ꎭ ꂵ ꃅ ꇢ ■ ꃅꇢꆿꐂ　　 发布时间：2005-5-12 16:52:49
　　ꅇꉉꊾꌶꏦ,ꑬꐓꊿꄔꏦꃅꅇꂷꋋꇬꌊꎭꂵꃅꇢꀊꏀꃅꌤꃅꇁꌠꋋꂷꃆꃉꄜꇬꆹꊒꐯꊒꌠꉬ。ꋌꌤꃅꅉꋌꈚꄉꌤꃅꇁꊂ,ꋍꀂꅉꋌꆺꌊꎐꀋꅑꉻꀋꅑꌠꑘꄃꐛꄉꊾꉅꊾꑣꅈꂷꀋꐛ.ꋋꆹꋓꉪꀋꁨꃅꊾꌋꆀꐮꉅꐮꑣꇁꏦꌠ。
　　ꄡꃅꇬꆹ,ꀋꃅꑲꆀꌶꅐꇁꌠꉨꊾꏦꅈꀋꐥꄡꐥꌠ,ꄚꋌꋍꀉꄉꅇꀋꃅꀋꉆ.ꋍꀉꄉꐥꐨꎖꋪꆹꋍꋋꍂꉪꇐꉬ.
　　ꎭꂵꃅꇢꌶꅐꂯꑬꆏꑠꃢ,ꋍꀉꄉꋌꏁꑿꉚꁧ,ꋍꀉꄉꋍꏭꎔꃅꑿꆫꅉꉜꄷ。ꋍꑍ、ꑍꑍ、ꌕꑍꉬꑍꇫꈴꁧꀐꇬꑞꑌꋌꋌꉚꅐꀋꇁ!ꋍꀉꄉꉌꀋꃹꉻꃅꐙ,ꊁꄹꉇꆏꋌꎼꎔꃅꑿꐺꅉꉜ,ꑿꂴꐊꂶꌠꇓꂵꌸꇬꎷ ，ꊁꋒꇈꂶꌠꂷꏦꊌꇬꎷ.ꂴꑌꂴꀋꐊꊁꑌꊁꀋꐊꌠꆏꑞꑌꋍꀂꈇꀋꆹ。
　　“ꀉꄉꅽꉪꐨꉢꌧꀐ!”
　　“ꌧꀐ?!”
　　“ꌧꀐ!”
　　“ꊾꑌꑠꃅꐥꌶ,ꋋꑠꑲꆀꌧꇐꀉꇨꌠꉬ。”
　　ꌶꅐꄉꈮꈜꈩꄹꉖ,ꉂꇁꅉꌠꂘꃀꂶꌠꑠꇬꉉ:ꌷꐋꊈ,ꆍꌶꅉꀊꂥꅉꇬꄉꌶꅐꌠꆹꌧꇐꅉꃀꍈꀊꄂꌧꑳꌦꌠ,ꌧꇐꀉꇨꌠꆹꐥꐨꇬꑲꆀꌷꊊꄿꌠꉬ！
　　ꌷꐋꀉꑌꌠꆹꂘꃀꅇꂷꋋꇬꋀꊇꉜꋍꑵꃅꀋꄉ,ꈜꀕꇈꋀꒊꒉꃅꐙ,ꎭꂵꃅꇢꀉꄂꅇꂷꋋꇬꃅꉪꇐꈤ。
　　ꌤꃅꅉꎸꇬ,ꎭꂵꃅꇢꆹꈝꐮꃅꎹꊊꄷꄹꉆ。ꄚꋋꆹꎭꂵꃅꇢꑴꅉꇯꆐꌷꌊꃪꌧꇐꐥꐛꅹ,ꋋꈨꀋꉬꑲꆏꋋꄮꆹꌤꃅꅉꎹꊋꐯꎹꊋꄮ，ꌶꌺꌶꅐꇬꈻꎷꌠꀋꊋꑲꊋꋠ。
当前位置：第1页　　请选择>>
ꎭ ꂵ ꃅ ꇢ ■ ꃅꇢꆿꐂ　　 发布时间：2005-5-12 16:52:49
ꎭꂵꃅꇢꆹꌧꇐꀉꇨꐛꅹꃅꋌꎖꍏꌩꑘꌤꃅꏳꊌ,ꋋꆹꌤꃅꅉꈀꄸꑌꇬꉚꂄꈚ。
　　ꌤꃅꅉꇬꌟꒉꌕꑻꐥ,ꋍꂷꋑꀋꋒꒊꄝꃴꇉꀕꂷꀉꏯꉌꂵꑞꉪꌠꊿꋋꌌꉪꀋꄐ。ꎭꂵꃅꇢꆹꋍꀉꄉꂘꐪꌬꂿꄷꄉ,ꋌꀒꁨꋍꁘꃅꑞꑲꆀꌟꒉꉬꌠꀋꉪꀋꉆꀐ,ꑠꅹꃅꋌꎼ《ꉌꈲꅇꏓ》ꇬ‘ꌟꒉ’ꄷꅇꏓꋋꂷꑞꄜꌠꋍꃢꎹ。
　　《ꋋꄮꉌꈲꅇꏓ》ꄯꒉ806ꏾꌠꇬ,ꅇꏓ‘ꌟꒉ’ꄷꋋꂷꏭꑠꃅꄜ：“ꌟꒉꆹꊿꏁꌌꀒꁨꆹꌠꄜ”。
　　ꎭꂵꃅꇢꈍꑋꁮꆪꂷꑭꀕꋧꀕꃅꌌꉪꉚꇈ,ꉌꈲꅇꏓꋋꇬꈍꃅꑌꋌꋋꉨꀋꀽ。ꅇꏓꇬꉉꇬꆹꌟꒉꆹꂴꅑꄉꏃꂠꌠꉬꄷ,ꄚꋌꈀꋒꌥꌠꌟꒉꆹꑿꆫꌠ,ꋀꂴꅑꄉꃅꀋꋻ。
　　ꃅꅍꎷꀋꊌꇈ,ꎭꂵꃅꇢ“ꒉꈫꌠꀉꏯꇓꂵꌋꄉꐥ”ꃅꉪꀐ。
　　ꌟꒉꀉꒉꂶꌠꎂꀕꃅꉜꇬꆹ,ꊿꐊꌒꑵꌠꂷ,ꃆꅉꋍꑍꋑꀋꋒꀑꑊꒊꆭꀕ。ꃶꐚꃅꇬꆹꊿꉌꂵꀉꆈꑵꌠ,ꈜꀕꇈꋌꌌꊨꌠꆹꌤꃅꋒꌠꀉꄂ。
　　ꌞꂵꇖꀕꌠꆏ,ꀋꃋꋋꄮꌤꃅꇬ,ꌤꀋꃅꌠꆏ,ꑆꊋꀋꐥꅑꑘꑌꀋꐥ,ꌤꃅꋒꌠꆏ,ꑆꊋꀋꇎꀋꂪꅉ
　　ꂯꀋꐰꇬꐥ,ꈜꀕꇈ,ꌤꀊꅰꃅꋒꀊꅰꃅꑽꅉꐥ!ꀂ!ꅇꂷꑠꆹꇐꀳꃅꐙꌠꉬ!
　　ꎭꂵꃅꇢꏤꌤꃅꅉꇬꈎꂫꌤꃅꃀꂷꈿꇈ,ꌤꃅꏓꄜꄯꒉꁬꌠꊿꁳꁱꈇ。ꌟꒉꀉꒉꂶꌠꃀꈿꅈꄉꈀ
　　ꄸꁱꂯꃅꇖꀐꇬ,ꑍꃀꑍꌤꀞꅉꐥꄉꌤꃅꄯꒉꁱꈧꌠꃅꁱꐭꂷꀋꐥ。

ꎭ ꂵ ꃅ ꇢ ■ ꃅꇢꆿꐂ　　 发布时间：2005-5-12 16:52:49
ꎭꂵꃅꇢꆏꐈꊿꑍꂷꐛ,ꋍꂷꆏ
　　ꆈꇫꑌꃅ,ꋍꂷꆏꀋꎺꃅꇇꋌꎇꎼꆹ。
　　ꊿꀉꁁꈧꌠꎭꂵꃅꇢꇇꎇꌠꂿꇬꆏ,ꋍꂷꋑꀋꋒꃣꇖꃤꇔꎼꒉꌠꀉꏯꇿꑌꌐ,ꎭꂵꃅꇢꋋꇅꇬꑲꆀꊨꏦꇇꎇꑽꀐꌠꉪꐙ。
　　ꄚꈍꃅꑴꌦꂯꀒ,ꊨꏦꅇꉉꂴꅞꀐ!ꀋꃅꑲꇬꀋꃅ,ꃅꑲꆏꃅꌊꃪꄻꅐ。
　　ꃶꐚꃅꇬꆹꌤꋌꐘꎭꂵꃅꇢꇫꊝꇬꊋꋠꅍꀋꐥ,ꃅꇢꄯꒉꀗꄮꇬꆹꋀꋌꁥꇬꌤꃅꄯꒉꁱꇬꂴꅑꂶꌠ。ꃅꇢꌕꑍꁱꇐꎹ,ꋍꑍꏓꐯꇯ,ꋍꑍꁰꏦꉤꇈ,ꃘꑍꄹꉇꌠꆏꌤꃅꅇꄜꄯꒉꐥꐯꐥꑠꁬꋌꁱꎼꇁꀐ。
　　ꄯꒉꁬꌠꉌꇿꑓꇿꃅꋌꄌꌊꌟꒉꀉꒉꂶꌠꀨꇈ,ꈍꃅꐙꀋꐚꀐꉂꉌꂵꌼꄉꇁꉚꑌ。
　　ꀡꇪꏃꍗꏓꂶꌠꇫꅐꇁꇈ,ꋍꈁꑓꇬꎭꃅꉈꃅꐙꌐ。
　　ꃅꇢꁱꄉꌠꄯꒉꁬꌠꇬꁱꂷꑠꎆꇬꅑ:“ꀊꎴ、ꉉꂥꀋꀘ、ꁰꀱ!”ꈜꀕꇈ,ꁱꂷꈧꌠꇯꆐꄓꁧꄊꏽ。
　　ꈻ,ꃅꇢꑴꆏꏂꆨꌟꃅꈻꌟꃅꐛ。
　　ꃅꇢꀑꈎꑭꈎꌕꑍꉪꇈ,ꄡꑞꐛꅹꉬꌠꋌꀕꉨꀋꐙ。ꍗꏓꂶꌠꇫꎭꃅꉈꄉꑠꄷ：“ꆏꁱꌊꃪꆹꃪ
　　ꑴꇬ,ꄚꀋꉬꀋꉆꍈꇫꊰꇈ!”ꉉꅉꃅꄯꒉꁬꌠꈐꌤꃅꑆꊋꅑꅉꂾꌟꒉꀉꒉꂶꌠꂓꋌꁱꂴꄀꌐ。
　　“ꄿꀐ,ꋍꃢꐒꀱꄉꌌꒉꌦ。”
　　ꋌꃢꆏꀱꐳꐯꀱꐳ,ꁱꂷꁱꇬꄀꄉꌠꑌꉜꌒ。
　　“ꁱꌊꃪ!ꉈꊼꇅꄺꀱꌦ。”
　　ꍗꏓꃅꇢꏭ：“ꄺꀱꄻꀋꅐ,ꐒꀱꄉꌌꒉꑲꆏꄿꀐ。

ꎭ ꂵ ꃅ ꇢ ■ ꃅꇢꆿꐂ　　 发布时间：2005-5-12 16:52:49
”
　　ꄚꄉꁱꂷꀕꂯꄻꀋꀱꃅꃅꇢꐒꌌꒉ,ꋌꃢꆏꀱꐳꐯꀱꐳ,ꄮꈉꈫꁁꂷꇯꀋꐛ。
　　“ꍑꃑꇫꎭ。”
　　ꌤꃅꏓꄜꃀꈿꌐꊂ,ꌟꒉꀉ ꒉꂶꌠꏓꄜꅇꎴꉉ。
　　“ꃀꋋꂷꈿꌊꊋꐛ,ꈿꌊꃪꐯꃪ。ꌤꃅꄛꇰꄯꒉꑌꁱꋒꐯꁱꋒ,ꋍꍈꈚꂪꅑꌠꆏ,ꉢꊌꋓꉪꀋꁨꃅꑆꊋꃅꉠꃤꐛꌐꀐ!ꋋꌺꀂꏽ,ꄯꒉꁱꌠꋌꊂꊼꇅꋓꉪꁨꄉ。”
　　ꌤꃅꊿꃀꈿꇫꑌꈧꌠꈀꄸꑌꀑꉞꇫꑌꌐ,ꎭꂵꃅꇢꀉꄂꊿꋖꀂꏾꇬꄀꌠꀉꏯ‘ꉻ’ꄷꑠꇅꂿ。
　　ꌟꒉꀉꒉꂶꌠꑓꏮꅶꍯꊼꇅꉜꇈꑠꄷ：“ꐋꀨꎭꂵꃅꇢ,ꀋꃋꋌꃢꌤꃅꄜꅇꁱꇬ,ꁱꌊꐛꒆꃅꀋꐛꑴꇬ,ꄡꁰꍋꊋꂫꐥ,ꑠꅹꄀꌌꌤꀞꅉꄉꌤꃅꒉ。”
　　ꊨꅰꐮꐊꌠꆹꌟꒉꅿꏡꁈꉬꌠꅀ?
　　ꌤꀞꅉꄉꌤꃅꇬ,ꌤꀉꑌꇈꈍꃅꊋꏃꑲꑌꌞꉌꂵꒈꊭꀋꄐꌠꎭꂵꃅꇢꅉꐚ,ꄚꋌꊨꏦꑴꅉꎔꃅꀕꇈ,ꊼꇅꑬꐳꇇꐳꃅꀕꑲꆏꌤꀋꅐꋭꃅꉪ。
　　ꎭꂵꃅꇢꌤꀞꅉꐥꇁꊂ,ꌤꃅꅉꇬꁦꎴꇤꌃꃅꐙꇁꇈ,ꌟꒉꀉꒉꂶꌠꈍꁯꑓꂷꑌꉜꌒꆹꀐ。ꄚꀊꉗꀋꐛꇬꆏ,ꌤꃅꅈꈭꈭꇍꇍꁦꎴꇤꌃꃅꐙꀐꌠꊿꋌꀋꎺꌦꀐ,ꈜꀕꇉꑲꌩꇣꑻꌠꐛꐈꃅꇢꇁꐂꃅꑘꐘꐛꀐ,ꎭꂵꃅꇢꆹꊿꀉꎂꌊꀁꋌꀂꈹꀋꉪꑵꌠꉨꑞꑌꋌꇬꀋꅲ,ꋌꄡꀂꏾꈎꌌꋍꃅꋭꈧꌠꃅꐺ。
　　ꎭꂵꃅꇢꋃꒉꀉꇨꂷꊌꄉꌕꑍꂷꑬꆏ。

ꎭ ꂵ ꃅ ꇢ ■ ꃅꇢꆿꐂ　　 发布时间：2005-5-12 16:52:49
ꇖꑍꄹꉇꌠꌤꃅꆸꄮ,ꌤꃅꊿꃀꂷꈿꇈ,ꉘꀋꇉꌠꆏꃅꇢꆿꐂꌟꒉꀉꒉꂶꌠꌌꋍꏿꊨ。
　　“ꐋꀨꎭꂵꃅꇢ,ꆏꊿꀊꏀꀈꎵꑠꂷ,ꈍꃅꌤꃅꌠꉬ？ꑞꃅꑠꃅꐵꑷꌠꉬ？ꑲꌩꇣꑻꌠꌤꈌꐔ
　　ꒈꑠꍈꇯꆏꋋꃅꀋꄐ!ꆏꉜꉏ,ꇿꑌꁧꀋꎴꌊꌞꑓꌂ！”
　　ꎭꂵꃅꇢꃃꌌꃵꐔꉆꐔꈾꇈ,ꊿꂶꌠꑌꈁꑓꅩꇉꀕꃅꎍꀐ。
　　“ꀉꑳꀋ,ꌤꑠꑞꋒꄿꂿꄡꃃ,ꄾꌦꋩꃅꊼꇅꋰꄉ,ꋰꄉꑲꆏꑞꑌꌞꀂꏽꀋꇁ。”
　　ꋌꎺꋍꀉꄉꅇꂷꋋꇬꄀꇬꆏ,ꋍꃃꐪꈧꌠꃮꉆꀧꌗꁖꂷꀉꏯꑍꁧꀐ。
　　“ꉢ……”
　　ꎭꂵꃅꇢꀋꅑꀕꑘꀵꄉꉌꂵꐛꀋꐛꌠꂿꇬꆏ,ꌟꒉꑍꂷꂶꌠꉌꂵꄻꀋꈴꃅ：“ꎭꂵꃅꇢꇭꀧꀋꃪꄉꑬꆏꀐ,ꆅꐥꇬꑌꑲꌩꇀꄜꅀ？”
　　ꅇꂷꋋꇬꈨꊂ,ꎭꂵꃅꇢꈀꎭꀕꈁꑓꅑꄉꋌꏮꌟꒉꑍꂷꀕꌠꊼꇅꉜ,ꋋꇅꇬꌟꒉꌕꂷꂶꌠꆹꋍꉌꀋꁒꑓꀋꁒꃅꑳꐎꅝꀣꃅꇫꑌ。ꌤꃅꐋꀨꀉꁁꈧꌠꑌꈁꑓꇬ“ꋋꑠꆹꂿꅗꈨꅗꀐꌠ”ꎑꄉꁱꀋꐭꃅꇫꑌꌐ。
　　ꌤꃅꅉꋋꂷꇬꌟꒉꋋꌕꑻ,ꐈꋓꌠꆹꌕꂷꂶꌠꏣꌠꀋꐥ。ꄩꅑꐂꇈꈌꍓꉐꍓꌠꆏꋌꀉꇨ,ꌤꑘꃶꐚꃄꅉꆏꋌꊊꂿꀋꉆ。
　　ꌟꒉꀉꒉꂶꌠꑍꂷꂶꌠꃀꄙꋍꇬꁵꇈ,ꑊꂡꆈꇗꃅ：“ꊛꄉꃀꈿ”ꄷ。
　　ꈎꂫꌤꃅꃆꂮꎖꉚꄮꆏ,ꌟꒉꑍꂷꂶꌠꃅꋒꄷꇂꈪꑠꏢꋌꑠꇬꁳ。

ꎭ ꂵ ꃅ ꇢ ■ ꃅꇢꆿꐂ　　 发布时间：2005-5-12 16:52:49

　　ꊁꄹꉇ,ꌟꒉꀉꒉꂶꌠꋌꎷꌌꅇꉉ。“ꐋꀨꎭꂵꃅꇢꀋ,ꐋꀨꈨꄹꇬ,ꆎꌋꆀꌟꒉꑍꂷꂶꌠꐯꋽꇨꄷꀋꂸ,ꑠꃅꇬꆹꀋꍑꌠꉬ,ꋌꊂꆏꋓꉪꁨꄉ,ꋋꈨꀋꉬꑲꆏꅽꏯꁧꏖꐨꐥꌠꉬ。”
　　ꎭꂵꃅꇢꅇꂷꋋꈨꊂ,ꉨꑌꀋꉬꒈꑌꀋꉬ!
　　ꋌꊂꆏ,ꎭꂵꃅꇢꁱꌠꌤꃅꄯꒉ,ꁱꌊꈍꃅꉾꑲꑌꌕꁊꀱꇬꎷ,ꎭꂵꃅꇢꑌꈍꑋꃢꀱꂿ,ꁱꂷꀕꄻꀋꀱꃅꋌꐒꉈꁴꇬꎷ。
　　ꌤꀞꅉꍗꏓꀉꆹꂶꌠꑬꆏꇈ,ꌤꃅꅉꀉꁁꃤꄜꅇꄯꒉꀉꑌꐯꀉꑌꈨꋌꌌꎭꂵꃅꇢꁳꁱꇁꏭ,ꃅꇢꍗꏓꀉꆹꋋꂷꀑꑊꉜꄉꁱꋒꃅꁱꇈ,ꀊꉗꀋꐛꃅꀕꇢꂓꅑꀐ。
　　ꀱꋀꌤꃅꅈꆏꎭꂵꃅꇢꄯꒉꁱꐨꀊꅰꃅꀉꁘꇁꀐ,ꋍꃢꋑꀋꋒꏃꃢꉆꃢꐒꀱꇬꂯꈴꒉꀋꄐ。ꊿꂶꌠꑌꑘꄃꂷꀉꏯꊿꁳꄔꏾꄔꆺꏾꆺꀐ,ꈜꀕꇈꈎꂫꎖꉚꇬꃪꑠꃢꀋꐥ,ꄷꀋꁧꌟꒉꀉꒉꂶꌠꈌꇬꆹꋌꎕꏦꇬꂯꑟꀋꄐꀕꃅꐙꄷ。
　　ꌤꃅꅉꇬꌤꃅꊿꀊꏀꑠꂷꁸꇫꎼꇀꌦ,ꌋꅪꎔꐯꎔꂷ。ꌋꅪꀊꏀꋋꂷꇁꈭꐨ,ꎭꂵꃅꇢꉈꃅꌤꃅꄯꒉꁱꌠꌤꑘꐘꌠ,ꌟꒉꀉꒉꂶꌠꁸꋌꁳꃅꏭꀐ。ꋋꑌꀂꀋꃅꄷꀋꄹ,ꄷꀋꁧꋌꃅꇬꆹꈝꐮꐯꈝꐮ,
　　ꑞꁱꄿꂿ,ꂴꎭꂵꃅꇢꁱꋺꌠꋌꌌꃅꈎꃅꆪꀉꄂꊼꇅꄺꀱꑲꆏꀉꄻꄼꃅꋌꐒꌌꆹꇬꎷ。ꋋꑌꊿꇤꅷꌕꃢꆹꐒꀱꑴꇬ,ꄚꋌꐒꌠꎂꀕꐒꄹ,ꁱꂷꀕꇯꄻꀋꀱꃅꋌꐒꉈꁴꇬꎷ,ꃃꃔꌠꆏ,ꌕꃢꐛꑲꆏꄡꍑꃑꄷꇬꎷ。

ꎭ ꂵ ꃅ ꇢ ■ ꃅꇢꆿꐂ　　 发布时间：2005-5-12 16:52:49

　　ꋍꃢ,ꎭꂵꃅꇢꌋꆀꋌꐮꐊꌟꒉꀉꒉꂶꌠꐊꉈꏭꌤꃅꁧꇈ,ꌟꒉꀉꒉꂶꌠꍮꊪꈐꑌꄉꑠꄷ：“ꎭ
　　ꂵꃅꇢ,ꋍꈓꈎꂫꎖꉚꄮ,ꆏꉠꌤꑘꃅꌊꃪꃅꀋꁱꀋꑴ,ꀋꃋꈍꃅꐙ？”
　　ꎭꂵꃅꇢꅇꈨꊂꒈꑌꀋꉬꉨꑌꀋꉬ。
　　ꀱꇁꊂ,ꑍꆪꂷꋌꏽꐷꌊꀁꇬꁧ。ꋋꆹꋍꀉꄉꏭ：“ꅽꐥꐨꎖꋪꈴꄉꌤꃅꇬꐙꄏꇨ,ꌬꍩꑌꀋꐥꄷ。”ꂿꉂ。
　　ꑍꁮꆪꊂ,ꌟꒉꑍꂷꂶꌠꑶꌩꉅꌊꑲꌩꇈ,ꌤꃅꐋꀨꃅꑲꌩꐺꌐ。
　　ꋋꈨꂿꇬꆏ,ꎭꂵꃅꇢꀋꇙꀋꑐꃅꇬꉆ,ꀋꇊꆎꑞꍈꋌꉪꐙꌠꌡ。
　　ꌟꒉꑍꂷꂶꌠꋍꏭ：“ꎭꂵꃅꇢꑲꆏꎭꂵꃅꇢꃅꐙꑲꆀꁦꋠ!”ꄷ。
　　ꅇꂷꋋꇬꈨꇈ,ꎭꂵꃅꇢꑴꆏ‘ꃅꇢ’ꄷꁱꂷꑍꂷꌠꐈ‘ꌳꈄ’ꑍꂷꌠꐛꌟꃅꐛꇈ,ꇭꀧꋋꂷꃅꊋꑌꏢꑌꀐ。