·ꀉꑗꁮꉘ·

ꉘꁮꆧꁨꏭꆏ,

ꃅꑍꃅꉖꐛꇬꎷ；

ꃅꑍꃅꉖꏭꆏ,

ꃅꈎꃅꆪꐛꇬꎷ。

ꃅꑍꃅꉖ,

ꃅꈎꃅꆪ,

ꀄꂼꀕꌠꌡ。

ꐧꋦꃰꊿꑠꑵꑌ,

ꀋꉪꀋꃅꆹꀋꄿ,

  ꂴꆽꉌꃀꈉꐨꉜꄉꉪ,

  ꊁꆹꉌꃀꉪꅉꉜꄉꃅ。

ꐋꀨꐥꊈꑠꑵꑌ,

ꏓꌦꐝꌦꃅ,

ꂴꆽꉌꇿꃅꄉꏓ,

 ꊁꆹꉌꐡꃅꄉꐞ。

ꌷꐋꉂꐪꑠꑵꑌ,

ꐝꆹꐞꁧꇁꂯꄉ,

   ꉌꃀꈐꏭꁧꏾꁧꀋꏾꋧ。

ꌷꐋꉂꐪꑭꐨꆹ,

ꋍꐪꇈꋍꐪꃅ,

ꌶꅉꇬꁮꇈꂯꄐ;

ꌷꐋꇢꊭꉂꐪꆹ,

ꒈꃚꉙꃚꐝꍠꀕ,

ꈍꄮꑌꀋꎺꇁꀋꉆ;

 ꌶꌺꐥꐨꌒꃅꌒꌠ,

 ꉌꃀꈐꏭꀀꄉꉪꁧꃲ;

ꉪꊇꐺꃆꐺꂮꆹ,

ꁮꅉꋍꂷꐛꇈꃳ;

ꋋꆹꉠꉌꃀꍇꌠ,

ꄅꁁꈍꐯꀀꄉ,

ꃰꐛꃰꐻꐯꌠꌡ,

ꁡꎓꁡꉢꅐ,

ꉌꐡꉌꇿꋧ。

ꀒ-----ꀑ!

ꃆꏂꑍꇆꃆꏂꑍ,

ꃆꏂꑍꈝꃀꎵꑳꀕꑴꌦꐛꅹ,

ꅽꉪꉫꑌꐝꈜꁮꂸꉬꐝꈜꁮ。

   ꉂꇁꅉꌠꌶꅉꇆꀅꌳꑌꇈ,

   ꉂꇁꅉꌠꂘꃀꇆꀅꌳꈩꇈ,

 ꉂꇁꅉꌠꌶꐋꇆꀅꌳꁧꂸ!

ꅽꉪꃰꊿꋧꃅꋋꂷꀂꏽꐤꌦꋩ,

     ꈀꄸꑌꐮꇬꌊꃬꃅꄉꐥꇬꎷꅊꇈ！

 (作者通讯地址：德昌县乐跃镇跑马村一社)

作者姓名：阿牛布火