——ꉠꆀꉙꁱꇐꁱꃆꂮꑍꇬꌧ
ꁰꊿꃆꂮ：ꀉꈌꏬꌋ，1979ꈎ12ꆪꏪꐦꑤꄉꒆꌠ，ꀒꎂꑪꑼꆈꌠꉌꈲꅇꂷꁱꂷꒆꆹꑟꌠꀪꈆꌶꋊꉘꃀꌶꅐꂶꌠ，1995ꈎ9ꆪꄑꆈꌠꁱꇐꁰꅸꀋꃋꋋꄮꑟꇁ，ꂴꊂꃅꆈꌠ、ꉌꈲꋍꑟꋍꑵꁱꇐ、ꁰꒌ3500ꁬꎖꁱꍑꌊꋍꑟꋍꑵꉜꇐꁱꀕꌋꆀꑍꄜꄯꒉꇬꄀꎼꇁꋺ，ꇩꏤ、ꌜ、ꍏ、ꑤꇬꁱꇐꈁꁠ86ꃢꊌꋻ。ꌧꈿꁱꇐ《ꀉꈌꀉꁌ》ꃅꑠ10ꎖꁬꈨꌋꌊ《ꀋꃋꋋꄮꆈꌠꁱꃀꁱꇐꌋ》、、《ꆀꉙꁨꐞꄒ》ꑠꇬꇱꄉꌌꄯꒉꅐꅉꄉꅐꄉ，ꀋꃋꆀꉙꌧꈿꁱꇐꀉꎴ《ꉒꈌꉂꏣ》ꋐꌠꄯꒉꅐꅉꄉꌌꄇꄜꋊꃅꅐꂯꊭꄏꄉ。
ꁍꁈꋦꁍꆀꃅꇤꄧꋋꂷꆹ，ꉢꏮꈍꏯꄉꉜ、ꈍꏯꄉꁱꄿꂿ，ꐥꍂꃅꉂꑟꅑꇈꁱꌐꇁꀋꉆꌠꌺꇖꊂꋊꋍꋏꇈꋍꋏꃅꄚꄉꑲꅉꇤꂷꆊꅑꑠꏬꎹꊌꇬꎷꐛꅹ，ꉢꆹꉠꈯꉢꋋꀋꌅꃅꄚꄉꄓꆀꉙꁱꇐꁱꌠꉬ。ꇯꍝꃅꉉꄹ，ꉢꆀꉙꁱꇐꁱꌠꆹꉠꐥꐨꐥꄷ、ꉪꇐꏡꇐ、ꀑꇬꉂꏣꌋꆀꐮꐞꀋꉆꌠꉬ。ꆀꉙꁱꇐꆹꌌꉠꉪꏣꈴꐨꋊꄏ、ꌌꉠꋧꃅꐥꐨꄜꋊꄜꑣꌠꉬ。
ꆈꌠꁱꂷꆹꆀꃅꆈꌠꅿꁱꀕꍸꇐꑵꉬꇈꆈꌠꐮꏯꑋꑳꇬꌬꉂꌬꈾꑵꉬ。ꄚꆀꉙꁱꇐꆹꌌꉠꏯꄉꉉꇁꇬꆹ，ꋋꆹꉠꉪꇐꈝꃀꉬꐛꅹ，ꉠꉪꇐꋋꇱꏃꌊꀑꇬꁦꀑꐂꄉꉌꃀꒊꌋꀕꇬꎷ；ꆀꉙꁱꇐꆹꌌꉠꏯꄉꉉꇁꇬꆹ，ꋋꆹꋧꃅꀉꁁꂷꑌꉬ，ꋋꆹꀋꃅꋋꄮꐛꐪꌋꆀꐮꌼꐯꐊꐺꌠꋧꃅꂷꑌꉬ。ꉢꆹꋧꃅꋋꂷꇬꄉꑴꅍꏦꅍꀋꐥꃅ，ꆀꉙꁱꇐꌌꉠꉌꂵꈁꉪꀕꌠꀑꇬꈻꇐꑵꃅꄉꅽꏯꅇꃅꉌꌤꀺꇬꎷꌠꉬ。ꑠꅹꉢꆹꀉꅰꃅꆀꉙꁱꇐꏮꈁꎭꀕꇈꇬꂿꈬ，ꄚꄉꉢꆹꁍꁈꃤꑡꑌꒌꆠꐥꌐꌠꉪꇐꌌꄉꋧꃅꉜꄉꁱ，ꆀꉙꁱꇐꌋꆀꁦꀑꇓꂵ、ꒊꃀꒉꌺ、ꃅꉒꃅꄂ……ꑠꑌꉬꇮꊨꏦꒌꆠꐥ、ꊨꏦꋧꃅꐥꇈꊨꏦꐰꇑꈌꁈꁨꌐ。
ꀋꋓꀋꉪ，ꃅꑍꃅꉖꆹꌨꏾꊰꃅꊰ，ꊯꅉꄕꅉꑟꇬꎷ。ꋍꈓꋍꃢꃅꃅꋅꂶꌠꈳꅐꄷꑲꆏ，ꑋꈌꂶꌠꑌꄚꄉꊽꏯꇇꃭꇬꎷꑟꃅꑵꉬꅊꇈ。ꃅꑍꋚꀋꍈ、ꃅꉖꒉꀋꄐꃅꉢꒆ30ꈎꐛꀑꅊꇈ，ꉢꄓꆀꉙꁱꇐꁱꌠꑌ15ꈎꐛꀐ。ꃄꐎ15ꈎꅑꅸꇁꌠꆏ，ꉠꉂꏣꉂꑟ、ꇵꂷꑓꁴꈍꑋꆀꉙꁱꇐꐊꄉꅾꁮꇙꇈꂶꅑꀭꇗꀕꑌꀋꐚ……
ꇯꍝꃅꀋꎺꄮꀋꐥ，ꀋꎺꇁꀋꉆ。1995ꄹꈎꃅꍵꆿꇂꍯꁧꏂꄮꇬꆏ，ꉡꆹꉠꃅꄷꒊꃀꒈꌺ、ꁧꀐꂚꃨꐞꄉꇁ，ꀉꁌꀉꂵ、ꀉꄉꀉꂿꅿꉙꅇꂘꅇꉅꇊꉌꂵꊐꃅꐞꄉꇁꌊꏪꐦꐧꌶꅉꇬꄉꌧꇐꂿꇐꊙꈹꇁ。ꇁꌊꌶꅉꋋꂷꇬꑟꇁꄷꆏ,ꆀꉙꁱꇐꇆꅽꉣꑊꆹ，ꀋꌧꆗꑍꍈ，ꄜꆏꏣꑟꐛ，ꄷꀋꁧꐮꉂꐮꑟꅸꀃꑍꀋꃋꋋꄮꇬꑟꇁ，ꄷꀋꁧꉡꑌꆎꐊꅽꊂꈹꄉꋍꑍꋍꉙꃅꒆꀉꒉꅉꐙ，ꃰꊿꈝꃀꇬꄉꊌꐨꏃꁌꆿꇤꒉꃅꆎꄖꆎꌞꊷꇅꀕꃅꉠꇇꈐꊐꀐ。
ꇯꍝꃅꀋꎺꄮꀋꐥ，ꀋꎺꇁꀋꉆ。1995ꈎ12ꆪꇬꃅꑍꂄꑠꄹꉇ，ꉠꁱꇐꉘꃀꁬꌠ《ꏬꑋꅉꈩꆹ》ꄷꁬꌠꆹ，ꎭꈐꎔꄉꀋꋽꌠꇇꄻ，ꇂꈪꌠꃙꍬꃅꁰꄻꊿꐋꀨꈧꌠꇱꄻ《ꆃꎭꉜꇐꁱꀕ》ꋐꌠꇬꄀꎼꇁ，ꄚꄉꉠꂓꉠꌗꆎꄜꆀꃅꇖꈋꆀꃅꌺꇖꇰ，ꋋꆹꉢꁱꇐꁰꄻꈝꃀꇬꑭꁘꂴꁗꌠꉬ，ꋋꆹꉢꆀꉙꁱꇐꁰꄻꈝꃀꇬꄉꉢꊴꊊꌠꉘꃀꂚꃨꀭꌠꇆ！ꄚꄉꁱꇐꋌꁬꉠꏣꀋꑌꐨꋌꄖꄑꌊꑭꁘꊋꑌꃅꁱꇐꁰꄻꈝꃀꋋꏢꇬꍬꆹꀐ。
ꁱꇐꐈꇁꉌꊋꐛ，ꉌꊋꐈꇁꃄꇐꐛ。ꋍꑟꋍꑵꁱꇐꑠꆹꀋꆏꃅꉢꇱꁱꇩꏤꑭꊂꑍꄜꄯꒉ、ꉜꇐꁱꀕꑠꇬꄀꎼꇁꋺꇬꎷ。ꀉꅰꃅ1998ꈎ7ꆪꄮꐰꆏ，ꉠꁱꇐꁬꇩꏤꑭꊂꃅꈁꁠꋍꉎꀋꐥꏠꌠꊌꋺ。ꅑꅸ1999ꈎꌶꅐꄮꇬꑟꄉ，ꉪꀒꎂꂘꃀꌶꅉꌶꅐꌠꌶꌺꌧꇐꂿꇐꋊꇤꊿꀦꌠꃅꄮꇬꆏ，ꉢꆹꉠꂘꃀꌷꐋꈧꌠꅿꉌꇬꌠꇂꃴꄉ，ꉠꅿꁱꇐ250ꁬꌌꌶꅉꁱꀻꀉꒉꐮꀉꒉꂶꌠꇬꄀꄉꄻꌶꅉꑭꊂꋍꏅꌷꐋꂘꃀꊈꀨꌠꃅꑠꃢꀞꊋꐛꋺ，ꄷꀋꁧꉠꅿꁱꇐꌶꅉꇬꇱꎴꌌꎺꄅꃅꁨꇈ，ꀉꅰꃅꁱꇐꄻꊿꀦꋌꃢꀞꄮꇬꆏ，ꌶꅉꇬꏲꌋꎭꂵꄇꇬꂘꃀꂶꌠꆹ，ꉇꃅꉠꅿꁱꇐꄻꊿꀦꋋꃢꇬꅇꁰꄜꋺꄉꉠꇬꈐꊟꊋꊡꐨꀉꒉꐮꀉꒉꃅꐥ，ꄚꄉꉠꂓꋋꍈꌶꅉꇬꂘꃀꌷꐋꃅꇬꀋꌧꌠꀋꐥꀐ，ꋋꑌꇯꍝꃅꅽꑆꊋꉬꑴꇆ！
ꌶꅐꄉꆀꃅꁡꇤꐥꄉꆀꃅꊂꋊꉙꂘꈭꐨꆏ，ꆀꉙꁱꇐꅽꉣꑊꉂꏣꆹꀉꅰꃅꈜꀕꎵꑳꀕꌦꀐ。ꀊꋨꄮꇬ，ꀉꄶꉠꐤꅉꈬꊯꈬꉘꑣꀊꋨꂷꇬꄉ，ꆀꉙꁱꇐꅽꉣꑊꉂꏣꆹꋋꃀꏮꀋꋌꇬꎌ。ꑠꅹ，ꉢꆹꌤꃅꌐꊂꉌꌤꑓꀖꄮꇬꆏ，ꅉꀕꃅꅽꏯꉂꑟꄜꇬꎷ，ꅉꀕꃅꉂꏣꄯꒉꆹꋍꁬꆏꋍꁬꃅꉢꁱꌊꅽꏯꅇꃅꉌꌤꀺꇬꎷꅸꇁ，ꉘꀋꇈꌠꃅꊾꇿꌠꆏ，ꅉꀕꃅꉂꏣꄯꒉꁱꌊꅽꏯꅇꃅꉌꌤꀺꇬꎷꇬꆏ，ꉠꊨꏦꀃꅉꁱꇐꄐꐨꑋꋍꑍꋍꉙꃅꁧꎆꆹꇬꎷꅊꇈꄉ，ꁱꇐꁱꇬꊌꐨꐚꒉꌟꃅꐓꂿꀕꌠꃷꌐꑘꀋꉬꃅꆎꌞꉢꁳꀐ。
ꀋꂿꉌꑟꈻ、ꂿꆏꑓꁴꅐ，ꎺꇊꐝꄧꀕ、ꎺꀱꇊꉠꉌꐡꇬꎷ。ꇯꍝꃅꆀꉙꁱꇐꅽꉣꑊꉂꏣꆊꅑꐛꅹ，2004ꈎ7ꆪꇬꆏ，ꉢꆹꏪꐦꑤꊈꇱꑬꉛꌊꑤꊈꄜꉺꀯꇬꄉꉠꐥꍂꃅꇬꉌꃹ、ꇬꉂꆊꌠꆀꉙꁱꇐꌋꆀꈨꏀꌤꃅꁧꀐ，ꄚꄉꅽꉣꑊꈜꀕꃅꉂꏣꄜꃅꌒ；ꀉꅰꃅ2005ꈎ11ꆪꇬꆏ，ꉢꆹꉘꀋꇈꃅꎆꃀꆿꂷꋍꂷꑌꀋꃹ，ꀉꅰꃅꊽꀑꑊꂷꑌꀋꉜꃅꅇꂷꋍꇬꀉꄂꃅꑤꊈꇱꄀꌊꑤꊈꄜꉺꀯꏹꍓꍉꇬꄉꇯꍝꃅꆀꃅꈨꏀꌤꃅꊿꂶꄻꁧꀐ。ꀊꋨꇈꉈꆏ，ꉡꑌꐞꄚꐞꀋꄚꃅꉠꈬꉘꀉꑳꅳꁖꏅꀋꇮꈧꌠꌋꆀꐮꐞꌊꑤꍰꇓꈓꇬꐥꊿꂷꐛꀐ。ꇯꍝꃅꇬꀖꅇꉉ，ꉢꆹꀋꄷꄸꆀꉙꁱꇐꑠꑵꆹꇬꀋꐥꑵꉬꇮꇬꆹ，ꀃꑍꀋꃋꆹꈐꈍꃅꑋꀉꄶꉢꌷꐋꀊꋨꈨꀋꏭꂘꃀꄻꆀꃅꈬꉘꇿꇬꐥꐺꀋꐙꌠꉬ。
ꉡꆹꑾꌺꑍꐎꐜꄉꅉꀕꃅꏹꇁꒀꃀꂣꈐꇬꊐꇬꎷꂶꀋꏮꆎꉂꅸꇁꇬꎷ。ꆎꆹꉠꂓꉠꌗꆎꄜꋧꃅꇰꌠꀉꄂꀋꉬꃅ，ꂓꉺꑌꀋꃷꎵꃅꆎꇤꉢꁳꋺ，ꃄꐎꈍꑋꈓꅑꅸꇁꌠꆏ，ꉡꆹꂴꊂꃅꋍꑟꋍꑵꁱꇐꌋꆀꁰꒌ3500ꎖꁬ(ꂷ)ꁱꍑꇩꏤꑬꊂꑍꄜꄯꒉꌋꆀꉜꇐꁱꀕꌬ(ꄀ)ꎼꇁꋺ，ꐮꇰꇩꏤ、ꌜ、ꍏ、ꑤꇬꁱꇐꈁꁠ86ꃢ(ꈭ)ꊌꋺ。
ꀋꄹꄷꊿꂷꉠꏯꆎꆀꉙꁱꇐꁱꇬꎖꋪꑟꍈꐥꄷꆹꅲꇮꇬ？ꇯꍝꃅꉢꉉꆎꇰꂿ，ꉢꉜꇬꆹꐛꊈꌋꆀꎖꋪꑠꆹꆀꉙꁱꇐꁱꊿꅿꑞꅉꌐꂷꀋꉬ，ꋋꆹꋌꆀꉙꁱꇐꇬꐞꁧꌠꑊꀡꉬ，ꐛꏦꆹꄡꇗꐛꏦꐛ，ꉈꑴꆀꉙꁱꇐꁱꊿꀒꁨꆹꌠꑭꈏꇓꂵꉬ。ꉪꇗꌧꃀꉪꇗꁳꑊꋌꉱꃀꈹꁧꎼ，ꋧꇗꌧꃀꋧꇗꁳꄵꎭꁧꊰꒃꁧꎼ。ꁍꁈꋦꁍꆀꃅꇤꄧꌺꇖꊂꋊꋍꋏꇈꋍꋏꃅꄚꄉꑲꅉꇤꂷꌆꅉꋋꏬꆹ，ꉠꐥꍂꀋꑍꀋꈤꌠꆀꉙꁱꇐꇁꀦꅿꁍꑗꉬ，ꉠꅿꆀꉙꁱꇐꋧꃅꏟꈯꀕꌠꅉꃀꉬ。
ꉢꆹꀃꑍꋋꄮꀉꅰꃅꉠꆀꉙꁱꇐꀎꋏꋍꏅꂘꃀꌋꆀꐋꀨꑸꀈꆧ、ꀋꈑꃺꃼ、ꐞꃭꁁꐷ、ꏃꎖꃺꉈ、ꀉꑗꃅꎓꏤꃅꑠꀋꎺꇁꀋꉆ，ꆍꊇꅿꉙꅇꂘꅇꑗꈈꀕꌠꀋꎺꇁꀋꉆ，ꆍꊇꅿꉂꏣꉂꑟ、ꑆꊋꑠꀋꎺꇁꀋꉆ，ꉢꆹꇯꍝꃅꉌꂵꄷꈐꄉꆍꏮꈁꎭꀕꀐ。
ꆈꌠꊿꋅꊫꂪꐥꍂꃅꁤꇅꀕ！ꆀꉙꁱꇐꐥꍂꃅꀋꑍꀋꈤ！ꅽꉣꑊꉂꏣꐥꍂꃅꀋꑍꀋꈤ！ꅽꉣꑊꉂꏣꐥꍂꃅꎵꑳꀕ！