ。ꍔꃚꈁꐥꊐꌠꃅꐯꇯꑴꐚꃅꏓꄊꍞꊟꌠꌋꆀꍔꑠꋯꁦꍞꊟꌠꉌꃹ，ꍞꍤ、ꍤꌗꑠꌐꄉꍞꊟꌠꊋꀥꇱ，ꀊꂥꃅꏓꂱꉹꁌꍞꊟꌋꆀꈨꏀꈁꊂꍞꊟꌠꉜꁨ，ꏲꑘꌅꈌꏭꌬꌊꇿꑟꆏ，ꍞꊟꌠꃄꌬꌊꇿꇬꑟ，ꏱꎆꎆꃀꌬꌊꇿꑟꆏ，ꍤꌗꌠꊂꈹꅷꇿꑟꌠꃅꇫꑟ。

ꇯꍝꃅꌤꃅꃅꇏꆹꏮ。ꈁꐥꊐꌠꍔꃚꆏꏟꈯꃅꍏꑷꏤꄻꄐꇺꎼꇁꌠꃄꌬ，ꑖꑟꃅꃶꐚꌠꇬꐊꄉ，ꀹꄻꐨꐥꃅꌤꃅ，ꍏꑷꃤꁳꏱꁈꋍꑞꋍꑵꃶꐚꌠꇬꄉꃄꌬꑞꅉꑟ，ꇿꋌꃶꐚꌠꊌꎻ。ꏲꌋꇥꀯꃹꅼꃅꍤꄻꎥꃪꄉ，ꋋꇅꃅꌤꃆꌋꅜ，ꌤꃆꂥꀘꌶ；ꑖꑟꃅꉹꁌꑌꑲ，ꉹꁌꎬꅧꌠꉈꇬ，ꉹꁌꉉꌠꅲ，ꉹꁌꎁꃅꉌꐒꊋꋠꌠꋊꍬ。ꍔꃚꌤꃅꊿꈍꄮꑌꏣꀋꑌꃅꉀꆹ、ꈏꇤꊋꇤꂴꅑꌠꉌꊈꐛꄟꐥꇬꎷ，ꏓꂱꉹꁌꋍꏅꌠꌋꆀꐯꇯꊋꋠꌠꀋꏦꃅꀒꁨꉚꄉꆹ，ꀒꁨꉜꄉꀹꄻ，ꎬꅧꃅꉈꈽ，ꐯꇯꄉꊋꋠꌠꆼꑣꇧꎭꌶ。

ꐙꎴꃅꏲꌠꋈꄻꌠꌋꆀꍹꈔꏭꁏꌤꃅꌠꊋꀥꇱ。ꄹꏦꐛꏦꈴꌠꌋꆀꌅꈌꏢꇋꌠꌌꈯꄜꃅꄉ，ꍹꈔꐛꄟꅐꈝꐮꀉꑌꃅꅐꌠꁁꏯꌋꆀꈭꊭꇬꄐꄉ，ꁧꀦꇬꄉꈔꌠꄴꏮ。ꏟꈯꀕꃅꍹꈔꃣꈌꍤꀞ，ꏦꃤꈴꄉꍹꈔꌠꌌꅓꁵ。ꉪꊇꀋꎪꃅꌳꉔꆽꎍꌠꃅꇫꑟ，ꃶꐚꌠꃅꐨꌋꆀꌤꃅꃅꊌꐨꌊꄉ，ꏓꂱꎁꃅꃅ、ꀋꎪ、ꐙꎴ、ꇿꋌꀊꂥꌠꍔꃚꋈꄻ，ꏓꂱꁳꉌꒊꎻ，ꏓꂱꁳꉌꃹꎻꌶ。

ꁧꎁꊈ！

ꊿꋅꈁꐥꌠꐯꇯꋯꑌꄉꉈꈽ、ꐯꇯꌄꆣꀻꎆꌠꊥꎆꌠꆹ，ꊿꋅꈁꐥꌠꏓꂱꁧꀦꈲꐪꉬ。ꐊꑷꃅꊿꋅꃄꁕꊨꏦꏲꌠꏦꃤꃄꌬꄉ，ꍏꑷꀁꑌꊿꋅꌋꆀꊿꋅꃅꄷꎆꏣꐧꋦꀻꎆꌠꏱꁈꏁꁈꃄꌬꑞꅉꑟꌠꄉꀧꌶ。ꐪꊛꄉꊻꂷꊼꇅꀁꑌꌠꊿꋅꇇꀨꌠꊋꀉꒉꃅꇱ。ꃅꋮꆹꏮꌄꆣꉹꁌꌣꈚꇁꎻꌠꃅꐨꆏꈁꐥꌠꃅꋮꆹꏮꑤꈧꌠꌋꆀꑟꏦꒃꅐꋈꄻꀘꄨꃅꋮꆹꏮꐛꅉꈧꌠꃅꉱꑷꃅꄉꌠꄹꎆ。ꎆꉘꃅꄷꌋꆀꀁꑌꊿꋅꏓꀀꈬꉘꃅꄷꊋꁈꄏꄉꐳꃅꀻꎆ。ꀋꎪꀋꑴꃅꊿꋅꋯꑌꌠꌋꃅ，ꀒꁨꋍꁘꃅꐥꊯ、ꋯꑌ、ꐮꇇꀨ、ꐮꄮꌠꐧꋦꉪꏦꊿꋅꃆꂮꄺꂡ。

ꐊꑷꃅꄈꑇꇐꂘꃅꌤꃅꌠꁧꀦꌐꏦꃄꌬ，ꑇꇐꂘꇐꁆꏯꊿꂒꋦꌠꌋꆀꑇꇐꑇꌠꉹꁌꎆꏣꐧꋦꀻꎆꌠꊥꎆꌠꇬꏣꀋꑌꌠꂿꄐꋊꇤ。

ꎔꎗꃅꄈꅿꉸꐇꌤꃆꏱꁈꃄꌬ，ꎿꉈꃺꑌ、ꀱꇩꈐꇁꌠꃌꌺꁍꇩꐛꏀꈴꋈꄻꌠꌋꆀꄮꐽꏓꋍꃱꃅꌠꃅꑘꀉꒉꌠꉈꇬꌋꆀꃅꈽꌠꊋꁈꄏ。

ꋌꃀꋋꈓꆹ，ꇩꐏꌋꆀꂽꁥꌠꐛꏀꈴꋈꄻꌠꀋꂿ꒧ꃅꀻꎆꌠꊌꅜꀐ。ꏓꂱꁌꄝꂽꇩꏤꌅꀨ、ꋬꂻꌋꆀꏱꅉꐛꒆꌋꃅꌠꎁꃅ，ꇩꏤꐛꏀꈴꋈꄻꌠꊋꁈꄏ，ꃛꊸꊋꋠꃨꆰꐨꐥꌠꀋꂿ꒧ꌠꂿꃆꃅꌐ，ꀋꂿ꒧ꌠꂿꄐꋊꇤꀐ。ꃅꈎꀊꏀꈒꌠꇬ，ꑓꏮꐊꑷꃅꃅꋊꀊꏀꊬꌠꂽꁥꌠꐩꋊꃅꎁꍬꌬ，ꂽꁥꌠꇝꂱꈴ、ꐛꏀꈴ、ꎃꐚꈴꋈꄻꌠꄹꎆ。ꊋꀉꒉꃅꂽꑼꉪꇐꍔꍞꌤꑘꊋꀥꇱ。ꏟꈯꃅꏸꏧꈴꌠꇎꏦꇂꃴꂽꌤꁰꍋꌠꆹꏮꌊꈴꌗꈴꇎꏦꇂꃴꄉꂽꌤꁰꍋꃅꌠꄹꎆ，ꀋꆏꃅꀉꑌꑵꃅꋬꂻꌠꇬꇷꇋꌠꇬꊝ、ꀉꑌꑵꃅꈴꌠꂽꌤꂿꃆꃅꌐꌠꄐꊋꉀꐕ。ꐊꑷꃅꇇꌭꉁꈾꌋꆀꊁꇲꏦꀧꌠꐛꏀꈴꑟꐨꉀꐕ。ꂽꌋꆀꉹꁌꐮꐊꃅ、ꂽꃤꌌꉹꁌꇬꌬꌠꇩꐏꈆꑪꎥꃪꌠꌋꆀꇇꌭꉁꈾꒃꅐꉻꑫ、ꂽꁥꌠꌧꊿꁱꂘꉻꑫꌋꆀꂽꁥꌠꏦꀧꉻꑫꄻꐛꒆ。ꏣꀋꑌꃅꋭꋽꃅꂽꁥꌠꄺꀱꌠꄹꎆ，ꂽꁥꌠꋈꄻꌠꍄꑐꌠꌋꆀꇙꊋꁳꀉꇨꎻ。ꊋꀥꇱꄉꏓꂱꃶꍋꏢꍤꂽꁥꌠꋈꄻ，ꌤꃅꆿꃅ、ꋋꇅꃅꅐꇁꌠꌤꀞꄻ、ꇷꌾꏭꁏ、꒧ꒃꀧꌋꃅꌠꄐꊋꀉꇨꎻ。ꊋꀥꇱꄉꇩꐏꄖꄑꌠꌋꆀꊁꊭꊁꄐꊋꃤꋈꄻ。ꂽꍔꃚꂽꉹꁌꋯꑌꌠꈫꈈꃅꀻꎆ。

ꁧꎁꊈ！

ꉪꊇꆏꀋꎪꀋꑴꃅ“ꋍꇩꑍꏦ”、“ꑣꇤꊿꑣꇤꏲ”、“ꉪꂱꊿꉪꂱꏲ”、ꀊꂥꃅꊨꏦꏲꌠꌐꏦꌬ，ꊋꇤꄉꑣꇤ、ꉪꂱꇣꋲꏱꅉꐎꑍꂷꌠꏣꀋꑌꃅꇩꏹꎆꒉꎆꇁꎒꐡꌠꏭꊝꌠꇬꄏꐓꄉ，ꌄꆣꎍꐽꌠꏦꀧ。ꀒꁨꋍꁘꃅꅔꈐꌋꆀꑣꇤꉪꂱꇷꃅꌠꊋꀥꇱ，ꑣꇤꇩꏹꎆꒉꎆꇁꈯꄜꐛꐨꌌꈫꈈ，ꉪꂱꎆꏣꄉꄐꀉꑌꑵꃅꀻꎆꌠꊥꎆ。ꐳꃅꑣꇤꉪꂱꃅꄷꌋꆀꎊꈬꂷꇁꃼꇇꃅꇬꏓꂱꀙꎆꃀꌌꌗꏢꃅꉚꌠꄹꎆ。ꀋꆏꃅꇨꄏꑣꇤꉪꂱꃅꄷꌕꈚꌠꇷꃅꌠꃹꅼꌋꆀꀊꐯꃅꍔꎆ。ꇤꐳꃅꑣꇤꍗꉰꉪꂱꄇꋒ、ꑣꇤꎸꍔꃏꏸꐛꅉꎸꈜ、ꇨꄏꎸꍔꑣꇤꐳꈴꎸꈜꑠꅉ꒜ꉁꈾꋈꄻꌠꄹꇙ。ꅔꈐꁧꃤꃅꑘꇤꉪꏭꁉꃑꌠꍔꒉ。ꏡꁈꇿꋌꐥꌠꒃꌊꇤꉪꎆꏂ꒧ꄷꀋꁧꐧꐭꎆꏂ꒧ꅔꈐꄉꀻꎆꌠꊋꁈꄏꄉ，ꀰꏢꊋꋠꐨꊨꒊ。ꇰꀋ꒜ꌠꁍꇩꆹꐥꍂꃅꑣꇤ、ꉪꂱꉈꊪꁋꏟꈯꀕꌠꉬ。ꉪꊇꆹꀋꎪꃅꇬꑅ，ꑣꇤ、ꉪꂱꃺꑌꆏꀋꎪꃅꀋꃋꋋꇅꇬꋒꌠꊋꋠꐨꆼꑣꇧꎭꄉ，ꀊꅰꃅꃪꌠꃆꏂꊂꑋꀹꄻꌠꉬ！

ꋌꃀꋋꈓꆹ，ꄠꃪꏭꌤꃅꌠꀋꂿ꒧ꃅꀻꎆ，ꄠꃪꐛꐪꏣꀋꑌꃅꐛꐈ，ꎿꑍꋮꐮꑌꑲꃆꂮꊌꐨꀋꇰꀋꉈꃅꐥ。ꎿꑍꋮꇕꄟꌠꆏ“ꈬꑍꉜꐨꐯꌟ”ꌠꀂꏽꄉꄺꀱꐛꀕ，ꐊꑷꃅꈛꎂꑍꁁꏯ“ꌕꈴ”ꌠꃅꇫꑟꀐ。ꎿꑍꋮꃺꑌꐯꄹꒈꇁꌠꀊꅰꃅꀉꑌ、ꎆꏣꑌꑲꌠꀊꅰꃅꑖꈈ、ꁱꀕꎻꈴꌠꀊꅰꃅꍄꑐ、ꐯꇯꈲꏣꊌꐨꀊꅰꃅꀊꐯ，ꎿꑍꋮꑌꑲꃆꂮꆹꄮꐽꀻꎆꈝꃀꏡꌠꇬꍬꆹꇰ。ꃅꈎꀊꏀꋋꈓꆹ，ꉪꊇꆹꐪꊛꄉꏟꈯꃅꎿꑍꋮꑌꑲꃆꂮꌌꀻꎆ、ꁍꇩꄮꐽꋍꃱꃅꌠꊥꎆꌐꏦꀋꂿ꒧ꌠꍬꄉ，ꎿꑍꋮꑌꑲꃆꂮꄮꐽꀻꎆꌠꅇꀨꏟꈯꃅꌭꄉ，ꏣꀋꑌꃅꎿꑍꋮꑌꑲꃆꂮꄮꐽꀻꎆꌠꇶꏦꄻꐛ，ꊋꇤꄉꎿꑍꋮꑌꑲꃆꂮꄮꐽꀻꎆꌠꐛꐪꀊꏀꌠꀹꄻ。ꉪꊇꆏꐪꊛꄉꐊꑷꃅꎿꑍꋮꎆꏣꇷꃅꌠꊋꀥꇱ，ꐯꇯꄉꎆꒉꎆꇁꎒꐡꌠꏭꊝ。ꏣꀋꑌꃅꎿꑍꋮꎆꒉꎆꇁꇷꃅꌠꄹꎆ，ꅔꃀꇬꐛꌠꄠꃪꎆꀨꎆꏂ꒧ꀻꎆꌠꊋꁈꄏ，ꇎꏦꑟꌠꆏꎆꊭꎆꄏꌠꁧꃤꇲꁵ，ꎆꏂ꒧ꑴꌅꏀꀺꌠꌋꆀꉹꏮꊐꐕꌠꊋꊡ。ꎿꑍꋮꐮꏯꎆꇱꌠꌋꆀꅐꑘꇷꃅꌠꊋꀥꇱ，ꂿ꒧ꇷꃅꌠꍔꎆꐯꌋꆀꃹꅼ。ꎿꇅꋧꁮꐚꏭꌋꆀꀉꁁꄠꃪꃼꇇꃅꊿꎆꇱꌠꊼꇅꏓꋧꃅꐙꃅꄷꎆꏣꀻꎆꌠꊋꁈꄏ。ꇤꐳꃅꎿꑍꋮꎆꏣꑌꑲꃆꂮꎃꐚꈴꌠꄹꎆ，ꏓꇱꐨꐥꌠꎆꏣꇷꃅꏤꐪꄯꒉꏤꄻꌠꄹꇙ，ꋍꁘꋍꁘꃅꎿꑍꋮꐋꀋꌡꐨꐥꌠꎆꏣꇷꃅꉺꏦꄻꐛ。ꎿꑍꋮꊿꐮꄹꒈꇁꌠꊋꀥꇱ，ꐧꋦꋍꑞꋍꑵꁁꏯꐮꑌꐯꑲꌠꍔꒉ，ꊋꇤꄉꍏꉸꁱꀕꄜꉺꄉ，ꎿꑍꋮꉌꊈꈲꏣꌌꈫꈈ。ꍏꇩꋍꂷꌠꏥꏦꅉ꒜ꀂꏽꄉ，ꊋꇤꄉꎿꑍꋮꑍꁁꏯꍔꍞꀉꇨꃅꉌꒊꌠꉀꐕ。ꅉ꒜ꋋꏢꀂꏽꄉ，ꉪꊇꆏꐮꇖꐮꄟꌠꇬꈴꄉꄠꃪꇩꏹꎀꍹꃅꈧꅉꇬꐊꆹꌠꌤꃆꆏꋭꋽꃅꇫꁆꄻꌠꉬ，ꎿꑍꋮꍔꍞ、ꂽꌤꀕꃆꎹꎥꄉ，ꁮꐚꏭꃅꐮꊝꌠꇤꇧꎭ、ꄮꐽꏤꐛꌠꎁꃅꇎꏦꀹꄻ。ꉪꊇꀋꎪꃅꇬꑅ，ꎿꑍꋮꍏꉸꌺꇖꋯꑌꃅꉈꈽꑲꆏ，ꁍꇩꏓꋍꃱꃅꌐꌠꆹꀋꎪꃅꀕꇫꑟ，ꍏꉸꊿꋅꇰꀋ꒜ꃅꀱꌄꆣꇁꌠꃅꇫꑟꄎꌠꉬ！

ꁧꎁꊈ！

ꋌꃀꋋꈓꆹ，ꉇꉻꑌꑲꌤꃅꊌꐨꀉꒉꃅꐥꑠꈓꉬ。ꉪꊇꆹꇩꏹꐧꋦꌋꆀꐮꐊꄉꎆꒉꎆꇁꎒꐡꌠꏭꊝ。ꊋꐛꃅꑸꉩꏃꌋꂠꌋꃀꈿꌠꀞꄻꄉ，ꑸꉩꇩꏤꇢꊭꍔꍞꐮꉌꒊꌠꌋꆀꀋꎪꃅꇷꃅꌠꄹꎆ。ꏣꀋꑌꃅꑍꁁꏯ、ꀉꑌꁁꏯꉇꉻꑌꑲꌠꄹꎆꄉ，ꅉꆺꋋꂷꌋꆀꃅꄷꃛꊸꐨꐥꌠꌤꃆꀂꏽꋈꄻꐨꐥꌠꂿꄐꋊꇤ。ꀋꎪꃅꇩꏤꌅꀨ、ꋬꂻꌋꆀꀻꎆꈲꐪꀧꌋꃅ，ꉪꇩꏤꉻꊿꌋꆀꏦꊿꎿꉈꏦꊒꌅꈌꈲꁧꏦꀧ。꒔ꑞ꒔ꁁꏯꃅꉇꉻꌤꃅꌠꊌꐨꀉꇨꃅꀻꎆ，ꇩꏹꉆꈉꌋꆀꑌꑲꐨꋍꉎꀋꐥꃅꉀꐕ。ꃅꈎꀊꏀꋋꈓ，ꉪꊇꆏꐪꊛꄉꄮꐽ、ꀻꎆ、ꇷꃅꌠꁈꁧꁬꌠꀊꂥꃅꐕꄉ，ꀋꎪꃅꄮꐽꀻꎆꌠꈝꃀꍬ，ꀋꎪꃅꄂꋦꑴꌅꌠꄮꐽꉇꉻꑌꑲꏱꁈꌬꇬꎷ，ꀋꎪꃅꐯꈲꋓꊋꌠꁉꃑꄐꇐꏤꁈꄹꎆ。ꊋꀥꇱꄉꋧꃅꇩꏤꈧꌠꌋꆀꉾꃪꃅꐮꎻꈴꄉ，ꇩꈐꎆꏣꎍꐽꊼꇅꐳꃅꀻꎆꌠꎁꃅꉇꉻꋦꈭꈲꏣꐥꌠꀹꄻ。ꉪꊇꆹꐪꊛꄉꃹꅼꃅꋍꁁꏯꋑꀋꋒꃶꐚꃅꇷꃅ,ꐯꇯꇩꏹꎆꒉꎆꇁꀋꆏꃅꎒꐡꌠꏭꄴꏮ，ꇩꏹꎆꒉꎆꇁꉻꑫꄺꀱꌠꄹꇙ，ꃼꇇꃅꌠꌋꆀꎆꇱꀧꌋꃅꉪꏦꏭꆼꁏꄉ，ꋧꃅꎆꏣꐳꃅꀱꐛꀕꇁꌠꊥꎆ。ꉪꊇꆏꐪꊛꄉꍏꇩꏓꂱꌋꆀꋧꃅꇩꏤꈧꌠꏓꂱꊧꀨꈲꏣꇬꄉꑭꄑꄉ，ꉥꑣꃅꃛꊸꌠꌤꃆꌋꆀꅉꆺꃅꐙꌠꌤꃆꌌꂥꀘꌠꎁꃅꑆꊋꀊꏀꌠꅐꌞ。ꍏꇩꍔꃚꌋꆀꏓꂱꆏꋧꃅꇩꏤꈧꌠꍔꃚꌋꆀꏓꂱꐊꄉ，ꐯꇯꐔꈔꊋꋠꌠꊝ，ꐯꇯꀻꎆꊜꋽꌠꊌꄉ，ꊋꇤꄉꀊꉗꃅꄮꐽ、ꐯꇯꌄꆣꌠꐮꄮꋧꃅꋈꄻꌶ。

ꁧꎁꊈ！

ꉪꊇꊝꌠꂿꃆꆏꀉꇨꇈꀉꇖꃅꐙ，ꉪꊇꆽꎍꐨꆏꀉꒉꇈꀑꑊꁤꇅꀕꌠꉬ。ꉪꊇꆏꐋꀨꃛꏢꄧꌌꊝꎻꏹꃅꄉꌠꄈꍏꑷꏃꂠꌠꇂꃴꄉ，ꀋꎪꃅꊋꐛꌠꉌꊋꑌ,ꀬꅑꃅꊋꋠꌠꊝ，ꏟꈯꃅꌤꃅ，ꋦꄉꏀꀺ，ꃅꋊꇬꎲꀋꄀ、ꐩꋊꇬꎲꀋꄀ、ꏓꂱꇬꎲꀋꄀꌠꑆꊋꀊꏀꌠꀹꄻꅐꇁ，ꊋꇤꄉꄺꀱꁉꃑꌠꌋꆀꐛꏀꈴꋈꄻꌤꑘꇰꀋ꒜ꌠꄹꆷꅷꀒꁨꆹꄉ，ꍏꉸꏓꂱꇭꉼꇩꄻ60ꈎꈭꏝꐛꌠꋨꏦꂿ！