ꌗꃅꏢꐓ
    (ꇐꑪꁱꇐ)
    ꋍꈓꃅꋆꃹꆹꄮꇬ，ꇐꏤꁡꇤꇬꃅꁦꌋꇐꏤꀤꌤꄰ，ꀋꃋꌹꈨꊋꇲꈉꄷꈨꄉ，ꊿꇢꆣꃅꌠꊉꏤꀊꂵꏡꌠ，ꀋꃋꌺꑍꊏꃘꈓꏁꈓꐥ，ꈁꑓꏁꁁꃅ，ꁧꃚꑍꍈꌠꇬꀉꄂꅩꀱꀕꃅꐙꑠꂷꋌꏃꇐꏤꀤꌤꅍꅐꇁ，ꇐꏤꀤꌤꄰꏯ，ꋋꆹꉠꀉꂿꄰꃷꇎꂷ，ꐃꆀꌕꂓ，ꁦꋠꌦꇈꉈꏭꊋꇲꋠꇁꌠꉬꑴꄷ。ꇐꏤꀤꌤꆏꃆꍸꃀꑠꊪꀋꇮꇚꑴꉂꄉ，ꄻꀋꈴꀕꃅꐙ。ꄚ，ꇐꏤꀤꌤꑮꃀꉜꇬ，ꐃꆀꌕꇴꎃꏦꎁ，ꑭꋍꀠꇈꋍꐦꃅ，ꈏꑌꊋꅑꀋꎪꀋꑴꂷꉬꋭꄉ，ꇐꏤꀤꌤꄻꀊꈴꌠꑌꋌꀕꀋꅲꃅ，ꈍꑍꀕꊪꉚꂿꄷꋌꊪꄉꇈꀐ。
    ꊪꉚꈍꑍꀕ，ꐃꆀꌕꑭꇇꃄꅉꀋꄉꃅꅷꃅꈊꇬꎷ，ꈒꑌꊋꅑ，ꁦꋠꂷꏣꀋꋌꄉꏽ，ꑠꅹ，ꌕꑍꐛꇬꆏꋍꁮꆪꊋꁌꂸꊴꉬꉐꃅꈼꐙꀐ。
    ꐃꆀꌕꆹ，ꀊꅰꃅꁱꀋꐭꌗꀋꅐ，ꊿꋍꇬꅲꋍꇬꀱꃅꑠꂷ。ꈬꑍꊰꑋꐛꈭꐨꑲꆀ，ꋍꀁꇬꆏ：ꀉꁧꆼꇨꑠꃅꐥ，ꀁꑳꂷꐥ；ꋍꁦꋠꆹꑋꈌꇬꌦꌠ，ꐤꄮꇬꆹꌩꏓꌩꃷꋠꌠ，ꋌꊰꈎꋍꁦꋠꄩꒉ，ꑠꍈꀉꄂꊿꅉꐚ。
    ꃅꑍꃅꉖꑌꈴꐳꐯꈴꐳ，ꋋꑌꆷꋍꑌꐥꀋꋻ。ꈀꄸꉉꇬꑌ，ꇐꏤꀤꌤꄰꀋꃋꌹꂷꊋꇲꌊꇁꇈ，ꁦꋠꂷꏭꀋꋌꃅꌳꉔꄐꅍꐥꄷꉉꌐ。ꈎꏅꄮꇬ，ꑶꌩꇤꎳ、ꌬꀮꌬꀏꒈꋌꒈꑻ、ꃬꐗ、ꀒꌉ，ꋍꉔꌠꃅꋚꌗꒉꌗꃅꅷꃅꄜ，ꑞꑌꋌꀉꄂꃅ，ꀉꁁꇲꀋꋻ。ꋋꑌꑆꐎꎸꁞ，ꑊꑍꒈꆭꃅꐙꇁꀐ。
    ꈎꏅꅐꊂꑠꋍꑍꆏ，ꐃꆀꌕꒉꋴꍯꐎꒈꋌꒉꇈ，ꀑꑊꐛꁏꌊꇫꅐꇁ，ꋌꉉꇬꀋꃉꌌꊿꀀꁦꋠꀿꃶꂶꌠꌡꑠꂷꒉꅶꁉꏮꐺ，ꋌꎷꐺꌠꉬꏭꐛꄷ。ꇐꏤꀤꌤꑮꃀꑌꋍꉌꋲꀕꃅꐙꄉ，ꈌꇵꉐꏠꄉꇫꅲꇬꑌ，ꋌꇬꉇꀋꅲ。ꇐꏤꀤꌤꈨꇈꑮꃀꏭ：“ꀋꍑꀐ，ꋌꆶꇁꌠꉬꏭꐛꀐ”ꄷ。
    ꋌꊂꈬꑍꊰꑋꐛꇬꆏ，ꊉꏤꀊꂵꂶꌠ，ꐃꆀꌕꀉꁧꉬꄷꀋꃋꌺꑠꂷꋌꏃꇫꅐꇁ。ꀋꃋꌺꋋꂷꆏ，ꈬꉘꃅꈋꀀꂷꌡꑴꇬ，ꈌꂄꉐꂂꂷ，ꋌꄹꇬ，ꀂꉈꃅꀀꌺꑮꃀꇴꇁꌠ，ꑘꃛꃤꃙꇁꀐ，ꀁꇬꊿꀋꐥꀐꄷ。ꇐꏤꀤꌤꉉꇬꑌ：“ꋍꀉꁧꇫꇴꇁꑲꆏ，ꉉꅍꑞꈨꐥꂯ”ꄷ。ꑠꃅꄉꊋꁌꉬꇮꌗꋍꀉꁧꁵꇈ，ꐃꆀꌕꃢꈚꋌꒃꌊꁧꀐ。ꋍꄮꇬꂵꆪꈨꌬꀕꄉ。ꋍꇅꌺꐛꊂꑲꆀ，ꇐꏤꀤꌤꑮꃀꂶꌠꇶꍠꀕꃅ：“ꀉꃂ！ꍮꆹ？ꐃꆀꌕꍯꒈꋌꒉꌠꀋꉬꅀ？”ꄷꇈ，ꐯꇯꄓꌊꂱꑱꅉꈴꄉꍮꋌꂶꇉꂶꌠꎹ。ꀤꌤꑮꃀꎹꅷꇤꄸꑭ、ꈵꇂꃴ、ꀀꅉꇬ，ꇿꑟꑌꎹꀋꊌ。ꇐꏤꀤꌤꎹꅷꄇꂿꉈꏭꑞꑌꇬꀋꎍ，ꎹꅷꒉꋴꑟꇬꑲꆀ，ꍮꋌꂶꇉꂶꌠꀋꇙꀋꑐꃅꇫꎍꇈ，ꏢꁮꇬꉐꀖꁧꑌꇫꎍ。
    ꊿꇫꂿꌠꉉꇬ，ꎆꈤꐯꉐꇯꆐꆳꂾꇚꄉꑠꇷꄚꎍ，ꐃꆀꌕꍯꒈꋌꇀꄮꇬꆏ，ꀏꑋꌦꀋꑌꌦꄷꌦꆏ，ꆳꂾꇬꄉꁦꋠꈬꉘꃅꈋꀀꌠꌡꑠꑍꂷꐂꇁꇬꀳ，ꋍꂷꈻꋍꂷꄹꃅꈻꆳꂾꇬꊐꌊꁧꀐ。ꐃꆀꌕꈍꑍꇬꀉꄂꏅꇈ，ꊁꆏꏅꊊꀋꈨꀐ，ꊵꑵꏢꌌꈌꋍꄉꐤꁮ。ꋍꈭꐨꆏꀋꃋꌺꑍꂷꁖꇁ，ꋍꂷꆹꉪꋌꀋꌧ，ꋍꂷꆹꊉꏤꀊꂵꉬ。ꆳꂾꈐꏭꆏꂿꀋꐚ，ꐃꆀꌕꂶꌠꐒꈐꏭꊐꄉꌠꌡꄷꉉ。
    ꎙꋠꊂꆏꊉꏤꀊꂵꂶꌠꇀꌦꀐ。ꇐꏤꀤꌤꇬꏭ：“ꐙꎲꀋꑌꏡꌠ！”ꄷ，ꇐꏤꀤꌤꑮꃀꇨꇅꃃꌌꇬꏭ：“ꅽꊨꏦꏃꇁꌦ，ꊿꈽꇑꌊꁦꌦꃅ，ꋍꑠꑞꉬ？ꉪꋋꑷꅽꈩꅍꑷꅀꑞ？”ꄷꂇꇈ，ꊉꏤꀊꂵꂶꌠꇨꆰꇨꊸꃅꇬꏭ：“ꀊꃂꀊꃂ！ꉢꊿꊏꅞꌠꄸ。ꆐꑊꑎꏦꀐ。ꋍꋋꀂꏁꋍꈚꊋꃅꁧꄷꉢꇕꇬꎷ，ꋍꀉꁧꂾꂁꄉꇀꂷꉬꉘꀋꇉ。ꀋꃋꊁꋌꃢꆏꉢꀋꎪꃅꃪꂷꎹꌊꇁꂿ……”ꄷ。
    ꐃꆀꌕꆹ，ꋍꀉꁧꂾꂁꄉꉈꏭꊋꃅꇁꌠ，ꋍꀉꁧꆏꌺꀄꊭꂶꌠꑮꃀꒃꂿꄷꄉ，ꋌꌊꀋꃝꇬꌺꑮꃀꒂꎆꀋꊌꀐ，ꑠꅹꌌꉼꏤꃘꌺꃝꄉꅊꇈ。ꐃꆀꌕꊿꈻꌊꀉꁧꅍꑟꊂꆏ，ꀉꁧꂶꌠꇬꏭꑮꁧꌶꄷꇈ，ꐃꆀꌕꇫꉬꀋꅲꄉ，ꀉꁧꆏꋍꌺꂶꌠꁳꏦꀨꌌꐒꄉꇔꏬꌆꇬꊐꌊꁧꎻ。ꐃꆀꌕꋍꑍꌠꉨꑌꉩ，ꊨꑌꊨꃅꅷꉼꏤꁡꇤꇬꑟꇬꆏꃛꌞꇂꑴꅍꀐ。ꏬꌆꇬꄉꈻꅐꇁꄮꇬ，ꉼꏤꃘꌺꃺꃶꂶꌠꌋꆀꂴꆽꐃꆀꌕꀁꑳꂶꌠ，ꊋꑌꊋꀮꍝꃅꇬꌫꄉ，ꀍꃈꊌꀋꄚꌦ。ꊿꊇꀋꋓꀋꉪꃅꇇꄝꎼꒉꄷꌦꆏ，ꐃꆀꌕꀂꏾꌌꀉꁌꈄꇂꃴꇮꊙꇬꋖꄉ，ꀂꏾꇬꈍꒈꂷꀙ，ꌦꅪꇤꀮꍝꀐ，ꂥꌗꑍꇱꃬꂷꊂꈌꇬꊐꇈ，ꂪꌦꀋꅪꂷꌌꄟꄉꇬꑌ，ꌦꇫꅐꇬꎷ。ꉼꏤꃘꌺꋍꑊꀉꄂꊿꎤꑲꂷꇬꊐꄉꇬꑌ，ꄡꇗꇬꊎꉩꑴꌦ。ꊁꆏꐤꅉꐤꅉꃅꐃꆀꌕꑌꇖꅒꅷꐱꁍꀋꄐꃅ，ꀒꁨꐛꀐ。ꉼꏤꃘꌺꑌꈒꑌꊋꅑ，ꑘꏂꃤꇫꇮ，ꑲꑌꊨꏦꃤ，ꋍꄩꀀꁈꀉꁧꂷꆹꇬꀋꐥ，ꈀꄸꉉꇬꑌꋍꎭꈓꂄꀐꄷ。ꈎꂫꇬꆏꌺꀧꀕꍝꀕꑠꍈꁨꇈ，ꌌꀈꃀꂓꄉ。
    ꌕꈎꐛꇬꆏꉘꀋꇉꃅ，ꉼꏤꃘꌺꂶꌠꆅꏂꊌꌊꌒꇁꑲꆀ，ꋙꈠꍔꋠꇈꆄꁏꌊ，ꀊꏀꏃꃅꌦꇫꈴꁧꀐ。ꐂꆀꌕꆏꌩꏓꌊꃷ、ꆿꏾꊴ、ꁮꉘꃅ，ꀋꐥꀉꎭꀕꃅꌺꂶꌠꋌꉘꄉ。ꊁꄹꈎꑋꈌꇬꑠꋍꑍꆏ，ꐃꆀꌕꃅꄜꄷꌦꆏꋍꀃꈈꁉꄉ，ꊮꇁꂷꌌꊹꄔꋍꊮꇁꄻꀈꃀꁳꀃꈈꁭꑌꄉ，ꊹꄔꀖꎽ，ꋍꑴꅉꆏꑳꊂꄉ，ꌩꋲ、ꍯꒈꋌ，ꍯꄻꉽꐯꇬꏬꄉ，ꊹꄔꏬꂿꄷꄮꇬꑲꆀꀈꃀꇴꇬꆏ，ꇬꀋꉐ，ꋌꁖꉈꏭꄉꉜꇬꆏ，ꊹꄔꈧꌠꆹꀗꏒꃄꅉꇬꄉ，ꀈꃀꆹꐜꀋꈨꀐ。ꋌꇿꇬꅱꑌꐜꀋꈨꄷ，ꋋꇅꇬꑲꆀꇫꃶꇫꋩꃅꊾꇴꌊꇬꎷꁧ。ꎹꅷꁯꋒꐯꉐꆏ，ꇉꈫꇁꄿꇬꈴꄉꎹꅷꇁꑲꆀ，ꀈꃀꑬꅮꁆꍲꁧꀕꇬꅑꇊ，ꈀꄸꑌ：“ꊿꈔꀐ，ꆿꃀꒃꌊꁧꏭꐛꀐ”ꄷ。ꊛꄉꎹꅷꆹꇬꆏ，ꀋꐯꄡꍏꀕ，ꀈꃀꄚꁬꄝꇬꎍꇈꀐ，ꇬꇉꇬꋍꌊꐯꇯꆿꃀꇵꋠꌐꀐ，ꊮꇁꍇꌠꄡꇗꇇꊭꄉꑴꌦ。
    ꐃꆀꌕꀋꃉꆏ，ꊾꄂꂷꀉꄂꋒꀐ。ꃅꍵꐮꆏ，ꑲꑌꉼꏤꃘꌺꃺꃶꂶꌠꇱꎴꌊꁧꀐ，ꋋꆹꊿꈹꉈꏭꎭꀐ。ꐃꆀꌕꃸꅉꎷꀋꊌꃅ，ꄡꇱꊮꇁꂷꌋꆀꀀꀨꀉꁘꍇꌠꉅꌊ，ꇐꏤꁡꇤꇬꊉꏤꀊꂵꎹꆹꌦ。ꊉꏤꀊꂵꆏꏃꌊꇐꏤꀤꌤꄰꁵꆹꌦꀐ。
    ꇐꏤꀤꌤꑮꃀꂶꌠꀒꉭꊂꉫꃅꋍꃢꉪꇈ，ꐃꆀꌕꏭꀀꀨꒃꌊꑳꁥꇬꀀꄉꒉꄷ。ꇐꏤꀤꌤꄡꇗꄺꆹꄻꀋꈴꑴꇬ，ꄚꊿꂱꇪꇐꋒꑠꌌꀠꏳꀠꎴꀉꄂꃅꉆ，ꌗꃅꏢꐓꇬꆏꋌꁳꇇꄀꎻꀋꉆ，ꋌꀋꉬꇬꆹ，ꁧꀋꎴꇤꀋꌃ，ꀉꁌꀋꁧꑌꇫꋠꀋꅲꌠꉬꄷ。
    ꇐꏤꀤꌤꄰꄇꃀꐯꄇꃀꃅꀞꌠꆏ，ꌗꃅꏢꐓꄹꉇꉬꌠ，ꀋꉊꊂꐃꆀꌕꀋꆷꐯꀋꆷꌠꑌꋋꄹꉇꉬꌠ，ꀋꃋꋌꃢꆏꋍꃅꅍꇬꀋꐊꀐ。ꍌꊭꄻꄇꄤꇬꄉ，ꋌꀗꊪꌋꆀꎋꌌꁸꇧꄉꒉꂿꄷꇬ，ꀤꌤꑮꃀꇬꏭ：“ꐃꆀꌕꆏꄡꐛꃅꄉ！ꉠꉢꒃꇁꂿ”ꄷ。ꋌꀱꑣꄔꅍꒃꒉꇬꑌ，ꇬꏭ：“ꐃꆀꌕꆏꄡꐛꃅꄉ！ꉠꉢꒃꇁꂿ”ꄷ。ꋌꈍꑍꏮꀕꇈ，ꄡꇗꃅꅍꎷꀋꊌꃅ，ꋍꉌꋲꀕꃅꀱꉇꑴꑌꁧ。ꋋꋍꑍꌠꋍꃅꅍꆏ，ꇤꄸꑭꑌꄉꃆꄔꍈꀉꄂꏦ。
    ꊿꀉꁁꌠꋍꏭꄡꇗꐃꆀꌕꄷꇴꑴꌦ，ꄚꂴꆽꌟꃅꑖꈈꃅꀋꐛꀐ；ꋍꏭꑌꀠꏲꑴꌦ，ꄚꂴꆽꌟꃅꒈꉐꃅꀋꐛꀐ。ꋋꆹꑠꑌꀋꅲ，ꈀꄸꂾꑌ，ꋍꌺꆿꃀꑝꃆꂮꌌꁮꅉꌧꃅꌧꄉ，ꋍꊱꉉꌦ，ꑓꁴꊱꅏꌦꃅ，ꑓꁴꇇꁉꊭꌊꐺꇬꎷ。ꁮꅉꋋꂷꑌꐮꐯꃅꂿꄐꑌꐥ，ꌺꃰꈨꈭꐨꉌꂵꐛꀋꐛꃅꑊꑍꁏꌊꁧ；ꌋꑌꈨꊂꇫꉌꌒꄀꌠꌟꃅ，ꇬꈽꑓꁴꎴꅐꇬꎷ。ꈀꄸꂿꀕ，ꋍꉌꎭꑓꁧꃆꂮꋍꊱꉉꇬꎷ，ꀋꄸꄷꀉꑳꑍꈓꌕꈎꂷꂿꑲꆏ，ꋍꀈꃀꃆꂮꋍꊱꉉꄚꇱꇬꎷ，“ꀃ——ꀂ！ꉠꀈꃀꑌꇫꐥꑲꆏ，ꋍꒈꀐꀞ。……”ꄚꋌꊂꀊꉗꀋꐛꇬꆏ，ꈀꄸꑌꋍꅇꂷꋋꈨꅲꇎꅲꅗ，ꈨꇁꄷꌦꆏꉌꈊꑓꋩꇫꅲꀋꏾꃅ，ꄓꇫꈴꁧꀐ，ꋌꀉꄂꈌꉛꃅꇬꉆꇊꇬꎷ。
    ꋌꊂꆏ，ꋌꇿꑌꇿꉆꂿ，ꁱꌺꂷꌟꃅꐙ，ꒈꆭꀕꃅꑠꋍꑍꀋꐥꀐ。ꃥꑟꄰꉜꇬꑌ，ꋌꂴꆽꌟꃅꑬꐳꇇꃭꃅꀋꐛꀐꄉ，ꅇꉉꉐꉇꇬꑌꀋꅰꃅꄻꀋꈴꇴꃅꉉꇁꀐ。
    ꋓꉪꀋꁨꃅꋍꈓꈤꒉꌦꀐ，ꏂꆨꒈꉬꑍꈬꊂꆏ，ꇐꏤꀤꌤꄰꆹꈎꏀꂯꄐꏤꃛꌦꀐ，ꀋꃋꋌꃢꆏ，ꀉꁁꑗꏤꀊꂵꄷꑠꂷꊋꇲꌊꀠꏳꀠꎴꃅꈽꇁ。ꑗꏤꀊꂵꆹꉌꎔꑌꌠꉬꄷꄉ，ꎸꑫꆏꀋꋠꂷ，ꃫꑌꐗꀋꅲ、ꀒꑌꌉꀋꅲ，ꌬꀮꌬꀏꍈꀉꄂꒈꋌ。ꐃꅿꌕꆹ，ꃆꄔꍈꏦꉈꆏꃅꅍꎷꀋꊌ，ꄡꇱꇫꑌꄉꑗꏤꀊꂵꌬꀮꌬꀏꋋꅉꉜ。
    ꑗꏤꀊꂵꆏꐃꅿꌕꏭ：“ꅽꁦꋠꊁꂶꌠꆐꑊꐯꈽꑍꈓꑋꊌꀋꐥꃅ，ꆏꋌꎼꑽꃤꋍꒈꏢꀵ。ꃆꏂꊂꑋꆏꌦꈭꐨ，ꅽꒌꆠꑌꁦꋠꑍꂷꌠꌌꐯꅒꌠꉬ，ꄻꈀꄸꁵꂯꆏ？ꊾꋠꃀꎺꀋꉻꑌ，ꆏꋌꋲꑍꁆꃅꋍꑊꁵꌠꉬ”ꄷ。ꋋꈨꀕꊂꆏ，ꐃꆀꌕꀊꅰꃅꋌꇷꏾꁴꌊꁴꌠꌡꀐ。ꑗꏤꀊꂵꊛꄉꇬꏭ：“ꉢꉪꇬꆏꏛꃅꐎꋊꆹꑲꆀꍑ。ꌦꈭꐨꎭꑎꆹ，ꎆꃀꍈꅐꌊꁱꑳꇬꁳ，ꃀꄳꏢꄻꅽꎃꊐꄉꊿꄙꁳꄔꎽ，ꊿꉐꁳꐂꎻꑲꆏꐍꅐꇁꌠꉬꑴ”ꄷ。
    ꋋꄹꉖ，ꑗꏤꀊꂵꉉꈧꌠꐃꆀꌕꉪꎼꇁꇬ，ꀊꅰꉪꀊꅰꉪꀊꅰꋍꐬꆠ，ꃅꄜꄮꇬꑲꆀꀀꃅꃹꒉꇈ，ꀄꂼꂻꀋꌒꑠꈁꇯꂻ。ꊁꄹꉈꍪꋠꊂꆏ，ꋌꆹꌊꁱꑳꇬꄉꃀꄳꊐꂿꄷꇖꂟꆹꇈ，ꁱꑳꇬꏲꂶꌠꂴꆽꆏꇫꉬꀋꅲꄉ，ꋍꇨꐒꇫꃶꌊꑓꁴꅏꄮꇬꑲꆀ，ꀋꉬꀋꉆꃅꉬꐮꄉ。ꎆꃀꆏꄨꑼꊰꑋꄙꃅꈼꄉ。
    ꋍꈭꐨꆏ，ꋍꑍꌠꁰꑌꀋꐭꌗꑌꀋꅐꃅ，ꏦꀑꏦꂪꀥ，ꑶꌩꇣꑻ，ꉐꀖꒈꋌ，ꍯꒈꋌꇬꎷ。ꋍꈓꃅꇁꂯꄉꄮꇬꑲꆀ，ꇐꏤꀤꌤꑮꃀꄷꄉ，ꋍꊋꁌꈀꃅꈁꑽꃅꌗꌊꀞꑼꊰꑋꂷꐛꇈ，ꋌꌌꁱꑳꇬꁵꇈꀐ。ꀱꇁꄮꇬꆏꈮꈜꌊꇫꅐꇁ，ꉌꇿꇴꃅꇐꏤꀤꌤꑮꃀꏭ，ꀂꁱꑳꇬꄉꐎꋊꃀꄳꊐꄉꇈꀐꄷ。
    ꄚ，ꃅꋆꏂꆨꉱꏢꀕꄮꇬꆏ，ꇐꏤꀤꌤꄰꌗꃅꏢꐓꌦꀐ，ꇐꏤꀤꌤꑮꃀꌗꃅꏢꐓꅍꑞꑌꄐꄉꌐꀐ，ꐃꆀꌕꒉꌊꀗꊪꌋꆀꎋꒃꒉ。ꋍꎴꉘꀋꇉꃅ，ꇐꏤꀤꌤꑮꃀꂶꌠꇧꍠꇧꆽꃅ“ꐃꆀꌕ！ꆏꄡꐛꃅꄉ！”ꄷꌦꀐ。ꋋꇅꃅꇇꋌꍕꌊꆹꇈ，ꀑꑊꆈꁴꀕꀐ，ꀉꁁꑌꒃꀋꒉ，ꉚꉬꃅꄃꄚꉆꇬꎷ。ꉆꅸꇐꏤꀤꌤꌗꃅꇀꄮꇬꆏ，ꇬꏭꉇꑴꒉꄷꇬꑲꆀ，ꉇꅐꇁ。ꋍꉌꂵꀬꍉꃅꉪꇬ：ꁱꑳꇬꄉꐎꋊꃀꄳꊐꄉꀐꇬꑌ，ꊨꏦꐩꍂꃅꐍꅐꀋꉆꀐꌠꅀꑞꉬ，……。
    ꀋꃋꋌꃢꋌꀉꒉꃅꃚꐈꅺꐈꀐ，ꊁꄹꉇꆏ，ꋍꑓꂷꑌꉖꒉꀐꄷꀋꁧ，ꈒꊰꊋꐞꀐ，ꀉꉌꅔꅐꇀꂷꌟꃅꆠꌋꄲꃅꆟꈯꇬꎷ；ꀋꉬꀐꇬ，ꇿꑌꀕꁱꌺꂷꌟꃅꀋꇙꀋꑐꀐ。ꈎꁂꂷꀋꐛꃅ，ꀂꏾꑌꀑꐎꀐ，ꎺꇓꁍꇑꐙꀐ，ꅉꀕꃅꍣꒈꋌꌠꑌꀋꎺꇬꎷ。ꇐꏤꀤꌤꑮꃀꑌꅉꀕꃅꋍꑓꋪꀂꏽꄉ：“ꐃꆀꌕꑞꃅꑠꃅꐙꀐꇆ？ꂴꆽꇯꆐꄡꀋꈁꃅꌊ”ꄷꉉꋺ。ꋌꀋꈁꏢꉨꀐ。
    ꀋꉗꀋꐛꇬꆏ，ꐃꆀꌕꇐꏤꀣꌤꑮꃀꇱꇤꇧꎭꀐ，ꋍꏭꀱꊉꏤꀊꂵꎹꒉꄷ。ꈀꄸꑌꋍꊋꇲꀋꅲꀐ，ꊉꏤꀊꂵꑌꃅꅍꎷꀋꊌꀐ，ꐃꆀꌕꋚꂟꂷꐛꀐ。ꀑꐎꈴꀐ，ꊿꇖꊰꈎꐯꉐꂷꌡꀋꋍꀐ，ꊿꁱꂷꌧꂷꂿꑲꆏ，ꑓꋪꍻꇬꀳꄉ：“ꊿꌦꈭꐨ，ꇯꍝꃅꒌꆠꐥꅀꀋꐥ？……ꏃꃅꉬꉎꇯꍝꃅꏦꑳꐥꅀꀋꐥ？……ꋍꑷꌠꃅꌦꀐꌠ，ꇯꍝꃅꐮꂿꄎꅀꀋꄐ？……”ꄷꅲꇬꎷ，ꄚꈀꄸꂷꇫꅇꀱꄎ！ꅇꀱꄎꄷꇬꑌ，ꋍꏭꈍꒈꍈꉌꌒꄀꄐꂯꆏ！
    ꀋꋓꀋꉪꃅ，ꈎꏅꄮꇬꑟꇁꌦꀐ，ꇐꏤꁡꇤꇬ，ꈀꄸꑌꇬꊎꈎꏅꌗꃅꏢꐓꇰꀐ。ꋋꄹꉇꆹ，ꂿꃋꉩ，ꃰꌦꃘꑠꋍꑍ，ꇐꏤꀤꌤꄰ，ꈎꏅꆪꆗ、ꐰꇑꈐꉘꆦ、ꀿꍤꅥꇰꄮꇬꆏ，ꐃꆀꌕꆹ，ꐚꒉꋴꃱꁍꇬꀀꄉ，ꊾꃅꑌꇫꅲꌠꀋꊌꃅ，ꌕꈈꑋꀋꄹꃅꌦꀐ。