发布时间:2010-06-24
ꐩꋊꒊꃀꆹꐥꍂꃅꀒꁨꉜꄉꏹꇬꎷꑵꉬꐛꅹ,ꉠꉂꏣꑌꒊꃀꐊꒈꂃꒊꆱꄓꇬꎷꇈ,ꉒꈌꈬꇬꉂꏣꆹꄚꄉꋌꇁꆈꌠꁍꁈꊂꋊꁮꅉꐛ,ꋍꇬꉉꀽꌠꆏ,ꉒꈌꈬꇬꉂꏣꆹꉢꁱꆎꁴꌠꑌꀋꉬ,ꁱꆍꊇꁵꌠꑌꀋꉬ,ꋋꆹꁱꉠꆃꎭꆈꌠꊂꋊꁵꌠꏂꀨꄯꒉꋐꉬꑴ……——ꁱꂾꅇ
ꉢꇁꍎꊈꎺꏹꂚꄏꌤꃅꅉꇬꑟꇁꇈ,ꉜꅊꇈꂿꆏ,ꋌꆹꈁꑓꑊꑆꍕꌐꀐ,ꄚꑓꋪꋑꌠꆹꏮꇁꊿꉚꇬꆹ,ꃀꅉꆐꑓꂷꀯꆱꍅꅍꊋꑌꐮꊋꑌꃅꎍ,ꅇꉉꅇꌬꐝꉅ,ꄚꅇꂷꋍꇬꋋꇬꆹꀉꅰꉢꋋꌧꃅꀋꐛ。
“ꉡꆹꎃꐚꌠꇭꍣꄈꎺꏹꂷ”,ꋌꉉꇬ,“ꉡꆹꇯꍝꃅꎃꐚꇨꀐꄷ。ꀋꃋꀃꑍꆹ,ꈭꎴꈜꎴꌠꈬꊯꈬꉘꋌꈚꇬꆹꑠꃅꉉꉆ,ꇭꀧꌋꆀꀃꃀꃆꂮꌤꃆꑍꐘꌠꆹꌌꂥꀘꀐ,ꄚꋋꑠꆹꑦꈁꈝꃀꉬꀕꀐꆏ?ꉢꉜꇬꆹꀊꎳꃅꍣꑴꌦ。ꑠꅹ,ꆎꆹꄡꇗꇫꄜꄡꉺꇬꄉꍑ。”
ꀃꈈꁬꌠꂚꎺꏹꇱꈢꇰꏢꀕꃅꄉꀐ。
ꄜꉺꉆꀋꉆꌠꆹ,ꉠꉌꂵꀊꅰꇫꀋꊢ。ꉢꀋꃋꋋꃢꍏꑷꄆꁱꃑꅉꆃꎭꆈꌠꊨꏦꏱꅉꍏꋉꐛ60ꈎꈭꏝꐛꌠꅱꁱꄨꇬꐊꄉ,ꆃꎭꆈꌠꃅꄷꅱꁱꇁꇬ,ꀋꉬꀋꉆꌠꆏꌞꀑꑊꉜꄉ,ꉈꑴꆏꋍꑠꋌꑵꂓꉺꀵꄉꋍꑞꋍꑵꊿꏮꑋꑳꌒꑟꉂꌠ。
“ꍑꑴꇆ,ꈾꃚꂷꌌꀉꑐꂷꏭꄀꇗꇱꀋꇿ。”ꈍꃅꀋꐚꅇꂷꑠꇬꉢꉉꎼꆹꀐꅊꇈ。
“ꄚꑠꃅꑲꆏ,ꆏꀋꃋꋋꃢꆃꎭꇁꌊꀈꈥꀕꀐ!”
ꄚꈍꃅꂯꆏ?ꉢꈝꃀꋍꎳꎵꃅꇁꌠ,ꆈꌠꈎꂷꀉꄂꏅꈽꇁ,ꆈꌠꎸꐡꐚꀉꄂꋠꇁꄷꌠꅀ,ꋍꃅꉉꑲꆏ,ꇯꍝꃅꉠꉌꂵꃴꀋꌦꌠ。
ꂚꎺꏹꉠꃀꈴꀋꄿꏭꃅꐙ。
“ꂚꎺꏹ,ꆏꅽꃆꂮꑍꇬꌧꉡꇰꇬꍑꍓ?ꌌꄜꉺꀋꁧ,ꉡꆹꅽꃆꂮꃶꐚꑍꇬꌺꅲꏾꌠ,ꆍꊇꄉꅿꌤꃅꊿꋋꋏꆹꈍꃅꇁꌠ?”
“ꉬꑴꇆ,ꁧꐙꈝꃀꈛꎭꌊꀉꂵꁮꅉꌧꃅꌧ!ꄚꋍꃅꑴꇬꀉꄶꁦꐚꈝꃀꇂꈪꈭꅈꇬꄉꉈꈽꐺꌠꆹꄈꅿꌤꃅꊿꀉꄂꇿꉬꂯ,ꉹꁌꏓꂱꄙꇁꃪꃅꐥ。ꉪꊇꃅꄷꋌꈚꇬ,ꂿꑘꆫꑘꐮꇰꃅꒃꉇ,ꀻꎆꊫꂫꆹꁤꇅꀕ。ꆏꇫꅲꏾꑲꆏ,ꊿꈍꑌꑹꇴꌊꊼꇅꌧꇁꂿ。ꀋꄹꄷꆏꀏꄽꂫꊐꌠꂿꑘꁡꇤꇬꆹꉜꒉꏾꑳꆏ,ꀉꅰꃅꃪꀐ。ꂁꀉꄶꁧꉈꐛꌠꆿꃀꁡꇤꆹ,ꇯꍝꃅꊼꇅꇬꉚꆹꄻꅐꌠꉬ。
“ ꀉꄶꇬ,60ꈎꂾꁏꐚꉻꄑꈁꁏꑠꃢꅐꋺ。ꃅꒉꆈꏸꀕꇇꎇꇇꀋꂿ,ꃅꆳꃅꃴꋦꃅꁏꑠꉔ,ꁏꐚꉬꇮꃅꄓꄉꈁꁏꌐꇈ,ꐚꌌꁈꈧꌠꊿꌉꌦꌐꀋꇊ。ꊁꆏ,ꐚꌌꁈꈧꌠꄓꄉꎼꈁꈔꄚꈔꃅꉈꑴꋍꃢꈁꁏꇀꌦꐛꅹ,ꁏꐚꄉꀉꑌꃅꌦꇈꊿꂿꇓꁨꐛꇫꎍ,ꆺꃮꒊꃀꇬꊾꌦꏃꑍꏃꉔꈴꑲꆀꈴꌐ。ꄚꄉꐚꌌꁈꈧꌠꆹꋌꇷꏸꐷꂶꐷꌐ,ꌤꃆꋋꐘꉉꎼꇁꄷꆏ,ꊿꋋꎼꎹꀕꇤꏸꏦꑑꃹꏾꁵꀕ,ꋋꈨꐛꅹꃅꑶꇽꁡꇤꋋꂷꆹꄚꄉꊿꇱꌌꆿꃀꁡꇤꃅꂒꋉꇫꎭꌠꉬ。
ꉜꅊꇈꂿꆎꑠꈨꉬꅊꇈ!
“ ꄚ,ꆿꃀꁡꇤꆹꆿꃀꇬꀋꐥ,ꀉꄶꇬꀀꌠꃰꊿꈧꌠꌋꆀꉢꐮꐊꋺ,ꋀꊇꆹꃺꃶꀁꑳꃺꃀꑌꂵꏭꀋꋌꃅꊋꃪ。”
“ ꂚꎺꏹꀋ,ꅽꑮꃀꆷꆹꇆ?ꇫꄉꈨꇁꇬꋋꆹꆿꃀꁡꇤꀀꌠꉬꄷꀋꂸ,ꉢꂴꆽꋌꎷꄉꊼꇅꑍꇬꉆꉈꀒ?”
“ꑞꃅꀋꉆꂯꀑ。ꄚꈎꏅꌐꈭꐨꆏꋋꆹꀱꁧꀐꌠꉬ。”
“ ꑞꉬ,ꋋꍏꇬꀋꀀꄜꅀ?”
“ ꄚꇬꋍꌤꃆꀋꐥꄉ,ꀊꉗꃅꐛꑲꆏ,ꋋꆹꉌꂵꎍꅉꀋꎍꃅꎸꄜꀋꃪꇬꎷ,ꄡꇗꀏꂿꑘꁡꇤꇬꐥꄉꍑꄷ。”
ꉡꆹꌗꏂꁌꄹꉘꇉꉘꀋꅐꃅꉌꆐꅑꇫꎍ。ꇯꍝꃅꆿꃀꁡꇤꋍꏮꉜꆹꑟꉂꌠ,ꄚ,ꂿꃅꀋꋌꄏ,ꋓꇗꉐꃰꇿꇬꐥꀋꐚ,ꊛꄉꃅꐎꌕꑍꃰꐛꆈꁌꀕꇈ,ꈭꋍꈛꄙꌐꐛꅹ,ꊾꂷꈛꎼꈜꈴꐺꑠꂷꎹꅈꀋꊌ,ꇯꍝꃅꈍꃅꇬꑌꀉꄶꁧꉈꑟꁧꀋꄐꀐꌠ。ꆏꉜꉏ,ꀉꄶꌎꑓꉈꏭꃰꌦꀱꑐꀕꃅꑵꉙꀜꐂꐺꇬꎷ,ꄷꀋꁧꑵꉙꇯꅲꌒꐮꅲꌒꀒ,ꀋꇊꆏꑌꑿꐍꐷꀕꑠꁥꇤꃅꈋꉜꉚꋯꀋꐛꑠꈚꇬꏪꄉꌠꌡꇬꎍ。
“ ꂚꎺꏹ,ꆎꆹꆿꃀꁡꇤꋍꃢꐥꀋꋺꄷꌠꅀ?”ꉡꆹꃅꅍꎷꀋꊌꃅꉠꇖꂟꅍꀉꁁꑠꏢꉢꉉꎼꆹꌦ,“ꅽꊨꏦꃆꂮꑍꇬꌺꊼꇅꌧꇬꍑꍓꀋ?”
ꂚꎺꏹꑊꁏꈁꁏꏭꃅꐙ。ꄚ,ꄽꂫꆏꂁꉌꂵꄸꈐꊐꄉꍹꐛꆰꀿꇫꎭꂿꉂꌠꁭꅉꂶꌠꆹꋍꇬꀋꊰꋹꃅꋋꉉꎼꇁꀐ。
ꃅꈎꃅꆪꆹꌨꏾꇓꏾꊰꃅꊰꇫꈴꁧꀊꉗꏢꐛꀐ。
ꂚꎺꏹꆹꀏꅉꂫꊐꌠꇬꄉꇁꌠꏲꌋꇥꀯꀊꋨꈨꌋꆀꐯꌟ,ꎺꏣꂄꇈꎺꇊꐝꄧꀕꑴꌦ。ꀉꄶꃅꋆꈊꃀꉪꊈꄆꄒꂷꇭꀋꄔꃅ,ꍐꀉꄶꊖꌋꃆꄔꀊꋨꇤꏢꁮꑌꄉꌧꅷꀋꑟꅈꀋꐥ。ꌧꉆꋒꀋꋒꃅꐙꌠꃆꄔꁨꑭꂚꎺꏹꈁꑓꑊꑆꍕꌐꂶꌠꋌꁨꄉ,ꄚꄉꋍꉌꂵꄸꈐꅇꈧꌠꉬꇮꋌꄝꒈꅐꃅꅐꇁꌐ,ꀉꅰꃅꄚꄉꑴꁱꇤꋲꑠꁬꀅꌳꀅꌳꃅꋍꑴꎼꇁꌠꌡ……
文章编辑:阿施莲香
【相关链接】 |